Matayo 6 - UVORO GHWALOLI KWA WANDU WOSE

Mafundiso ighulu ya kuwarura wakiwa

¹ “Manyeni simwadee uhachi ghwenyi hambiri ya wandu eri muono niwo, kwani simupatagha manosi ghengi kwa Tatio ewo mlunguni.

² “Nao kofunya sadaka yako kwa mkiwa, swaghende koeresa selyi wandu wa ngolo mbili wadeagha kele sinagogi na ngileni eri wakumo ni wandu. Fulo namuza wapata manosi ghawe.

³ Ela uwe kofunya sadaka kwa mkiwa, funya hata mgheni wako wa kavui samanye selyi udeagha.

⁴ Eri sadaka yako kwa mkiwa, ikale kivisoni, na Tatio uyu aonagha kivisoni akunose mwazi.

Mafundiso ighulu ya kulomba

⁵ “Na ngelo mkelomba, simwakale sa wandu wa ngolo mbili washayagha kulomba wekekala kimusi kele sinagogi na ngileni eri waono ni wandu. Fulo namuza, wapata manosi ghawe.

⁶ Ela uwe kolomba, ngila chumbeni kwako urughare mjango, nao umlombe Tatio ewo kivisoni, na Tatio aonagha kivisoni ujekunosa.

⁷ “Na mkelomba simwaghore malagho sighefweni selyi wandu siwedumuse wadeagha, wo weririkanyagha kamba wesikilogho ni Mlungu kwa kughora malagho mengi.

⁸ Simwawasunge, kwani Tatio wamanya agha mushaile hambiri simolombile.

⁹ Ndamu inyo lombeni hung'u: ‘Aba wetu ewo mlunguni Izina lyako lyieleso;

¹⁰ Uzuri ghwako ghuje; Mashayo ghako ghadeike aha msangeni selyi gheo uko mlunguni.

¹¹ Utihawe lelo chakulya chetu cha lelo.

¹² Utisighe makosa ghetu, Selyi tawasigha awa watikosile.

¹³ Swatikumbe matimoni, ela utikize na ulya Mlaghelaghe.’” [“Kwani uzuri na ndighi na ubwaa ni vako kwa kale na kale. Ameni.]

¹⁴ “Kwani mkawafwila waya wazima makosa ghawe, Tatio ewo mlunguni ujemfwila waya nanyose.

¹⁵ Ela mukalegha kuwafwila waya wandu makosa ghawe, Tatio naese semufwilagha waya makosa ghenyu.

Mafundiso ighulu ya kufunga kulya

¹⁶ “Na mkafunga kulya simwafuruse sa wandu wa ngolo mbili, wakunjagha maushu ghawe eri waono kamba wafunga kulya. Fulo namuza, wapata manosi ghawe.

¹⁷ Ela uwe kwafunga kulya, kuvile mavuta chongo na uogheshe ushu ghwako,

¹⁸ eri kufunga kwako sikwaono ni wandu, sala Tatio ewo wa kiviso, naye Tatio ewo kivisoni ujekunosa.

Mafundiso ighulu ya mali mlunguni

¹⁹ “Simwakuikile mali urumenguni andu viburute na kutu zihakilagha na andu viting'a vivunjagha na kuiwa.

²⁰ Ela mukuikile mali mlunguni andu viburute na kutu sizehakilagha na viting'a sivevunjagha na kuiwa.

²¹ Kwani andu kwenyi mali yako iyo niko kwenyi na ngolo yako iyo.

Mlangazi ghwa muli

²² “Iziso ni taa ya muli, kwa hung'u ngera iziso lyako ni lyaloli, muli ghwako ghose ghuo na mlangazi.

²³ Ela ngera iziso lyako si lyaloli lyingi, muli ghwako ghose ghuo na kiza. Nao ngera mlangazi ghuo kwako ghwauya kiza, kiza chake chijekala kibwaa!

Mlungu na mali

²⁴ “Sikwesi mundungi edimagha kuwatumikila wana Bwana waili; kwani ujemumenya mumoju na amshaye ulya mumoju, ango ujewatana na mumoju na kumumenyesa ulya mumoju, simdimagha kumtumikila Mlungu na mali.

²⁵ “Kwa hung'u namuza, simwakusirimise na umana ghwenyu mulyighagha kimuni ango munweghagha kimuni? Hata na mili yenyu murwaragha kimuni? Ado umana sighuisile chakulya na muli sighuisile marwari?

²⁶ Loleni nyonyi za mbeoni siziwandagha na sizikwashagha na kuika vitunduni, ela Tatio wenyu wa mlunguni wazilyisa. Ado inyo simuziisile izo?

²⁷ Nani kwenyu kwa kukusirimisa edimagha kujuzila ulele ghwake kwa mkonu ghumojori?

²⁸ “Na kudani mukusirimisagha kwa undu ghwa nguo? Ririkanyeni vilua va mbweni selyi vizeguagha, sividea kazi hata sivilukagha.

²⁹ Ela namuza, hata Solomoni kele ubwaa ghwake ghose sarusiro sa kimoju cha ivi.

³⁰ Ndamu ikakala Mlungu arwarisagha nyasi za mbweni zio moyo lelo na ikesho zakumbo motoni, ado sedimagha kumurwarisa inyo wandu wa idumusi ichache?

³¹ Kwa hung'u simwakusirimise, mkeghora, ‘Tilyighagha kimuni?’ Ango ‘Tinweghagha kimuni?’ Ango ‘Tirwaragha kimuni?’

³² Kwani agho nigho ghahadogho ni mbari zose za kigheni; na Tatio wenyu wa Mlunguni wanaweni kamba mwanavishaile.

³³ Ela hadeni jako uzuri ghwa Mlungu na hachi yake na agho ghose ghejekala ghenyu na ghose.

³⁴ Kwa hung'u simwaririkanye gha ikesho, kwani ikesho lyikumanyilagha lyenyi. Ghakata masirimo gha ijua kwa ilyo ijua.