Matayo 9 - UVORO GHWALOLI KWA WANDU WOSE

Jesu kumuboesa mundu wa kupooza

¹ Nao Jesu kajoka mashua, kawambuka kaghenda kele muzi ghwake ghwenyi.

² Nao wakamletela mundu wa ukongo ghwa kupooza anarage ulilini. Naye Jesu aghenda aona idumusi lyawe, kamuza mundu wa ukongo ghwa kupooza, “Swaoghe mwana wangu! Kaung'a zako zafwilo waya.”

³ Nao wamoju wa walimu wa Sheria wakaghora wenyi kwa wenyi, “Uyu mundu waghora masholi kwa Mlungu.”

⁴ Ela Jesu kemanya maririkanyo ghawe, kaghora, “Kudani mririkanya ghawase ngoloni kwenyu?

⁵ Ni lyio lyiwanguwe? Kughora, ‘Kaung'a zako zafwilo waya’ ango kughora, ‘Uka ughende’?

⁶ Ela eri mumanye kamba Mwana wa Mdamu uwo na ndighi urumenguni kufwila waya,” kamuza ulya mkongo wa kupooza, “Uka, uuse ulili ghwako na ugale nyumba kwako.”

⁷ Nao ulya mundu kauka kagala.

⁸ Nao makoghano waona agha wakangilo ni wogha, wakamlika Mlungu uyu ahawile wandu ndighi sezo.

Jesu kumpang'a Matayo amwirime

⁹ Nao ilyi Jesu eluo kefuma alye, kamwona mundu mumoju aitogho Matayo kitembo kele ofisi ya kodi, kamuza “Niirime.” Naye Matayo kauka kamwirima.

¹⁰ Nao ilyi Jesu ekalile kitembo mezeni kelya kele nyumba ya Matayo, wafunyi kodi na wakaung'a wengi wekeja wakakala kitembo na Jesu na wairimi wake.

¹¹ Nao Wafarisayo waona agha wakawauza wairimi wake, “Kudani mwalimu wenyu alyanya na wafunyi kodi na wakaung'a?”

¹² Ela Jesu aghenda asikila hung'u, kaghora, “Wandu weo banana siwashayagha mghanga, sala awa weo wakongo.

¹³ Ghendeni mkufundise kutambula kwa agha, ‘Nanashaile mbazi, na si sadaka.’ Kwani sijile kuwapang'a wandu wa hachi kungi sala wakaung'a.”

Ikotelo ighulu ya kufunga kulya

¹⁴ Nao wairimi wa Johana wakamjila Jesu wakamkotela, “Kudani isi na Wafarisayo tifungagha kulya ngelo nyingi, ela wairimi wako siwafungagha?”

¹⁵ Jesu kawatumbulila, “Ado waichi wa Bwana harusi wanafurusagha ngelo Bwana harusi ewo ngila mojori nawo? Ela ngelo ikujagha Bwana harusi efunyogho kwawe, na niyo ijekala ngelo yawe yefunga kulya.

¹⁶ “Sikwesi mundungi angizagha kiraka cha nguo kiishi kele nguo ya kale, kwani kiraka kiishi chiirashuragha nguo na ijuzilike kurashuka.

¹⁷ Hata wandu siwangizagha divei mbishi kele viriba va kale, ango wakaingiza irashuragha viriba na divei itike na viriba vihakilike. Ela divei mbishi yanangizogho kele viriba viishi eri vose vili vikale kirani.”

Mchana wa ofisa mumoju na muke awatile nguo ya Jesu

¹⁸ Nao ilyi Jesu eluo keghora hung'u, keja ofisa mumoju wa Wayahudi kamudyaila ngokoro kemuza, “Mchana wangu wafwa indakwenyi, ela njuu umwikilile mkonu eri akale moyo.”

¹⁹ Nao Jesu kauka kairimana naye ngila mojori na wairimi wake.

²⁰ Nao muke mumoju eluo kesirima na ukongo ghofunya bighati miaka ikumi na mili keja nyuma ya Jesu kawata kitambi cha nguo yake,

²¹ keghora mwenyi, “Nikawata tu nguo yake nibowagha.”

²² Nao Jesu kaghaluka, kamwona na kamuza “Swaoghe mwanwangu, idumusi lyako lyakuboesa.” Nao iyo ngelo yenyi ulya muke kaboa.

²³ Nao Jesu abusa nyumba kwa ulya ofisa kaona wakwiti nguli na wandu wengi wekelila

²⁴ kaghora, “Fumeni, Kwani uyu mchana safwile anduangi ela ondetungura.” Nawo wakamseka.

²⁵ Nao wandu waghenda wafunyo shighati, Jesu kangila kamwata ulya mchana mkonu, naye kauka.

²⁶ Nao uvoro ughu ghukaera isanga lyose.

Jesu kuboesa vifondo waili

²⁷ Nao ilyi Jesu eluo keita kufuma alye, kairimo ni wandu waili vifondo weluo wekekema, “Ee Mwana wa Daudi, tifwile waya.”

²⁸ Nao Jesu angila nyumba, walye wandu waili vifondo wakamjila, naye Jesu kawauza, “Mwadumusa kamba nadima kumuboesa-ba?” Nawo wakamuza, “Ee Bwana!”

²⁹ Nao Jesu kawata meso ghawe kewauza, “Siikale selyi mwadumusa.”

³⁰ Nao awoenyi meso ghawe ghakafunguka. Naye Jesu kawaonya na ndighi, “Manyeni simwamghorere mundungi malagho agha.”

³¹ Ela wakafuma na kueresa uvoro ghwa Jesu isanga lyilya lyose.

Jesu kumuboesa bubu

³² Nao ilyi weluo wekeghenda, Jesu kaletelo mundu bubu eluo na pepo.

³³ Nao ilya pepo ighenda iguso, ulya mundu wa pepo kadyowa kughora; na wandu wose wakashinika, wakaghamba, “Na lyingi sitionile ilagho selyi kele Israeli.”

³⁴ Ela Wafarisayo wakaghora, “Wagusa pepo kwa ndighi za mubwaa wa pepo.”

Jesu kuwafwila waya wandu

³⁵ Nao Jesu kaghenda kele mizi yose mibwaa na michache, kefundisa kele sinagogi na kuchila Ilagho Lyaloli lya Uzuri na kuboesa makongo ghose na manyonge gha kila mbari.

³⁶ Nao aghenda aona makoghano, kawafwila waya, kwani weluo wasirima na siwewesi wa kuwawarura sa ng'onzi sizewesi mlisa.

³⁷ Kwa hung'u kawauza wairimi wake, “Mvono ni mungi ela wadei kazi ni wachache.

³⁸ Mlombeni Bwana wa mvono atume wadei kazi kukwasha mvono ghwake.”