Matayo 4 - UVORO GHWALOLI KWA WANDU WOSE

Kutimo kwa Jesu

¹ Nao Jesu kalongozo ni Roho hata kireti kutimo ni Shetani.

² Naye afunga kulya majua mirongo mine kiro na msenya, kashaho ni njala.

³ Nao Shetani keja kamuza, “Ngera uwe nuwe Mwana wa Mlungu, uza mawe agha ghauye mkate.”

⁴ Ela Jesu kamutumbulila, “Mawandiko gha Kuela, ghaghora, ‘Mdamu sedimagha kukala moyo kwa mkate ghwenyi, sala kwa kila ilagho lyighorogho ni Mlungu.’”

⁵ Nao Shetani kamghenza Jesu kele muzi ghwa kuela ghwa Jerusalemu, kamjosa kele kijungulila cha hekalu

⁶ na kumuza, “Ngera nuwe Mwana wa Mlungu, kubudule msangeni, kwani yanawandiko, ‘Mlungu ulaghizagha Malaika wake wakwate, nawo wekwatagha na mikonu yawe eri hata swakwalo kighulu kele iwe.’”

⁷ Jesu kamuza, “Sena yanawandiko, ‘Swamtime Bwana Mlungu wako.’”

⁸ Nao Shetani kamghenza sena mghondini mlele na kumuonyeza mauzuri ghose gha urumengu na ubwaa ghwake.

⁹ Kamuza, “Ivi vindu vose nijekuhawa ilyi wanidyaila ngokoro na kunitasa.”

¹⁰ Nao Jesu kamuza, “Ghenda ngila zako Shetani! Kwani yanawandiko, ‘Umtase Bwana Mlungu wako na iye mwenyi keng'weri umtumikile!’”

¹¹ Nao Shetani kamsigha na wana malaika wekeja wakamtumikila.

Jesu kudyowa kazi yake Galilaya

¹² Nao Jesu aghenda kusikila kamba Johana wangizo kifungoni, kaghenda Galilaya.

¹³ Kafuma Nazareti kaghenda kukala Kapernaumu mbalimbali ya bahari kele isanga lya Zabloni na Naftali.

¹⁴ Eri ghakatile ghalye ghaghoriro ni tondolo Isaya keghamba,

¹⁵ “Isanga lya Zabloni na isanga lya Naftali Ngila ya baharini, chambuko cha Jordani Galilaya isanga lya Mbari nzima.

¹⁶ Wandu weluo kizeni waona mlangazi mubwaa. Na walye weluo kele isanga lya kiza cha kifwa, wajilo ni mlangazi.”

¹⁷ Nao kufuma ilya ngelo, Jesu kadyowa kuchila, keghamba, “Riheni, kwani uzuri ghwa Mlungu ghwafika avui.”

Jesu kuwapang'a wawati makumba wane wamwirime

¹⁸ Nao ilyi Jesu eluo kesela mbalimbali ya bahari ya Galilaya, kaona mundu na wakwawe. Simoni aitogho Petro na Andrea wakwawe, wekewata makumba na nyavu zawe, kwani weluo wawati makumba.

¹⁹ Nao Jesu kawauza, “Niirimeni, nemi nijemdea wawati wa wandu.”

²⁰ Nao iyo ngelo yenyi wakasigha nyavu zawe wakamwirima.

²¹ Nao aghenda hambiri, kaona mundu na wakwawe, Jakobo mwana wa Zebedayo na Johana wakwawe kele mashua ngila mojori na Zebedayo tatie, wekeboesa nyavu zawe. Jesu kawapang'a.

²² Na iyo ngelo yenyi wakamsigha tatie kele mashua wakamwirima.

Jesu kufundisa na kuchila na kuboesa

²³ Nao Jesu kaghenda Galilaya yose, kefundisa kele sinagogi zawe na kuchila Ilagho lyaloli lya uzuri ghwa Mlungu na kaboesa kila mbari ya ukongo na unyonge gholuo wanduni.

²⁴ Uvoro ghwake ghukaera isanga lyose lya Siria. Nao kaghenzelo wakongo wose weluo na makongo gha kila mbari na manyonge, wandu wa pepo na vigwa na wakelemele, naye kawaboesa.

²⁵ Nao makoghano mabwaa gha wandu ghakamwirima kufuma Galilaya na Dekapoli (mizi ikumi) na Jerusalemu na Judea na chambuko cha Jordani.