Ufunuo 1 - UVORO GHWALOLI KWA WANDU WOSE

¹ Ughu ni Ufunuo ghwa Jesu Kristo ahawilo ni Mlungu eri aghuonyeze kwa Watumishi wake, ya ghalye gheluo ni suti ghakale kafwani. Kristo wanadeile agha malagho ghamanyikane kwa mtumishi wake Johana kwa kumtuma malaika wake kwake;

² naye Johana kashuhudia ghose aonile. Agha nigho aghorire ighulu ya ilagho lya Mlungu na hachi ifunukulo ni Jesu Kristo.

³ Baha mundu ulya eshomagha Chuo ichi, na baha walye wandu wesikilagha malagho gha utondolo ughu na kuwata ghalye ghawandiko kele chuo ichi! Kwani ngelo ya agha malagho kukatila iyo avui.

Maroghowi kwa makanisa mfungate

⁴ Imi Johana nawandikila makanisa mfungate gheo Asia: Mbazi na sere ikale kwenyu kufuma kwa Mlungu uyu ewo, na eluo na ejeja, na kufuma kwa roho mfungate zikalagha hambiri ya kifumbi chake cha nguma,

⁵ na kufuma kwa Jesu Kristo, shahidi mudumusiliki, wa hambiri kuzuka kufuma kifweni na mtawala wa wazuri wa urumengu. Iye wanatishaile, na kwa undu ghwa kukufunya kwake kufwa katifungula vifungo va kaung'a zetu,

⁶ katidea tikale uzuri gha wakohani wemutumikila Mlungu wake na Aba. Kwake Jesu Kristo kukala ubwaa na ndighi hata kwa kale na kale! Ameni.

⁷ Zighaneni ondeja na maengu! Kila mundu ujemwona, hata walye wamudyaile. Wandu wa mbari zose urumenguni wejemlilila. Niko ikalagha hung'o. Ameni.

⁸ “Imi ni Alfa na Omega,” aghamba Bwana Mlungu wa Majeshi, uyu ewo, na uyu eluo, na uyu ekujagha.

Kumwona Kristo

⁹ Imi Johana wakwenyu, na mwirimi wa Jesu, awatane nenyo kele kurumaghia masirimi ghalye ghewapatagha awo weo wa uzuri ghwake. Nanaikilo kele Kisiwa cha Patmo kwa undu ghwa kuchila ilagho lya Mlungu na ilya fulo Jesu aifunukulagha.

¹⁰ Yeluo ni kele ijua lya Bwana, Roho kaningila na kusikila lwaka lubwaa, loluo sa lwaka lwa tarumbeta, lukeghora nanyuma kwangu.

¹¹ Lukaghamba, “Wandika kele chuo agha uwonagha, ughaghenzele makanisa mfungate gheo kele iyi mizi: Efeso, Smurna, Pergamoni Thiatira, Sardi, Filadelfia na Laodikea.”

¹² Nao nikaghaluka kuona nani eluo keghoranya nemi, na nikaona vianiko va zahabu mfungate va taa,

¹³ na ghati ya ivo koluo na kimoju cheluo sa mdamu eruse nguo ndele ifikagha maghulu na mkowa ghwa zahabu kele lagaya.

¹⁴ Sisiri zake zelue za mnyange sa sufu, ango sa seluji, na meso ghake gheluo ghekewaka sa moto;

¹⁵ nywayo zake zeluo sa shaba ihosilo na ieleso na moto, na lwaka lwake loluo sa lwaka lwa meji mengi.

¹⁶ Naye owatile ndonde mfungate kele mkonu ghwa kijo, na lufu lukalile gasi zose lukafuma kele mlomu ghwake. Ushu ghwake gholuo ghukeng'alang'ala sa ijua lya msenya ghati.

¹⁷ Nao nighenda nimwona, nikagwa maghuluni kwake sa mundu afwile. Ela kaniikilila mkonu ghwake ghwa kijo, kaghamba, “Swaoghe! Imi ne wa hambiri na wa kudua.

¹⁸ Imi nimi ulya ewo moyo! Neluo nifwile, ela ndamu nio moyo kwa kale na kale. Nio na udimo ighulu ya kifwa na urumengu ghwa awa wafwile.

¹⁹ Ndamu wandika malagho ughaonagha, malagho gha indakwenyi na malagho ghalye ghejekala nyuma ya agha.

²⁰ Uku niko kutambula kwa ngasu ya ndonde mfungate zilya uzionile kele mkonu ghwangu ghwa kijo na viwaniko mfungate va taa za zahabu: ndonde mfungate ni wana malaika wa makanisa mfungate na viwaniko mfungate va taa ni makanisa mfungate.