Ufunuo 2 - UVORO GHWALOLI KWA WANDU WOSE

Uvoro kwa Efeso

¹ “Kwa malaika wa ikanisa lya Efeso wandika: Ughu nigho uvoro ghufumagha kwa uyu aziwatagha ndonde mfungate kele mkonu ghwake ghwa kijo na aselagha ghati ya viwaniko va zahabu mfungate va taa.

² Nanaweni agha udeagha; nanaweni selyi udeagha kazi na ndighi na selyi urumaghiagha. Nanaweni kamba sudimagha kurumaghiana na wandu wawase na kamba wanawapimagha walye waghoragha ni watumo ela siko kungi weo na wanawatambulagha kamba ni wandimi.

³ Uwe warumaghia, nawe wasirima kwa undu ghwangu, na sufwile ngolo.

⁴ Ela agha nigho nio nagho ighulu yako; ndamu sunishaile selyi wonishaile ko hambiri.

⁵ Kumbuka alye andu ugwilile! Ughaluke kufuma kele kaung'a na udee ghalye oluo kodea ko hambiri. Kwalegha kusigha kaung'a zako, nikujagha kwako na niuse kiwaniko chako cha taa kufuma andu chio.

⁶ Ela uwo na ilyi lya kukukuma: Uwe waghamenya agha ghadeogho ni Wanikolai, selyi imi nighamenyagha.

⁷ “Uyu ewo na masikilo, asikile agha Roho eghoragha kwa makanisa! “Uyu esimagha, nijemuhawa kulya itunda lya mwiti ghwa umana ghuo kele mbuwa ya Mlungu.

Uvoro kwa Smurna

⁸ “Kwa malaika wa ikanisa lya Smurna wandika: “Ughu nigho uvoro ghufumagha kwa ulya ewo wa hambiri na wa kudua, uyu efwile na ewo moyo.

⁹ Nanaweni masirimi ghake, namanya kamba nuwe mkiwa, ela kwa fulo nuwe mzuri! Namanya malagho ghawase ghaghorogho ighulu yako ni walye wakuitagha Wayahudi nawo siwo wengi anduangi, ela ni bonjo ya Shetani.

¹⁰ Swaoghe ghalye malagho gheo avui kukusirimisa. Lola! Shetani ujekutima kwa kuwadea wamoju wangizo kifungoni, nagho masirimi ghake ghejetula kwa majua ikumi. Uwe ukale mdumusiliki kwangu hata ngera sani ni suti ufwe, nemi nijekuhawa inosi lya umana kwa usimi ghwako.

¹¹ “Uyu ewo na masikilo, asikile agha Roho eghoragha kwa makanisa. Uyu esimagha seshoghonologho ni kifwa cha kaili.

Uvoro kwa Pergamoni

¹² “Kwa malaika wa ikanisa lya Pergamoni wandika: “Ughu nigho uvoro kufuma kwa ulya ewo na lufu lukalile gasi zose.

¹³ Nanaweni andu ukalagha ni andu kuwo na kifumbi cha nguma cha Shetani. Uwe nuwe wa fulo kwangu imi, nawe sulyisighile idumusi lyako kwangu hata ngelo ya majua gha Antipas, mshahidi wangu mdumusiliki aulaghilo alye andu Shetani akalagha.

¹⁴ Ela nio na malagho machache gheghora ighulu yako: Kuwo wamoju wenyu wairimagha mafundiso gha Balaamu uyu amufundise Balaki selyi ifweni kuwalongoza wana wa Israeli kele kaung'a kwa kuwangolangola walye chakulya chifunyilo sadaka kwa sanamu na kudea uzingi.

¹⁵ Naose uwo na wandu wamoju wako wairimagha mafundiso gha Wanikolai.

¹⁶ Ndamu riha kaung'a zako! Ilyi walegha, nikujagha kwako kafwani na kulwana na walye wandu kwa lufu lufumagha mlomuni kwangu.

¹⁷ Uyu ewo na masikilo, asikile agha Roho eghoragha kwa makanisa. “Uyu esimagha, nijemuhawa mana ivisike na sena nijemuhawa iwe lya mnyange lyiwandiko izina iwishi silyemanyogho ni mundungi sala ulya mwenyi elyipatagha.

Uvoro kwa Thiatira

¹⁸ “Kwa malaika wa ikanisa lya Thiatira wandika: “Ughu ni uvoro kufuma kwa Mwana wa Mlungu, uyu meso ghake ghawakagha sa moto, na nywayo zake zing'alang'alagha sa shaba ihosilo.

¹⁹ Namanya madeo ghako, Namanya mashayo ghako, Udumusiliki ghwako, utumishi ghwako, na kurumaghia kwako. Namanya kamba agha udeagha indakwenyi ghanachumbile gha hambiri.

²⁰ Ela agha nigho niwo nagho ighulu yako: Wanarumaghianyagha na ulya muke Jezebeli, uyu akuitagha mwenyi tondolo wa Mlungu. Naye wanawafundisagha watumishi wangu wadee uzingi na walye chakulya chifunyilo sadaka kwa sanamu.

²¹ Namuhawa ngelo yeriha kaung'a zake, ela sashaile kusighana na uzingi ghwake.

²² Kwa hung'u nijemkumba ulilini andu iye na walye wazingagha naye wesirimagha na ndighi. Nijedea agha ilyi walegha kuriha malagho ghawase wadeile naye.

²³ Na sena nijewaulagha wana wake. Na makanisa ghose ghamanye kamba nimi niweni maririkanyo na ngolo ya kila mundu. Nemi nijemlipa kila mumoju karakara na madeo ghake.

²⁴ “Ela inyo wazima mukalagha Thiatira simoirimagha mafundiso agha ghawase, simokufundise agha ghaitogho ni wandu wamoju malagho gha mweni gha Shetani. Nendemuza kamba, simutukisagha msigo ghungi mzima.

²⁵ Ela ni hata neja, wataneni na agha muo nagho.

²⁶ Uyu ejesima na ejuzilagha kudea agha nishaile hata kudua, nijemuhawa ndighi zilya nipatile kufuma kwa Aba.

²⁷ Nijemuhawa nguma ighulu ya mbari, awatawale na mndata ghwa chuma na awavunje vibelele sa vijawa va nyungu ya ulongo.

²⁸ Sena nijemhawa ndonde ya ikesho kiro.

²⁹ Uyu ewo na masikilo, asikile agha Roho eghoragha kwa makanisa.