Ufunuo 20 - UVORO GHWALOLI KWA WANDU WOSE

Miaka elfu

¹ Nao nikamwona malaika keselela kufuma mlunguni, ewo na mfungulo ghwa andu kwa wazimu mikonuni na mnyororo mubwaa.

² Kaiwata nyoka mbwaa ilya nyoka ya kale, niyo Shetani, kaifunga na mnyororo kwa miaka elfu mojori.

³ Ulya malaika kamukumba kele kina cha andu kwa wazimu. Kamurugharira na kakwita muhuri, eri saembeembe mbari sena mpaka miaka elfu idue. Nyuma ya agho ni suti afungulo kwa ngelo njache.

⁴ Nao nikaona vifumbi va nguma, na walye wevikalile wehawilo nguma yetaghanya. Sena nikaona roho za walye waulagho kwa undu ghwa kueresa ilya fulo ifunukulo ni Jesu na ilagho lya Mlungu. Awa siwatasile ilya nyamandu ango fwana yake, hata siwaikilo alama ya ilya nyamandu kele gambili zawe ango mikonu yawe. Awa wakazuka na wakatawala sa wazuri ngila mojori na Kristo kwa miaka elfu.

⁵ Wandu wazima wose wafwile siwazukile ngila mojori na awa mpaka ilya miaka elfu ikadua. Uku ni kuzuka kwa hambiri kwa awa wafwile.

⁶ Baha kwawe na wabarikio na ndighi awo weo amweni kele awa wa hambiri kuzuka kufuma kifweni. Kifwa cha kaili sichiwesi ndighi ighulu yawe; nawo wejekala wakohani wa Mlungu na wa Kristo, na wejetawala ngila mojori naye kwa miaka elfu.

Kusimo kwa Shetani

⁷ Nao miaka elfu mojori ikadua, Shetani ufungulogho kufuma kifungoni kwake,

⁸ naye ujeghenda kuembaemba mbari zisasarike urumenguni ghose, nazo nizo Gog na Magog. Shetani ujewakoghanya ngila mojori wose kwa uta; nawo wekalagha wengi sa msanzaghala ghwa baharini.

⁹ Nawo wakasaghasagha urumenguni kose na kuimara kambi ya wandu wa Mlungu na ghulya muzi aghushaile. Ela moto ghukaselela kufuma mlunguni ghukawaisha.

¹⁰ Na Shetani ulya awaembileembile kakumba kele izia lya moto na kibiriti, andu ilya nyamandu na wana tondolo wa ndimi weluo wakumbo; nawo wejetiriro kiro na msenya kwa kale na kale.

Kutaghanyo kwa kudua

¹¹ Nao nikaona kifumbi cha uzuri cha mnyange na ulya echikalile. Urumengu na mlunguni vikalaghaya hambiri yake na ulalo ghwawe ghukasoweka.

¹² Nao nikaona walye wandu wafwile, wabwaa na wachache, wekekala kimusi hambiri ya kifumbi cha uzuri. Vuo vikafungulo, nao chuo kimoju chikafungulo, ichi cheluo ni chuo cha umana. Walye wafwile wakataghanyo kuirimana na ghalye waghadeile. Selyi ghawandiko kele vilya vuo.

¹³ Nao bahari ikafunya wandu wafwile amweni kwake. Kifwa na urumengu ghwa wafwa ghukafunya wafwa wawe nawose. Nawo wose wakataghanyo kuirimana na madeo ghawe.

¹⁴ Nao kifwa na urumengu ghwa wafwa wakakumbo kele izia lya moto. (Ilyi izia lya moto ni kifwa cha kaili.)

¹⁵ Mundu uwo wose izina lyake silyewandiko kele chuo cha umana wanakumbilo kele izia lya moto.