Ufunuo 12 - UVORO GHWALOLI KWA WANDU WOSE

Muke na nyoka mbwaa

¹ Nao kukaonekana alama mbwaa ya mashiniko mlunguni. Koluo na muke arwariso nguo ya ijua, na eluo na mwezi isi ya maghulu ghake, na kofia ya kiuzuri chongo yeluo na ndonde ikumi na mbili.

² Naye oluo na kifu avui kuvala; kakema kwa undu ghwa usungu ghwa lwambo lovala.

³ Kukaonekana alama nzima ya mashiniko mlunguni. Koluo na nyoka mbwaa ya ngundu iwo na vongo mfungate na mbembe ikumi, kila chongo cheluo na kofia ya kiuzuri.

⁴ Kirenzi chake chikaruta ifungu imojori lya ndatu lya ndonde za mlunguni na kuzikumba msangeni. Ikakala hambiri ya ulya muke, eri imulye mwana wake kamalila kuvala.

⁵ Nao ulya muke kavala mwana wa walume etawalagha mbari zose kwa ndata ya chuma. Ela mwana kavekuro kaghenzo kwa Mlungu kele kifumbi chake cha uzuri.

⁶ Ulya muke kakimbila kireti andu eikililo ni Mlungu kotunzo kwa majua elfu mojori maghana maili na mirongo mitandatu.

⁷ Nao uta ghukadyowa koighulu mlunguni Mikaeli na malaika wake wakalwana na nyoka mbwaa yeluo ikelwana ngila mojori na malaika wake.

⁸ Ela nyoka kasimo, naye na wana malaika wake wakasowa ulalo mlunguni.

⁹ Na ilya nyoka mbwaa ikakumbo shighati; ilya nyoka ya kale iitogho Ibilisi ango Shetani, ilya iembile urumengu ghose. Ikakumbo msangeni ngila mojori na wana malaika wake.

¹⁰ Nao nikasikila lwaka lubwaa kufuma mlunguni lukeghamba, “Ndamu ukizi ghwa mlunguni ghweja: Ndamu Mlungu waonyeza ndighi zake sa Mzuri, Ndamu Masihi wake waonyeza ndighi zake. Kwani uyu eluo kimusi hambiri ya Mlungu wetu na kuwashitaki wana wakwetu kiro na msenya, wamalila kukumbo noko isi kufuma mlunguni.

¹¹ Nawo wana wakwetu wamusima kwa bighati ya Mwana wa Ng'onzi na kwa kuishuhudia ilya fulo; kwani kwa kushaya kwawe wakakufunya wenyi kufwa.

¹² Kwa hung'u boeloni inyo mlunguni na inyose mukalagha alye! Ela ni bugha kwa isanga na bahari: Kwani Shetani waselela kwenyu msangeni na uwo na hare, kwa kukala wamanya wasigho na ngelo njache.”

¹³ Nao ilya nyoka mbwaa ighenda imanya kamba yakumbo msangeni, ikadyowa kumuhada ulya muke amuvele mwana wa walume.

¹⁴ Ela ulya muke ohawilo mabambato maili gha nderi mbwaa, eri aburuke hata andu kwake kireti, andu eluo ukalagha ketunzo sikweo na ndengwa yeshoghonolo ni nyoka mbwaa kwa miaka mitatu na nusu.

¹⁵ Nao nyoka ikatila meji gheo sa mweta kufuma kele mlomu ghwake nyuma ya ulya muke, eri ghamutuke.

¹⁶ Ela isanga lyikamwarura ulya muke kwa kufungula mlomu ghwake na kughamila ghalye meji ghafumile kele mlomu ghwa nyoka mbwaa.

¹⁷ Nao nyoka mbwaa ikawasilo ni ulya muke, ikaghenda kulwana na walye wana wake wazima, walye wose wawatagha milomu ya Mlungu na wamushuhudiagha Jesu.

¹⁸ Nayo nyoka ikamanga kimusi mbalimbali ya bahari.