Ufunuo 3 - UVORO GHWALOLI KWA WANDU WOSE

Uvoro kwa Sardi

¹ “Kwa malaika wa ikanisa lya Sardi wandika: “Ughu nigho uvoro ghufumagha kwa ulya ewo na roho mfungate za Mlungu na ndonde mfungate. Nanaweni agha udeagha. Namanya kamba wanamanyikanagha uwo moyo, ela wanafwile.

² Kwa hung'u uka ufungise ndighi agha ghose ghaloli ghasigho hambiri sighefwile kamare. Kwani naona kamba agho udeagha si ghaloli ghengi kele meso gha Mlungu wangu.

³ Kwa hung'u kumbuka agha ufundiso na agho usikile; ughawate na usighe kaung'a zako. Ilyi walemo ni kuuka, nikujagha kwako sa kiting'a, nawe suimanyagha ilya ngelo nijeja.

⁴ Ela kuwo na wandu wachache Sardi siweluwise nguo zawe. Nawo wejeghendanya nemi na nguo zawe za mnyange. Kwani wanafweni hung'u.

⁵ Uyu esimagha ujeruso nguo za mnyange, nemi sijefuta izina lyake kele chuo cha umana. Nemi nijeghora mwazi kamba ni wangu hambiri ya Aba na malaika wake.

⁶ Uyu ewo na masikilo, asikile ghalye Roho eghoragha kwa makanisa!

Uvoro kwa Filadelfia

⁷ “Kwa malaika wa ikanisa lya Filadelfia wandika: “Ughu ni uvoro kufuma kwa uyu ewo wa kuela na fulo. Iye wana mfungulo gholuo ghwa Daudi, naye ilyi arughura mjango, sikwesi mundungi edimagha kughurughara, na kaghurughara, sikwesi mundungi edimagha kughurughura.

⁸ Nanaweni agha udeagha; namanya kamba wana ndighi njache; nawe wanairimagha mafundiso ghangu na nuwe mudumusiliki kwangu. Imi narughura mjango hambiri yako mundungi sedimagha kughurughara.

⁹ Sikizila! Kwa undu ghwa walye wandu weo bonjo ya Shetani; walye waghori ndimi kamba ni Wayahudi na si Wayahudi wengi. Nijewadea weje wadamike kele maghulu ghako. Nawo wose wejemanya kamba nanakushaile.

¹⁰ Kwa kukala wawata mlomu ghwangu ghorumaghia, Imi namose nijekulinda kirani ngelo ghalye matiriro ghekujagha urumenguni kuwatima wandu wose wa urumengu.

¹¹ Nikujagha kafwani. Wata ichi uwo nacho, eri swasoko ni mundungi inosi lyako lyesima.

¹² Nijemdea uyu esimagha kukala nguzo ya Hekalu ya Mlungu wangu, na lyingi seisighagha. Nemi nijewandika ighulu yake izina lya Mlungu wangu na izina lya muzi ghwa Mlungu wangu. Nigho Jerusalemu mbishi iselelagha kufuma Mlungu kwa Mlungu. Sena nijewandika ighulu yake izina lyangu iwishi.

¹³ “Uyu ewo na masikilo, asikile agha Roho eghoragha kwa makanisa!

Uvoro kwa Laodikea

¹⁴ “Kwa malaika wa ikanisa lya Laodikea wandika: “Ughu ni uvoro kufuma kwa Ameni, mdumusiliki na mshahidi wa fulo, uyu ewo kudyowa kwa vindu vose viumbilo ni Mlungu:

¹⁵ Nanaweni agha udeagha, namanya uwe suwo wa mbeo ango wa moto. Neshaile macho uwo kimoju cha ivo.

¹⁶ Ela kwa kukala nuwe wa iruke suwo wa moto ango wa mbeo, nikuchwilagha kufuma kele mlomu ghwangu!

¹⁷ Kwani wanaghoragha, ‘Imi nimi mzuri, nio na kila kindu na sishaile kindu chingi.’ Ela sumanyagha selyi uwo na furuse na uwo wofwilo waya! Nuwe mkiwa, na mtuu sowesi nguo na kifondo.

¹⁸ Kwa hung'u nendekufunda, ughule zahabu kufuma kwangu, zahabu yaloli, eri ukale mzuri. Ghula sena nguo ya mnyange urware na ubule waya ghwako ghwa utuu. Sena ghula mavuta ghevila meso ghako, eri upate kuona.

¹⁹ Imi nanawakanyagha na kuwachapa walye niwashaile. Kwa hung'u, kala na chadi na usighe kaung'a zako.

²⁰ Sikizila! Imi namanga mjangoni na nadaha; Ilyi mundungi asikila lwaka lwangu na kunirughurira mjango, nijengila kele nyumba yake na nilyanye naye, naye alyanye nemi.

²¹ Uyu esimagha, nijemuhawa hachi yekalanya nemi kele kifumbi changu cha nguma, selyi imi nakala msimi, na ndamu nakala kele kifumbi cha uzuri cha Aba.

²² “Uyu ewo na masikilo, asikile agha Roho eghoragha kwa makanisa.”