Ufunuo 13 - UVORO GHWALOLI KWA WANDU WOSE

Nyamandu mbili

¹ Nao nikaona Nyamandu ikefuma baharini. Nayo yeluo na mbembe ikumi na vongo mfungate; kila mbembe yeluo na kofia ya kiuzuri, na kila chongo cheluo na izina lyemutukana Mlungu.

² Nayo ilya nyamandu yeluo ikeoneka sa ingwe na maghulu ghake gheluo sa gha dubu na mlomu gholuo sa ghwa shimba. Nao ilya nyoka ikaihawa ilya nyamandu ndighi zake na kifumbi chake cha nguma na udimo ghwake mubwaa.

³ Kimoju cha chongo cha ilya nyamandu cheluo chikeonekana chanashoghonolo na ndighi, ela ngoru yeluo yabowa. Urumengu ghose ghukashinika na kuiirima ilya nyamandu.

⁴ Wandu wose wakaitasa ilya nyoka, kwa kukala yanaihawile ilya nyamandu udimo ghwake. Wakaitasa ilya nyamandu na yose, wekeghamba, “Nani, ewo sa nyamandu? Nani edimagha kulwana nayo?”

⁵ Nao ilya nyamandu ikadumusilo ighore malagho ghekukasa na kumtukana Mlungu, nayo yedumusilo kukala na udimo kwa mezi mirongo mine na mili.

⁶ Nayo ikadyowa kumutukana Mlungu, kutukana izina lyake, kutukana andu akalagha na walye wose wakalagha mlunguni.

⁷ Sena yedumusilo kulwana na wandu wa Mlungu na kuwasima. Nayo yehawilo ndighi ighulu ya kila mbari, kichuku, kiteto na wandu wa rangi zose.

⁸ Nawo wandu wose wakalagha urumenguni wejeitasa; sala walye mazina ghawe ghawandiko hambiri ya kuumbo urumengu kele chuo cha umana cha Mwana Ng'onzi aulagho.

⁹ “Uyu ewo na kisikilo asikile.

¹⁰ Uyu wose aikililo kuwato mateka ujewato mateka, uyu wose aikilile kuulagho kwa lufu ujeulagho kwa lufu. Hung'u ni kughora wandu wa Mlungu ni suti wamange kele kurumaghia na idumusi.”

¹¹ Nao nikaona nyamandu nzima ikefuma msangeni. Nayo yeluo na mbembe mbili zifwanane na za ng'onzi, nayo yeluo ikeghora sa ilya nyoka mbwaa.

¹² Nayo yeluo na udimo ghose gholuo na ilya nyamandu ya hambiri. Ikaghudea urumengu na wose wakalagha kele urumengu, waitase ilya nyamandu ya hambiri ngoru yake yeluo yaboa.

¹³ Iyi nyamandu ya kaili ikadea wana mwakilimbita wabwaa, ikadea moto ghuselele kufuma mlunguni hata urumenguni ghukeono ni wandu.

¹⁴ Na kwa wana mwakilimbita, ikawaembaemba wandu wose wakalagha urumenguni hambiri ya ilya nyamandu ya hambiri. Nayo ilya nyamandu ikawauza wandu wadee sanamu yeihawa ishima ilya nyamandu ya hambiri ishoghonolo na lufu ela yeluo moyo.

¹⁵ Nayo ilya nyamandu ikadumusilo kuikulila mruke ghwa umana ilya sanamu ya nyamandu ya hambiri eri ilya sanamu ighore na iulaghe walye wose siweitasagha.

¹⁶ Ilya nyamandu ikawashurutisa wandu wose, wachache na wabwaa, wazuri na wakiwa, wasunyi na wakidina kuiko alama kele mikonu yawe ya kijo ango kele gambili zawe.

¹⁷ Eri mundungi saghule ango sauze ngera sewesi alama, na alama iyo ni izina lya ilya nyamandu ango namba yake.

¹⁸ Aha ni suti ukale na suku; Uyo wose ewo na akili wadima kutambukilo ni namba ya ilya nyamandu, kwa kukala ni isabu lya namba ya izina lya mdamu. Namba yake ni maghana matandatu na mirongo mitandatu na ndandatu.