Matayo 28 - UVORO GHWALOLI KWA WANDU WOSE

Kuzuka kwa Jesu

¹ Nao nyuma ya Sabato kavui na kuela ijua lya Jumwa, Mariamu Magdalene na ulya Mariamu mzima wakaghenda kuzighana mbira.

² Nao anyalye kukakala na mtetemo mubwaa ghwa isanga, kwani malaika wa Bwana oselele kufuma mlunguni; keja kalyibingilisha lyilya iwe noko na kalyikalila.

³ Naye oluo keonekana sa king'alang'ala na nguo zake zeluo za mnyange sa theluji.

⁴ Na kwa undu ghwa kiture, walye warindiri wakagaganika na kukala sa wandu wafwile kwa wogha.

⁵ Ela ulya malaika kawauza walye wake, “Simwangilo ni wogha; kwani namanya mwondemuhada Jesu uyu awambilo.

⁶ Seo aha kungi; kwani wazuka, selyi aghorire. Njuuni mzighane andu ezikilo.

⁷ Ndamu ghendeni shoshowa muwaghorere wairimi wake kamba wamalila kuzuka kufuma kwa wafwa, na zighaneni wamalila kumkayaila kughenda Galilaya; andu mujemwonela. Namalila kumghorera.”

⁸ Kwa hung'o wakafuma alye mbireni na iseghe weo na wogha na mabwelo mabwaa, nao wakakimbila kuwaghorera wairimi wake.

⁹ Nao iyo ngelo yenyi, wakakoghana na Jesu, kawauza, “Sere ikale kwenyu.” Nao wekeja wakamwata maghulu na kumtasa.

¹⁰ Nao Jesu kawauza, “Simwangilo ni wogha; ela ghendeni muwaghorere wana wakwetu waghende Galilaya, na alye wejeniona.”

Uvoro ghwa warindiri

¹¹ Nao ilyi walye wake weluo wekeghenda, wamoju wa warindiri nawose wakaghenda kele muzi wakawaghorera wakohani wabwaa ghalye ghose ghadeike mbireni.

¹² Nawo wakohani wabwaa waghenda wakoghana na waghosi na kudea njama wakawahawa walye askari pesa

¹³ wakawauza, “Wauzeni wandu, ‘Wairimi wake wanajile na kiro wakaghuiwa muli ghwake isi titungure.’

¹⁴ Na ilyi ghasikilo ni mubwaa wa isanga, isi tijeghoranya naye, nenyo simujesirimiso.”

¹⁵ Kwa hung'u walye warindiri wakausa pesa na wakadea selyi wauzilo. Na uvoro ughu ghukaereso ghati ya Wayahudi hata lelo.

Jesu kuonekana kwa wairimi wake

¹⁶ Nao walye wairimi ikumi na mumoju wakaghenda Galilaya kele mghondi ghulya Jesu ewalaghize.

¹⁷ Nawo waghenda wamwona wakamtasa; ela wamoju wawe weluo, na ngera.

¹⁸ Nao Jesu keja kawauza, “Nahawo ndighi zose za mlunguni na za isangeni.

¹⁹ Ndamu ghendeni kwa wandu wa mbari zose na muwadee kukala wairimi wangu mukewabatiza, kwa izina lya Aba, na lya Mwana na lya Roho wa Kuela,

²⁰ na muwafundise kuwata malaghizo ghose nimughorere; na nio ngila mojori nenyo majua ghose hata kudua kwa ngelo.”