Ufunuo 15 - UVORO GHWALOLI KWA WANDU WOSE

Wana malaika wa matiriro gha kudua

¹ Nao nikaona ishiniko izima mlunguni, ibwaa na lyeshinisa. Alye koluo na wana malaika mfungate weluo na matiriro mfungate. Agha gheluo ni gha kudua, kwa kukala gheluo gheonyeza hare ya kudua ya Mlungu.

² Nao nikaona kindu cheluo chikeonekana sa bahari ya kilole irunganyo na moto. Sena nikaona walye wandu wasimile ilya nyamandu na fwana yake na ulya izina lyake lyeluo lya namba. Nawo wekalile kimusi avui na ilya bahari ya kilole, wekewata zeze wahawilo ni Mlungu.

³ Nawo wakaimba lumbo lwa Musa mtumishi wa Mlungu na lumbo lwa Mwana wa Ng'onzi, wekeghora, “Bwana Mlungu wa Ndighi zose, madeo ghako ni mabwaa na gha mashiniko! Uwe Mzuri wa mbari zose. Ngila zako ni za hachi na za fulo!

⁴ Nani sekulikagha na kukuogha Bwana? Uwe keng'weri nuwe Mweli. Mbari zose zijeja na kukutasa Kwa kukala madeo ghako ghaonekana na wose.”

⁵ Nyuma ya agha nikaona hekalu ifungulo mlunguni ngila mojori na hema yeonyeza Mlungu wawenyi.

⁶ Nao wana malaika mfungate weluo na ghalye matiriro mfungate wakafuma shighati ya hekalu, warwere nguo zing'alang'ala kwa kuela na mikowa ya zahabu ifungilo lagaeni kwawe.

⁷ Nao mumoju wa vilya viumbo vine vio moyo kawahawa malaika walye mfungate bakuli mfungate za zahabu zijule hare ya Mlungu, uyu ewo moyo kwa kale na kale.

⁸ Hekalu yeluo yajula mosi kufuma kele ubwaa na ndighi za Mlungu, na sikowesi mundungi adimile kungila kele hekalu mpaka ghalye matiriro mfungate ghaletilo ni wana malaika mfungate ghaghenda kudua.