Matayo 8 - UVORO GHWALOLI KWA WANDU WOSE

Jesu kumuboesa mundu wa ukoma

¹ Nao Jesu aghenda kuselela kufuma mghondini, makoghano mabwaa ghakamwirima.

² Nao keja mundu mumoju ewo na ukoma kadyaya ngokoro hambiri yake keghamba, “Bwana kwashaya wadima kuniombochola.”

³ Nao Jesu kaghorora mkonu ghwake kamwata keghamba, “Nashaya, ombochoka.” Nao iyo ngelo yenyi ukoma ghwake ghukaombochoka.

⁴ Nao Jesu kamuza, “Lola swaghoranye na mundungi; ela ghenda kwa mkohani ukuonyeze kwake, na ufunye sadaka selyi Musa alaghize kuwamanyisa wandu kamba waboa.”

Jesu kumuboesa mtumishi wa ofisa wa Mroma

⁵ Nao Jesu angila Kapernaumu, kajilo ni ofisa mumoju Mroma kamngolangola,

⁶ kemuza, “Bwana, mtumishi wangu wanatungure nyumba na uwo na ukongo ghwa kupooza na ondesirima.”

⁷ Nao Jesu kamuza, “Nighendagha nimuboese.”

⁸ Ela ulya ofisa kamuza, “Bwana, imi sifweni ungile nyumba kwangu; ela ghora ghore yenyi na mtumishi wangu uboagha.

⁹ Kwani namose nimi mubwaa, na askari isi yangu. Nemi namuza uyu, ‘Ghenda’ na waghenda, na uyu, ‘Njuu’ na weja, na msunyi wangu ‘Dea hung'u,’ na wadea.”

¹⁰ Nao Jesu aghenda kusikila hung'u kashinika, kawauza walye weluo wekemwirima, “Fulo namuza, na lyingi sionile mundungi ewo na idumusi selyi kele Israeli.

¹¹ Nemi namuza wekujagha wandu wengi kufuma mashariki na magharibi wakalanye kitembo na Abrahamu, Isaki na Jakobo kele uzuri ghwa Mlungu,

¹² ela walye wana wa uzuri wakumbo noko kele kiza, andu kujekala kililo na kukengeresha majegho.”

¹³ Nao Jesu kamuza ulya jemadari, “Ghenda ngila yako, na ghakale selyi kwenyi wadumusa.” Nao mtumishi wake kaboa iyo ngelo yenyi.

Jesu kuboesa wandu wengi

¹⁴ Nao Jesu kaghenda nyumba kwa Petro, kamdoka mkekulu wa Petro ulilini mkongo wa msuko.

¹⁵ Nao kamwata mkonu na msuko ghukamsigha, kauka kawatumikila.

¹⁶ Nao ifika hafukeni wakamletela wose weluo na pepo, naye kazifunya kwa kughora, na kuboesa wandu wose weluo wakongo.

¹⁷ Naye kadea hung'u eri akatise ghalye ghaghoriro ni tondolo Isaya keghamba, “Iye mwenyi wanausile manyonge ghetu na kutwala makongo ghetu.”

Washaile kukala wairimi wa Jesu

¹⁸ Nao Jesu aona makoghano mabwaa ghamumara, kawauza wairimi wake, wawambuke chambuko cha bahari.

¹⁹ Nao mwalimu mumoju wa Sheria kamjila kamuza, “Mwalimu, nikuirimagha kila andu ughendagha.”

²⁰ Nao Jesu kamuza, “Kwehe zana mirumo yawe na nyonyi zana vichunguri, ela Mwana wa Mdamu sawesi andu konaraga na kuzumua.”

²¹ Nao mumoju wa wairimi wake kamuza, “Bwana sigha nighende jako nimuzike aba.”

²² Ela Jesu kamuza, “Niirime, na usighe wafwa wazike wafwa wawe.”

Jesu kunyamaza mbeo mbwaa

²³ Nao Jesu kangila kele mashua na kaghendanya na wairimi wake.

²⁴ Nao awenyi kukeja mbeo mbwaa baharini, hata mashua ikashaya kumalika baharini; ela Jesu oluo atungure.

²⁵ Wairimi wakaghenda wakamunula wekemuza, “Bwana, tikize tendefwa!”

²⁶ Naye Jesu kawauza, “Kudani mudeagha wogha wandu wa idumusi ichache?” Nao kauka na kuikemela mbeo na bahari; nao alyenyi kukanyamala chwi.

²⁷ Nao wandu wakashinika wakaghamba, “Ni mundu muni uyu hata mbeo na bahari zimusikilagha?”

Jesu kuboesa wandu waili wa pepo

²⁸ Nao Jesu aghenda afika chambuko kele isanga lya Gadareni kajilo ni wandu waili wa pepo weluo wekefuma kele makaburi. Nawo weluo wabile hata wakadea wandu siwaitile ilya ngila.

²⁹ Nao wakakema wekeghamba, “Wanashaile kimuni kwetu Mwana wa Mlungu? Ondeja aha kutitirira hambiri ya ngelo yetu?”

³⁰ Nao kavui na alye koluo na uranu ghwa nguluwe zikelisa.

³¹ Nao zilya pepo zikamlalama Jesu zikeghamba, “Ilyi watifunya, utisighe tingile kele ghulya uranu ghwa nguluwe.”

³² Nao Jesu kaziuza, “Ghendeni” Nao zikawafuma, na kungila kele nguluwe, na uranu ghose ghwa nguluwe ghukadoromoka kele ivongo ghukangila baharini, ghukafwa mejini.

³³ Nao walisa wakakimbila wakaghenda kele muzi wakawaghorera wandu ghose ghadeike na ghalye ghawapatile walye wandu wa pepo.

³⁴ Nao wandu wose wa muzi wekeja kwa Jesu; Nawo wamwona wakamlomba afume kele isanga lyawe.