Ufunuo 11 - UVORO GHWALOLI KWA WANDU WOSE

Washahidi waili watumilo ni Mlungu

¹ Nao nikahawo ndata yeluo sa ndata yepima, na nikauzo, “Ghenda upime hekalu ya Mlungu na mazabahu, na utale walye wandu watasagha kele hekalu.

² Ela swapime pazia ya hekalu, kwa kukala ni ya wandu wa mbari nzima, awa wejesela kele muzi ghwa kuela kwa mezi mirongo mine na mili.

³ Nemi nijewatuma washahidi wangu waili warwere nguo za magunia, nawo wejeeresa uvoro ghwa Mlungu kwa majua elfu mojori maghana maili na mirongo mitandatu.”

⁴ Washahidi awa waili ni mizeituni mili na taa mbili zikalagha hambiri ya Bwana wa urumengu.

⁵ Ilyi mundungi atima kuzihakila, moto ghujefuma milomu yawe na kuwahaitisa wamaiza wawe; na kwa ngila iyi, uyu wose etimagha kuwahaitisa uulagho.

⁶ Nawo wana udimo ghorughara mlunguni, eri mvula siyanye ngelo yawe yeeresa uvoro ghwa Mlungu. Nawo sena wana udimo ighulu ya ndoo za meji kughaghalula bighati. Sena wana udimo ghokwita urumengu kwa makongo gha kila mbari ngelo kwa ngelo. Sa kushaya kwawe.

⁷ Nawo ilyi wamalila kueresa uvoro ghwawe, ilya nyamandu ifumile wazimuni ijelwana nawo, nayo ijewasima na kuwaulagha,

⁸ nayo mili yawe yejekala kele ngila ya muzi mubwaa, andu Bwana wawe awambilo. Izina lya kiroho lya ghulya muzi ni Sodomu ango Misri.

⁹ Wandu wa kufuma kila mbari, kichuku, kiteto, na rangi wejeizighana mili yawe kwa majua matatu na nusu na siwejedumusa waziko.

¹⁰ Wandu wa urumengu wejeboelo kwa undu ghwa kifwa cha awa waili. Wejedea maboelo na kuhawana manosi kwa kukala walye wana tondolo waili wanawaletelele masirimi mengi wadamu.

¹¹ Ela nyuma ya majua matatu na nusu, Mlungu kawangiza mruke ghokala moyo, nawo wakamanga kimusi, na wose wawaonile wakangilo ni kiture.

¹² Nao walye wana tondolo waili wakasikila lwaka lukeghora nawo kufuma mlunguni, “Njuuni aha ighulu.” Nao wamaiza wawe, wakawaona wekejoka mlunguni kele iwengu.

¹³ Nao ilya ngelo yenyi kukakala na msukosuko ghwa isanga mubwaa, ifungu imojori lya ikumi lya muzi lyikahakilo na wandu elfu mfungate wakaulagho. Wandu walye wamoju wakangilo ni kiture na wakamlika Mlungu wa mlunguni kwa ubwaa ghwake.

¹⁴ Matiriro gha kaili ghadua, ela matiriro gha katatu ghejeja kafwani.

Tarumbeta ya mfungate

¹⁵ Nao malaika wa mfungate kakwita tarumbeta yake; na alyenyi koluo na nywaka mbwaa mlunguni zikeghora, “Ndamu ndighi zetawala urumengu zio kwa Bwana wetu na Masihi wake, naye ujetawala hata kwa kale na kale.”

¹⁶ Nao walye waghosi mirongo mili na wane weluo wekekala kele vifumbi vawe va uzuri hambiri ya Mlungu, wakagwa hubu na kumutasa Mlungu,

¹⁷ wekeghora, “Bwana Mlungu wa Ndighi Zose, Uyu ewo na eluo! Takufunyila asanta kwa kuusa ndighi zako mbwaa na kudyowa kutawala.

¹⁸ Wandu siwedumuse wajoko ni hare, kwa kukala ngelo ya hare yako yeja. Ngelo ya wandu wafwile kutaghanyo. Ngelo yeja yenosa watumishi wako na wana tondolo, na wandu wako wose, awa wose, wakuhawagha ishima uwe, wabwaa kwa wachache. Ngelo yafika yewahaitisa walye wahaitise isanga.”

¹⁹ Nao hekalu ya Mlungu iwo mlunguni ikarughuro na Isanduku lya Ilagano lyikaoneka alye. Nao kukaoneka nyufu za king'alang'ala, nywaka, na mirurumo na msukosuko ghwa isanga na mvula ya mawe.