Tito 1 - UVORO GHWALOLI KWA WANDU WOSE

¹ Imi Paulo, mtumishi wa Mlungu na mtumo wa Jesu Kristo. Nanasaghulo na kutumo niwarure idumusi lya wandu wa Mlungu wasaghulo na kuwalongoza kele kumanya fulo ifundisogho ni dini yetu,

² iyi fulo iwo kele ikosereo lya umana ghwa kale na kale, Mlungu uyu seghoragha ndimi, atilagile kufuma kudyowa urumengu,

³ na ngelo ifweni ifika kaghumanyisa kwa ilagho lyake, ilyi adumusile kunihawa. Nemi nalyichila kwa kushurutiso ni Mlungu Mkizi wetu.

⁴ Kwa Tito, mwanwangu wa fulo kele idumusi tio nalyo. Mbazi na sere ifumagha kwa Mlungu Aba na Kristo Jesu Mkizi wetu ikale kwako.

Kazi ya Tito alye Krete

⁵ Nanakusighile Krete, eri uboese malagho ghesighike na usaghule waghosi kele kila muzi. Kumbuka ghalye nikulagile;

⁶ mghosi akale mundu sewesi makosa ghengi, mlume ausile muke mumojori na ewo na wana wadumuse na siwewo walaghelaghe ango visikiriwi.

⁷ Kwa kukala askofu ni kilongozi mubwaa wa kazi ya Mlungu, yanamfweni akale mundu sewesi makosa. Ni suti akale mundu seo okukasa ango wa hare za shashowa, ango munarui ango wa kondo ango wa choyo cha pesa.

⁸ Ela akale mundu wa ishima lyekaribisha na mashayo gheo ghaloli. Yanafweni akale mundu akumanziragha mwenyi, mundu wa hachi akufunyile kwa Mlungu na akumanziragha kwa kila kindu.

⁹ Ni suti awate ilagho lyidumusilike na ghewatanagha na mafundiso gha fulo. Kwa ngila iyi adime kuwakumba ngolo wamoju kwa mafundiso gha fulo na kuwaonya walye siweirimagha mafundiso agho.

¹⁰ Kwani, kuo wandu wengi, kuchumba walye waghaluke kufuma dini ya Kiyahudi, weo na maheleo ghawase gheembaemba wandu wazima na malagho ghawe gha uzimu.

¹¹ Yanafweni wanyamazo kwa kukala wahakila nyumba za wandu kwa kufundisa sighefweni; wadea hung'u wapate pesa za waya.

¹² Hata mumoju wa wana tondolo wawe wanaghorire fulo, “Wakirete ni wandu wa ndimi ngelo zose, nyamandu ziwase na waghadi weo na lwafuo,”

¹³ Agha malagho ni gha fulo; kwa undu ughu ni suti uwakemele na ndighi eri wakale na idumusi lyiketi,

¹⁴ na siwairime ngano za Kiyahudi ango malaghizo gha kidamu gha wandu weleghagha fulo.

¹⁵ Kila kindu chanaelile kwa awa waelile, ela sikwesi chingi chielile kwa awa siweelile na siwedumusagha, kwani akili na ngolo zawe zanahakilike.

¹⁶ Weghoragha kamba wanamweni Mlungu, ela wamkana kwa madeo ghawe. Ni wandu wawase na wasikiriwe, siwefweni kwa ghengi ghaloli.