Matayo 3 - UVORO GHWALOLI KWA WANDU WOSE

Machilo gha Johana Mubatizi

¹ Nao ghalye majua keja Johana Mubatizi, kechila kireti cha Judea,

² keghamba, “Riheni, kwani uzuri ghwa Mlungu ghwafika kavui.”

³ Johana niye mundu aghoriro ni tondolo Isaya, keghamba: “Lwaka lwa mundu ekemagha kireti, ‘Boeseni ngila kwa undu ghwa Bwana; ghororeni ngila kwa undu ghwake.’”

⁴ Naye Johana orwere nguo ya singa za ngamila na mkowa ghwa mrongo chunu, na chakulya chake cheluo ni nzighe na uki ghwa kireti.

⁵ Nao wakamghendela wandu kufuma Jerusalemu na Judea yose na wose weluo mbalimbali ya mweta ghwa Jordani,

⁶ wakazighora kaung'a zawe, naye kawabatiza kele mweta ghwa Jordani.

⁷ Ela Johana aghenda aona Wafarisayo wengi na Wasadukayo wekemjila kwa ubatizo, kawauza, “Inyo kivali cha nyoka! Nani amuonyile kuikimbila hare ya Mlungu ikujagha?

⁸ Valeni mavalo gheonyezagha kuriha.

⁹ Na simwaririkanye inyo wenyu mukeghora, ‘Tio na aba wetu Abrahamu!’ Kwani namuza, Mlungu wadima kele agha mawe kumunulila Abrahamu wana.

¹⁰ Hata indakwenyi isoka lyanaikilo kele miriginga ya miti, eri kila mwiti sighovalagha mavalo ghupaso na kukumbo motoni.

¹¹ Imi namubatiza kwa meji kuonyeza mwariha; ela uyu ekujagha nyuma yangu uwo na ndighi kuniisa imi; hata vilatu vake siinifweni kuvitwala. Iye ujemubatiza kwa Roho wa Kuela na moto.

¹² Iye uwo na kindu chekwita viro vake mkonuni, kukwita viro vose. Naye ujekoghanya ngano yake kitunduni, ela visusi ujeviisha na moto sighozimikagha.”

Kubatizo kwa Jesu

¹³ Nao ilya ngelo Jesu keja kufuma Galilaya hata mweta ghwa Jordani kwa Johana eri abatizo.

¹⁴ Ela Johana otimile kulegha, keghamba, “Imi nimi nifweni nibatizo nuwe, newe weja kwangu?”

¹⁵ Ela Jesu kamtumbulila, “Sigha ikale hung'u, kwani yanafweni tikatise hachi yose ya Mlungu.” Nao Johana kadumusa.

¹⁶ Nao Jesu aghenda abatizo ukwenyi, kafuma mejini. Nao alyenyi mlunguni kukafunguka, kaona Roho wa Mlungu keselela sa iringo lya kishalai, kakala ighulu yake.

¹⁷ Na lwaka lukafuma mlunguni lukeghamba, “Uyu ni Mwana wangu nimushaile niboelogho niye.”