Tito 3 - UVORO GHWALOLI KWA WANDU WOSE

Maisha gha Kikristo

¹ Wauze wandu wako wakuseleze kwa watawala na wabwaa, wawasikile na kudea ghaloli kila ngelo.

² Wauze siwaghore laghelaghe ighulu ya mundungi, ela wakale na sere na masikilano na ngelo zose waonyeze umbole kwa wandu wose.

³ Kwani natose ngelo zaita teluo wazimu, sitesikilagha na tio na makosa. Teluo wasunyi wa tamaa zetu na maboelo gha kila mbari. Teluo tikekala kele ulaghelaghe na iziso, tikemenyo ni wandu nesi kuwamenya.

⁴ Ela uloli na mashayo gha Mlungu Mkizi wetu ghumanyiso,

⁵ katikiza; si kwa kukala tanadeile ghaloli ghengi isi wenyi, ela ni kwa undu ghwa mbazi yake katikiza kwa Roho wa Kuela, uyu etivazagha uishi na kutidea tikale waishi kwa kutioghesha.

⁶ Mlungu katisikilila Roho wa Kuela kwa ungi kwa ngila ya Jesu Kristo Mkizi wetu,

⁷ eri kwa mbazi yake tipate hachi kwa Mlungu na kupata umana ghwa kale na kale tighukosereagha.

⁸ Malagho agha ni gha fulo. Nanashaile malagho agha ughafungise ndighi, eri kamba walye wamudumusa Mlungu, wakufunye kele kutumia ngelo yawe kudea ghaloli, ghewarura kila mundu.

⁹ Ela ukulinde na nganyi za uzimu, mazina mengi gha wana ake, marashano na nganyi ighulu ya Sheria. Kwani sizifweni na siziwesi faida.

¹⁰ Muonye mundu emudeagha msarikane mandu maili, nao ima usighane naye putu.

¹¹ Nawe wamanya kamba mundu sa uyu walaghaya, na kaung'a zake zaonyeza ni mkosa.

Malaghizo gha kudua

¹² Ngelo namtuma Artemas ango Tukiko kwako, njuu kwangu alye Nikopoli, kwa kukala nikalagha alye na Ishika.

¹³ Dea selyi udimagha kumwarura Zenasa mwana sheria na Apolo kudyowa kutamba na uzighane kamba wapata kila kindu washaile.

¹⁴ Wandu wetu wakufundise kutumia ngelo yawe kwa kudea ghaloli, ghewahawa wandu vindu ivi washaile, siwakale wandu siwefwanagha kindu chingi.

¹⁵ Wandu wose tikezanye wakuroghowa. Roghowa wagheni wetu kele idumusi. Mbazi ikale nenyo inyose.