Tito 2 - UVORO GHWALOLI KWA WANDU WOSE

Mafundiso gha idumusi lya fulo

¹ Ela uwe, ni suti ufundise mafundiso gha idumusi lya fulo.

² Uwauze waghosi wakale na kipimo na siwehakagha, wakale na akili, wekumanziragha wenyi; wakale wamangile kele idumusi, na mashayo, na werumaghiagha.

³ Wakekulu na wose wauze wakale selyi ifweni wake wa kuela. Siwakale waguni ango wasunyi wa divei. Ela wafundise ghaloli,

⁴ kwa undu ghwa kuwafundisa wake wa irika wawashaye walume wawe na wanake,

⁵ wakale wedimagha kukumanzira na waelile, na wakale wake wa kazi nyumba kwawe, na wesikilagha walume wawe, eri mundungi saghore laghelaghe ighulu ya ilagho lya Mlungu.

⁶ Hung'u kwenyi uwauze watawana wakumanzire wenyi.

⁷ Uwe mwenyi kowaonyeza fwana ya mghendo ghwaloli kwa kila kindu. Ukale udumusilike na sohakagha na mafundiso ghako.

⁸ Utumie malagho sighedima kufunyo makosa, eri wamaiza wako wafwishike waya kwa kusowa kindu chiwase cheghora ighulu yetu.

⁹ Wasunyi wakuseleze wenyi kwa wana bwana wawe na kuwadea waboelo kwa kila ngila. Siwadee nganyi nawo,

¹⁰ hata siwawaiwile, ela wawaonyeze ngelo zose ni waloli na wadumusiliki, na kwa kudea hung'u kele kila ilagho, walete nguma yaloli kwa mafundiso gha Mlungu Mkizi wetu.

¹¹ Kwani Mlungu waonyeza mbazi yake kwa ukizi ghwa wandu wose.

¹² Mbazi iyo yatifundisa kusigha ulaghelaghe, tamaa za urumengu, tikale siteo wanarui, tikale waloli na wemuboelagha Mlungu,

¹³ tikedafurira Ijua lyibarikio ilyo tilyikosereagha, lyeonekana ubwaa ghwa Mlungu wetu mubwaa na Mkizi Jesu Kristo.

¹⁴ Naye wanakufunyile kwa undu ghwetu, katikiza kufuma kele ulaghelaghe ghose na kutidea tikale wandu waelile, kwa kukala wake mwenyi na wana beha yedea ghaloli.

¹⁵ Fundisa malagho agha, na utumie udimo ghwako kuwakumba ngolo na kuwakemela awa wekusikizilagha. Swadumuse mundungi akumenyese.