Matayo 7 - UVORO GHWALOLI KWA WANDU WOSE

Kutaghanya wazima

¹ “Simwataghanye, nenyo simojetaghanyo ni Mlungu.

² Kwani selyi kwenyi mtaghanyagha niko kwenyi mtaghanyogho ni Mlungu, na kipimo chilya mpimagha nicho chenyi mpimilogho ni Mlungu.

³ Kudani uonagha kilaghulu chio kele iziso lya wakwenyu na somanyagha kigogo chio kele iziso lyako?

⁴ Ango udimagha ije kumuza wakwenyu, ‘Sigha nikufunye kilaghulu chio kele iziso lyako,’ nawe mwenyi uwo na kigogo kele iziso lyako?

⁵ Mundu wa ngolo mbili uwe, Funya jako kigogo chio kele iziso lyako, nao uone kirani kilaghulu chio kele iziso lya wakwenyu.

⁶ “Simwahawe chuchu vindu vielile; sizejemughalukia na zimushoghonole. Simwakumbe lulu zenyu hambiri ya nguluwe zijezichang'acha.

Lomba, hada, daha

⁷ “Lombeni nenyo mjepata, hadeni nenyo mjeona na daheni nenyo mjerughuriro.

⁸ Kwani kila mundu elombagha upatagha, naye ehadagha uonagha, naye edahagha urughurirogho.

⁹ Ango ni mundu muni kwenyu ilyi mwana wake amlomba mkate emuhawagha iwe?

¹⁰ Ango amlomba ikumba emuhawagha nyoka?

¹¹ Ndamu inyo muo walaghelaghe mwamanya kuwahawa wana wenyu vindu valoli. Sikuchumba Tatio ewo mlunguni kuwahawa vindu valoli awa wamlomba!

¹² Wadeileni wandu wazima selyi mushaile wamudeile inyo. Kwani iyi niyo Sheria ya Musa na mafundiso gha wana tondolo.

Mjango msuse

¹³ “Ngileni kwa mjango msuse; kwani mjango ghongila kuhaiteni ni mshabwa, na ngila yanawanguwe ighendagha kuhaiteni na awo weighendelagha ni wengi.

¹⁴ Ela mjango ghughenda kele umana ni msuse na ngila yake yanakulile; na weionagha ni wachache.

Mwiti na mavalo ghake

¹⁵ “Kulindeni na wana tondolo wa ndimi awa wemjilagha warwara marwari gha ng'onzi, ela amweni kwawe ni turugha zibile.

¹⁶ Mjewamanya kwa madeo ghawe. Ado wandu wanawahagha zabibu kele miya ango tini kele malamata?

¹⁷ Kwa hung'u mwiti ghwaloli kele uloli ghwake ghwanavalagha mavalo ghaloli, ela mwiti ghuwase kele kuwasa kwake ghwanavalagha mavalo ghawase.

¹⁸ Mwiti ghwaloli sighudimagha kuvala mavalo ghawase; hata mwiti ghuwase sighudimagha kuvala mavalo ghaloli.

¹⁹ Kila mwiti sighovalagha mavalo ghaloli ghutemogho na kukumbo motoni.

²⁰ Kwa hung'u mujewamanya kwa madeo ghawe.

Na lyingi semweni

²¹ “Si kila mundu eniitagha, ‘Bwana, Bwana,’ engilagha kele uzuri ghwa Mlungu; sala uyu edeagha mashayo gha Aba ewo mlunguni.

²² Kele ijua lyilya Lyetaghanya, wengi wejenuza, ‘Bwana, Bwana,’ sitierese uvoro ghwa izina lyako na kugusa pepo na kudea mwakilimbita nyingi kwa izina lyako?

²³ Nemi nijewauza, ‘Semweni lyingi. Fumeni kwangu inyo wadei laghelaghe.’

Wawaghali waili

²⁴ “Kila mundu esikilagha malagho agha ghangu na kughadea, nimufwananisagha na mundu mlachu awaghale nyumba yake kele iwe.

²⁵ Nao mvula ikanya, na meji ghakaruka, na mbeo ikaruma na kuikwita; ela siighwile kwa kukala yewaghalo iweni.

²⁶ Na kila mundu esikilagha malagho agha ghangu na kulegha kughadea, nimfwananisagha na mundu mpumbavu awaghale nyumba yake kele msanzaghala.

²⁷ Nao mvula inya na meji gharuka, na mbeo iruma na kuikwita, ikagwa, na kugwa kwake koluo kubwaa.”

Udimo ghwa Jesu

²⁸ Nao Jesu aghenda amalila kughora agha, makoghano weshiniso ni mafundiso ghake;

²⁹ kwa kukala ofundise sa mundu ewo na udimo na si sa Walimu wa Sheria.