Ufunuo 10 - UVORO GHWALOLI KWA WANDU WOSE

Malaika na chuo kichache

¹ Nao nikaona malaika muzima wa ndighi keselela kufuma mlunguni. Naye oruso iwengu na chongo chake chemariro ni ndana ya mvula; ushu ghwake gholuo sa ijua, na maghulu ghake gheluo sa nguzo za moto.

² Naye oluo na chuo kichache che mwazi kele mkonu ghwake. Kangiza kighulu chake cha kijo kele bahari na kighulu cha kimosho cheluo kele isanga,

³ na kapang'a na lwaka lubwaa sa lwaka lwa shimba zirumagha. Naye aghenda apang'a, mirurumo mfungate ikatika kwa mururumo.

⁴ Nao ilyi ilya mirurumo mfungate yeluo ikeruma, neluo kavui na kuwandika, ela nikasikila lwaka kufuma mlunguni lukeghora, “Swawandike gheghorogho ni mirurumo mfungate, ni ngasu.”

⁵ Nao ulya malaika nemwonile kimusi kele bahari na isanga, kanula mkonu ghwake ghwa kijo mlunguni,

⁶ naye kaghema kwa izina lya Mlungu ewo moyo wa kale na kale, uyu aumbile mlunguni, isanga, bahari na vindu vose vio awenyi. Malaika kaghora, “Sikujekala na kumukamuka kungi!

⁷ Ela ilyi malaika wa mfungate akwita tarumbeta yake, Mlungu ukatisagha ngasu zake za kiviso, selyi eghaghorire kwa ngila ya watumishi wake wana tondolo.”

⁸ Nao lulya lwaka nelusikile lukeghoranya nemi kufuma mlunguni, lukaghora nemi sena, lukaghamba, “Ghenda na uuse chuo chio mwazi kele mkonu ghwa ulya malaika ewo kimusi kele bahari na isanga.”

⁹ Nao nikaghenda kwa ulya malaika, nikamlomba anihawe chilya chuo kichache. Naye kanuza, “Chiuse na uchilye; nacho nikalagha chibile kifu kwako, ela mlomuni chikalagha chisingile sa uki.”

¹⁰ Nao nikachiusa chilya chuo kichache kufuma mkonuni kwa malaika, nikachilya, nacho cheluo chisingile sa uki mlomuni kwangu. Ela nichimila, chikakala chibile kifu kwangu.

¹¹ Nao nikauzo, “Ni suti utondole sena uvoro ghwa Mlungu ighulu ya wandu wengi, mbari, viteto na wazuri.”