Ufunuo 22 - UVORO GHWALOLI KWA WANDU WOSE

¹ Nao ulya malaika kanionyeza mweta ghwa meji gha umana gholuo ghukeng'alang'ala sa kilole, na gholuo ghukefuma kele kifumbi cha uzuri cha Mlungu na cha Mwana Ng'onzi

² nagho mweta gholuo ghukeita ghati ya ngila mbwaa ya muzi. Kele gasi zose za mweta koluo na mwiti ghwa umana ghuvalagha matunda mandu ikumi na maili kwa mwaka, kamojori kila mwezi; na manyasi ghake gheluo ughanga ghoboesa wandu wa kila mbari.

³ Sikuwesi kindu chingi chiwanyizo ni Mlungu chijeono kele ugho muzi. Kifumbi cha uzuri cha Mlungu na cha Mwana wa Ng'onzi chijekala kele ughu muzi, na watumishi wake wejemtasa.

⁴ Nawo wejeona ushu ghwake na izina lyake lyijewandiko kele gambili zawe.

⁵ Nako sikujekala na kiro sena, na siwejeshaya taa ango mlangazi ghwa ijua, kwa kukala Bwana Mlungu ujekala mlangazi ghwawe. Nawo wejedea nguma sa wazuri kwa kale na kale.

Kuja kwa Jesu

⁶ Nao malaika kaniuza, “Agha malagho ni gha fulo na gha kudumuso. Na Bwana Mlungu, uyu awahawagha Roho yake wana tondolo, watuma malaika wake kuwaonyeza watumishi wake agha gheluo ni suti kukala kafwani.”

⁷ Jesu kaghora, “Sikizila! Nikujagha kafwani! Baha walye wesikilagha utondolo ghuo kele ichi chuo.”

⁸ Imi Johana, nanasikile na kuona malagho agha ghose. Na nighenda nimalila kughasikila na kughaona, nikagwa maghuluni kwa ulya malaika aniwonyeze malagho agha nikeshaya kumtasa.

⁹ Ela kaniuza, “Swadee hung'u! Imi nimi mtumishi mumbenyu na wa wana wakwenyu wana tondolo na walye wose wawatagha malagho gha ichi chuo. Mtase Mlungu!”

¹⁰ Naye kaniuza, “Swavise malagho gha utondolo ghwa ichi chuo, kwa kukala ngelo yafika avui ya agho ghose kukala.

¹¹ Uyo wose udeagha ghawase ajuzile kudea ghawase. Uwo wose adeagha ghaluwe ajuzile kudea ghaluwe. Uyo wose ewo waloli ajuzile kukala waloli na uyo wose ewo wa kuela ajuzile kukala aelile.”

¹² Jesu kaghora, “Sikizila! Nikujagha kafwani! Nijeja na manosi ghangu kumuhawa kila mundu kuirimana na agha adeile.

¹³ Imi ni Alfa na Omega, wa hambiri na wa kudua, wa kudyowa na wa kudua.”

¹⁴ Baha walye wefulagha nguo zawe zikale zielile na wakale na hachi yelya matunda kufuma kele mwiti ghwa umana na kungila kele muzi kuitila mijango yake.

¹⁵ Ela shighati ya muzi kuwo na chuchu, wasai, wazingi, waulaghi, watasi sanamu na waembiembi wose kwa malagho na kwa madeo.

¹⁶ “Imi, Jesu, namutuma malaika wangu kughora malagho agha kwa makanisa. Imi nimi wa kivali cha Daudi, Imi nimi ndonde iwakagha ya ikesho kiro.”

¹⁷ Roho na Mwali waghora, “Njuu!” Uyo wose esikilagha agha ni suti aghore, “Njuu!” Uyo wose ewo na kau eje. Uwo wose ashaile meji gha umana ause anwe bule.

Kudua

¹⁸ Imi, Johana, namonya kila mundu uyu esikilagha malagho gha utondolo ghwa ichi chuo. Ilyi mundungi ajuzila ilagho lyingi, Mlungu ujejuzila makwito ghake gha ghalye matiriro ghawandiko kele chuo ichi.

¹⁹ Na ilyi mundungi afunya kindu chingi kufuma kele malagho gha utondolo gha ichi chuo, Mlungu ujemsoka ifungu lyake lya matunda gha mwiti ghwa umana na lya Muzi ghwa Kuela, ilyo lyaghoro kele ichi chuo.

²⁰ Uyu ashuhudia malagho agho ghose waghora, “Ee Nikujagha kafwani! Ameni, Njuu Bwana Jesu!”

²¹ Mbazi ya Bwana Jesu ikale nenyo inyose. Ameni.