Ufunuo 18 - UVORO GHWALOLI KWA WANDU WOSE

Kugwa kwa Babuloni

¹ Nyuma ya agha nikaona malaika mzima keselela kufuma mlunguni. Naye oluo na udimo mubwaa na mlangazi ghwake ghukang'alang'ala kele urumengu ghose.

² Naye kakema na lwaka lubwaa: “Ghwagwa! Babuloni muzi mubwaa ghwagwa! Ndamu ghwakala andu kokala Shetani na pepo: kwakala andu kokala nyonyi zose ziwase na zimenyeke,

³ Kwani mbari zose zananwele divei yake, divei ibile ya uzingi ghwake. Wazuri wa urumengu wanazingile naye, na wandu wa biashara wa urumengu wakala wazuri kwa undu ghwake.”

⁴ Nao nikasikila lwaka luzima kufuma mlunguni lukeghamba, “Fumeni wandu wangu! Fumeni kwake! Eri simwadeanye kaung'a naye; simojepata makwito ngila mojori naye!

⁵ Kwani kaung'a zake zanatumbanyo zikarindiko hata kufika mlunguni, na Mlungu kaghaona makosa ghake.

⁶ Mdeileni selyi kwenyi adeile; mlipe mandu maili ya madeo ghake ghose. Kikombe chake chijuzeni kindu chenwa chibile mandu maili ya chilya kindu chenwa amuboesele.

⁷ Mhaweni matiriro na furuse, sa kulya kukukasa na maboelo ekuhawile iye mwenyi kwani wanaghoragha mwenyi ngoloni: ‘Imi nakala mzuri! Simi muke afwililo ni mlume. Na lyingi sionagha furuse ingi!’

⁸ Kwa undu ughu ujekwito na makwito ijua imoju: makongo, furuse na njala. Naye ujeisho na moto. Kwa kukala Bwana Mlungu, uyu emutaghanyagha uwo na ndighi.”

⁹ Nao wazuri wa urumengu awa wadeile uzingi naye na kuboelo, wejelila na kushighira ighulu ya muzi ngelo waona mosi ghukefuma kele nyumili zilya zighuishagha.

¹⁰ Nawo wejemanga kimusi kulele kwa undu ghwa kuogha kutiriranyo naye. Wo weghoragha, “Ai! Ai! Muzi ughu mubwaa na ghwa ndighi ghwa Babuloni! Kwa saa mojori ghwamalila kutaghanyo!”

¹¹ Nao wandu wa biashara wa urumengu nawose wakamlilila na kumushighirira, kwa undu ghwa vindu vawe kulegha kughulo,

¹² Sikowesi woghula zahabu, feza, mawe gha zoghori mbwaa na lulu zawe, nguo zawe za pamba, za zambarao, za hariri na za ngundu; vilambo va kila mbari videilo na miti na vilambo va kila mbari videilo na mbembe za njovu na miti ya zoghori mbwaa, vilambo va shaba, chuma na marimari;

¹³ mdalasini, vilungo, ubani, manemane na udi, divei na mavuta, unga na ngano, ng'ombe na ng'onzi, farasi na magari gheruta, wasunyi na hata umana ghwa wandu.

¹⁴ Wandu wedeagha biashara wejemuza, “Vilambo vose valoli ovishaile valaghaya, na uzuri ghwako ghose na maboelo ghadua, na sujeviona na lyingi!”

¹⁵ Wandu wadeagha biashara walye wakalile wazuri kwa kudea biashara kele ghulya muzi, wejekala kimusi kulele, kwa undu ghwa kuogha kutiriro ngila mojori naye. Nawo wejelila na kushighira,

¹⁶ wekeghora, “Ai! Ai! Kwa muzi ughu mubwaa! Gholuo ghukerwara nguo za mnyange, za zambarao na za ngundu, na ghukerwara via va zahabu, mawe gha zoghori mbwaa na lulu!

¹⁷ Na kwa saa mojori uzuri ughu ghose ghwalaghaya!” Wabwaa wose wa meli na watambi, wadei kazi melini na walye wose wadeagha biashara kwa bahari, wakakala kimusi kulele,

¹⁸ na wakakema waona mosi ghukefuma kele nyumili zighuishile: “Na lyingi sikowesi muzi ghungi ghofwanane na muzi ughu mubwaa!”

¹⁹ Nawo wakakuvila vumbi kele vongo vawe, wakalila na kushighira, wekeghamba, “Ai! Ai muzi ughu mubwaa! Gholuo ni muzi wandu wose weluo na meli weluo weketamba baharini na kukala wazuri kwa undu ghwake! Na kwa saa mojori kila kindu chalaghaya!”

²⁰ Boelo mlunguni, andu ghwamalila kuhakilo! Boeloni wandu wa Mlungu na watumo na wana tondolo! Kwani Mlungu waghutaghanya kwa undu ghwa ghalye ghumudeilile!

²¹ Nao malaika wa ndighi kashowa iwe lyikatane na lwala lubwaa lwesha na kulyikumba baharini, keghora, “Hung'u niko muzi mubwaa ghwa Babuloni ghujekumbo na sighujeonekana lyingi.

²² Na nywaka za zeze, za wandu weimbagha na za wakwiti firimbi na tarumbeta sizijesikilika kwako sena! Sikujekala na fundi wa uya ghungi ejeoneka amweni kwako sena; na lwaka lwa lwala lwesha sighujesikilika sena.

²³ Hata mlangazi ghwa taa sighujeoneka kwako sena; na nywaka za wake weusogho na walume welolagha sizijesikilika kwako sena. Wandu wedea biashara wako weluo na ndighi urumenguni kose, na kwa usai ghwako wanaembileembile mbari zose za urumengu!”

²⁴ Babuloni ghwanakwitilo kwa kukala bighati ya wana tondolo na ya wandu wa Mlungu yanaonekane amweni kwake; hata na ya wandu wose waulagho urumenguni.