Ufunuo 21 - UVORO GHWALOLI KWA WANDU WOSE

Mlunguni kuishi na isanga iwishi

¹ Nao nikaona mlunguni kuishi na isanga iwishi. Mlunguni kwa hambiri na isanga lya hambiri veluo vaita noko na sikowesi bahari ingi sena.

² Nao nikaona Muzi ghwa Kuela, Jerusalemu mbishi, ikajika kufuma mlunguni kwa Mlungu, ghuboeso na ghuo tayari sa mwali arwariso kirani kwa undu ghwa mlume wake.

³ Nao nikasikila lwaka lubwaa lukeghora kufuma kele kifumbi cha uzuri. “Zighana, makalo gha Mlungu ghakalanya na gha wadamu! Naye ujekalanya nawo, nawo wejekala wandu wake. Mlungu mwenyi ujekalanya nawo, naye ujekala Mlungu wawe.

⁴ Naye ujefuta mbori zose kele meso ghawe. Sikujekala na kifwa sena, hata sikujekala na kushighira ango kulila, ango kuhariso. Malagho gha kale ghaita noko.”

⁵ Nao ulya eluo kekala kele kifumbi cha uzuri kaghora, “Zighana, Nadea vindu vose kukala viishi.” Sena kaniuza, “Wandika agha, kwani malagho agha ni ghedumuso na gha fulo,”

⁶ Nao kaniuza, “Ghose ghadeika! Imi ni Alfa na Omega wa hambiri na wa kudua: Uyo wose ewo na kau, nijemuhawa kunwa meji kufuma kele ndoo ya meji gha umana bule.

⁷ Uyo wose esimagha, nijemuhawa ughu ufwa. Nijekala Mlungu wake, naye ujekala mwana wangu.

⁸ Ela wandu wa wogha, siwedumuse, walaghai, waulaghi, wazingi, wasai, watasi sanamu, na wandimi wose, ulalo ghwawe ghujekala kele izia lyiwakagha moto na kibiriti, icho nicho kifwa cha kaili.”

Jerusalemu mbishi

⁹ Nao mumoju wa walye malaika mfungate weluo na bakuli mfungate zijule matiriro mfungate gha kudua, keja kwangu na kaghora, “Njuu, nemi nijekuonyeza Mwali, mke wake Mwana wa Ng'onzi.”

¹⁰ Nao nikatwalo ni Roho, malaika kanituka hata ighulu ya mghondi mlele, kanionyeza Jerusalemu muzi ghwa kuela, ghukeselela kufuma mlunguni kwa Mlungu,

¹¹ ghukeng'alang'ala kwa ubwaa ghwa Mlungu. Ghukang'alang'ala sa iwe lya zoghori mbwaa lyio sa jaspa ielile sa kilole.

¹² Nagho gholuo na ukuta mubwaa mlele gholuo na mijango ikumi na mili yeluo ikelindo ni wana malaika ikumi na waili. Kele ilya mijango kowandiko mazina ikumi na maili gha mbari ikumi na mbili za wana wa Israeli.

¹³ Koluo na mijango mitatu kila gasi, mitatu mashariki, mitatu kusini, mitatu kaskazini na mitatu magharibi.

¹⁴ Nagho ukuta ghwa muzi ghowaghalo na mawe ikumi na maili gha msingi, na kele agho mawe kowandiko mazina ikumi na maili gha watumo wa Mwana wa Ng'onzi.

¹⁵ Naye ulya malaika aghoranye nemi, oluo na ndata ya zahabu yepima ghulya muzi, mijango yake na ukuta ghwake.

¹⁶ Muzi gholuo ghukatane ulele na ushabwa. Ulya malaika kaghupima ghulya muzi kwa ndata yake yepima: nagho gholuo kilomita elfu mbili na maghana mane ulele, ushabwa gholuo sa ulele, na kughenda noko ighulu sa ulele nakose.

¹⁷ Malaika kapima ukuta naghose, nagho gholuo mita mirongo mitandatu kwa kipimo chitumiogho ni wadamu, nicho atumie malaika.

¹⁸ Ukuta ghowaghalo na mawe gha zoghori gha jaspa na muzi ghwenyi gholuo ghwa zahabu yaloli ielile sa kilole.

¹⁹ Mawe gha msingi gha ukuta ghwa muzi ghedonilo na kila mbari ya mawe gha zoghori mbwaa. Iwe lya hambiri lya msingi lyeluo jaspa, lya kaili lyeluo yakuti, lya katatu kalkedoni, lya kane zumaridi,

²⁰ lya kasanu sardonik, lya katandatu akiki, lya mfungate krisolito, lya nane berili, lya kenda topazi, lya ikumi krisopraso, lya ikumi na moju hiakizo, lya ikumi na mbili amesisito.

²¹ Nayo ilya mijango ikumi na mili yeluo ni lulu ikumi na mbili; kila mjango gholuo na lulu mojori. Nayo ngila mbwaa ya muzi yeluo ni zahabu yaloli ing'alang'ala sa kilole.

²² Nemi sionile hekalu ingi kele ghulya muzi, kwani hekalu yake yeluo ni Bwana Mlungu wa Ndighi zose na Mwana wa Ng'onzi.

²³ Muzi sighoshaile ijua ango mwezi kughulangaza, kwani ubwaa ghwa Mlungu ghughulangazagha na taa yake ni Mwana wa Ng'onzi.

²⁴ Kwa mlangazi ghwake, mbari zose za urumengu zijesela; na wazuri wa urumengu wejeghuletela ghulya muzi uzuri ghwawe.

²⁵ Mijango ya muzi ikalagha mwazi msenya dii, na lyingi siirugharogho kwa kukala sikujekala na kiro alye.

²⁶ Ubwaa na uzuri ghwa wandu wa mbari zose ghujeleto kele ghulya muzi.

²⁷ Ela kindu icho chose sicheelile sichijengila, hata mundungi adeagha malagho gha duu gha waya ango aghoragha ndimi. Sala walye tu mazina ghawe ghawandiko kele chuo cha Mwana wa Ng'onzi cha umana niwo wejengila kele ghulya muzi.