Ufunuo 17 - UVORO GHWALOLI KWA WANDU WOSE

Kijimbo mubwaa

¹ Nao mumoju wa walye wana malaika mfungate weluo na bakuli mfungate kanijila na kuniuza, “Njuu, nemi nijekuonyeza selyi kijimbo mubwaa ejetaghanyo, uyu ni ghulya muzi mubwaa ghuwaghalo avui na meta mingi.

² Wazuri wa urumengu wakazinga naye, na wandu wa urumengu wakanaruwa kwa kunwa divei ya uzingi ghwake.”

³ Nao nikangilo ni Roho na malaika kanituka hata kireti. Alye nikamwona muke ekalile kitembo ighulu ya nyamandu ya ngundu yeluo na mazina ghemtukana Mlungu ghawandiko kila andu; iyi nyamandu yeluo na vongo mfungate na mbembe ikumi.

⁴ Ulya muke oruse nguo ya zambarao na ngundu, na ongizile via va zahabu, mawe gha zoghori mbwaa na lulu. Kele mkonu ghwake owatile kikombe cha zahabu chijule ulaghelaghe na ului ghwa uzingi ghwake.

⁵ Kele gambili yake kowandiko izina lyivisike, “Babuloni Mubwaa, mee wa vijimbo vose na malaghelaghe gha urumengu.”

⁶ Nao nikamwona ulya muke wanaruwa na bighati ya wandu wa Mlungu na walye waulagho kwa undu ghwa Jesu. Nao nighenda nimwona nikashinika.

⁷ Ela malaika kaniuza, “Kudani washinika?” Imi nikughoreragha kutambula kwa ngasu za ulya muke na ilya nyamandu imutukagha, ilya nyamandu iwo na vongo mfungate na mbembe ikumi.

⁸ Ilya nyamandu uonile yeluo moyo ela ndamu yanafwile; nayo iwo avui kufuma kineni cha wazimu kughenda kuhaitiso. Wandu wakalagha urumenguni siwewandiko mazina ghawe kele chuo cha umana hambiri ya kuumbo urumengu, wejeshinika wose kuiona ilya nyamandu. Yeluo moyo; na ndamu yafwa, ela ijeonekana sena.

⁹ Aha chishaike ni akili na suku. Vongo mfungate ni mighondi mfungate ikalilogho ni ulya muke. Navo navose ni wazuri mfungate;

¹⁰ wasanu wanagwile, mumojori wanatulagha ketawala na mumoju wanakaile kuja, ngelo ekujagha udeagha nguma ngelo njache.

¹¹ Nayo ilya nyamandu ngelo moju yeluo moyo ela ikafwa, ni mzuri wa nane ewo mumoju wa walye mfungate, naye ughenzogho kuhaitiso.

¹² “Na zilya mbembe ikumi uonile ni wazuri ikumi wakaile kudyowa kutawala, ela wejehawo udimo ghotawala sa wazuri kwa saa mojori ngila mojori na ilya nyamandu.

¹³ Awa wose ikumi weo na ilengo imojori, nawo wejeihawa ndighi na udimo ghwawe ilya nyamandu.

¹⁴ Nawo wejelwana na Mwana wa Ng'onzi; ela Mwana wa Ng'onzi ngila mojori na walye awapang'ile na kuwasaghula na wairimi wadumusiliki wejewasima, kwa kukala iye ni Bwana wa Mabwana na Mzuri wa Wazuri.”

¹⁵ Nao malaika kaniuza, “Meji mengi uwonile agha ghakalilogho ni ulya kijimbo ni mbari, wandu wa kila rangi, na kiteto.

¹⁶ Mbembe zilya ikumi uzionile na ilya nyamandu zijemumenya ulya kijimbo, nawo wejemusoka kila kindu ewo nacho wamusighe mwazi; walye nyama yake na kumwisha na moto.

¹⁷ Kwani Mlungu ungizagha ngoloni kwawe ngolo yedea selyi ashaile, kwa kudumusilana na kuihawa ilya nyamandu ndighi zetawala hata malagho gha Mlungu ghakatile.

¹⁸ “Ulya muke umwonile ni muzi mubwaa ghulya ghudeagha nguma ighulu ya wazuri wa isanga.”