Ufunuo 19 - UVORO GHWALOLI KWA WANDU WOSE

¹ Nyuma ya agha nikasikila sa lwaka lwa wandu wengi lukeruma mlunguni lukeghamba, “Mlikeni Mlungu! Ukizi, ubwaa na ndighi zio na Mlungu wetu!

² Kutaghanya kwake ni kwa fulo na kwa hachi. Wamalila kumtaghanya kijimbo ulya ahakile isanga na uzingi ghwake. Mlungu wamukwita kwa undu ghwa kuwaulagha watumishi wake.”

³ Wakakema sena, “Mlikeni Mlungu! Mosi kufuma kele zilya nyumili ziishagha ghulya muzi, ghughendagha noko ighulu kwa kale na kale!”

⁴ Walye waghosi mirongo mili na wane, na vilya viumbo vine vio moyo vikagwa msangeni na kumtasa Mlungu eluo akala kitembo kele kifumbi cha uzuri wakaghora, “Ameni! Mlikeni Mlungu!”

Karamu yelola ya Mwana Ng'onzi

⁵ Nao kukasikilika lwaka kufuma kele kifumbi cha uzuri, lukeghamba, “Mlikeni Mlungu wetu watumishi wake wose na wandu wose, wabwaa na wachache, inyo mumwoghagha.”

⁶ Nao nikasikila lwaka sa lwa ikoghano gholuo sa lwaka lwa meji gherumagha na sa mrurumo. Nikawasikila wekeghora, “Mlikeni Mlungu! Kwani Bwana, Mlungu wetu Mndighi ni Mzuri!

⁷ Tiboelo na tiseke itose; tighukase ubwaa ghwako! Kwani ngelo yafika ya kulola kwa Mwana wa Ng'onzi na mchana eusogho wakuika tayari.

⁸ Wamalila kuhawo nguo ya mnyange ielile imetametagha arware!” (Nguo ya mnyange ni madeo ghaloli gha wandu wa Mlungu.)

⁹ Nao malaika kaniuza, “Wandika agha: Baha walye wamariro karamu yelola ya Mwana wa Ng'onzi.” Nao malaika kajuzila kughora, “Agha ni malagho gha fulo gha Mlungu.”

¹⁰ Nao nikagwa hubu maghuluni kwake nikamtasa, ela kaniuza, “Swadee hung'u! Kwani imi nimi mtumishi mumbenyu sa uwe na wana wakwenyu, walye wose wawatagha fulo ilya ifunukulo ni Jesu. Mtase Mlungu.” Kwani ilya fulo ifunukulo ni Jesu niyo roho ilongozagha wana tondolo.

Mjoki farasi ya mnyange

¹¹ Nao nikaona mlunguni kwafunguka, na alye koluo na farasi ya mnyange. Naye eijokile oluo keito Mdumusiliki na Mfulo, naye utaghanyagha kwa hachi na ulwanagha uta.

¹² Meso ghake gheluo sa lumuli lwa moto, naye orwere kofia za kiuzuri nyingi chongo kwake. Naye oluo na izina awandiko, ela sikowesi mundungi elyiweni sala iye mwenyi.

¹³ Ilya nguo eruse yeluo na bighati. Izina lyake lyeluo Ilagho lya Mlungu.

¹⁴ Majeshi gha Mlunguni wakamwirima, weluo wajoka farasi za mnyange na weruse nguo za mnyange zielile.

¹⁵ Kufuma kele mlomu ghwake kukafuma lufu lukalile, ulu esimagha nagho mbari. Naye ujewatawala kwa ndata ya chuma, naye ujeikama divei kwa kilambo chekama cha hare mbwaa ya Mlungu wa Ndighi Zose.

¹⁶ Kele nguo yake na ndambi yake kowandiko izina, “Mzuri wa Wazuri na Bwana wa Mabwana.”

¹⁷ Nao nikaona malaika kekala kimusi ighulu ya ijua. Kaghora na lwaka lubwaa na nyonyi zose ziburukagha mbeoni, “Njuuni mukoghanike ngila mojori kwa undu ghwa karamu mbwaa ya Mlungu.

¹⁸ Njuuni mulye nyama za Wazuri, majemadari na askari, nyama ya farasi na wajoki farasi, nyama ya wandu wose, ya wasunyi, ya wakidina, ya wabwaa na wachache.”

¹⁹ Nao nikaona ilya nyamandu na wazuri wa urumengu na majeshi ghawe ghakoghanika kulwana na ulya ejokile farasi na ijeshi lyake.

²⁰ Ilya nyamandu ikawato mateka, ngila mojori na wana tondolo wa ndimi walye weluo wekedea mwakilimbita hambiri yake. (Yeluo ni kwa undu ghwa walye wana mwakilimbita adimile kuwaembaemba walye weluo na alama ya ilya nyamandu na walye weluo weketasa fwana ya ilya nyamandu.) Ilya nyamandu na walye wana tondolo wa ndimi wakakumbo weo moyo kele izia lya moto ghuwakagha na kibiriti.

²¹ Majeshi ghawe ghakaulagho na lufu lufumile kele mlomu ghwa ulya mundu ejokile farasi, na nyonyi zose zikalya nyama zawe zikaghuta.