Matayo 27 - UVORO GHWALOLI KWA WANDU WOSE

Jesu kughenzo hambiri ya Pilato

¹ Nao kughenda kucha, wakohani wabwaa wose na waghosi wa wandu wakadea njama wamuulaghe Jesu.

² Wakamfunga na minyororo, wakamlongoza na kumfunya kwa Pilato mubwaa wa lyilya isanga.

Kifwa cha Juda

³ Nao Juda uyu amufunyile aona kamba Jesu wataghanyo, kariha na kauja zilya pesa mirongo mitatu kwa wakohani wabwaa na waghosi.

⁴ Keghora, “Nanadeile kaung'a yemufunya mundu sekosile aulagho.” Nawo wakamuza, “Isi tatakiani? Agho ni ghako uwe mwenyi.”

⁵ Naye kazikumba zilya pesa Hekaluni, kauya kaghenda kakunyora mwenyi.

⁶ Wakohani wabwaa wakazishowa zilya pesa, wakaghora, “Kwanarighidogho kuziika kele isanduku lya pesa lya Hekalu, kwani ni pesa za bighati.”

⁷ Kwa hung'u wakadea njama, wakaghula nazo mbuwa ya muumbi nyungu kwa undu ghwa kuzika wagheni.

⁸ Kwa hung'u ilya mbuwa yanaitogho mbuwa ya bighati hata lelo.

⁹ Nao lyikakatila ilagho lyeghoriro ni tondolo Jeremia, keghamba, “Nao wakausa pesa mirongo mitatu zoghori yake uyu aikililo ni wana wa Israeli,

¹⁰ nawo wakaghula nazo mbuwa ya muumbi nyungu selyi Bwana enilaghize.”

Pilato kumukotela Jesu makotelo

¹¹ Nao Jesu kakala kimusi hambiri ya mubwaa wa isanga; naye mubwaa wa isanga kamkotela, “Ado uwe nuwe Mzuri wa Wayahudi?” Jesu katumbulila, “Uwe waghora hung'o.”

¹² Ela ashitakio ni wakohani wabwaa na waghosi satumbulile kindu chingi.

¹³ Nao Pilato kamuza, “Ado susikilagha malagho wekushitakiagha nagho?”

¹⁴ Ela Jesu satumbulile hata ilagho lyingi; kwa hung'u mubwaa wa isanga kashinika na ndighi.

Jesu kutaghanyo kufwa

¹⁵ Nao ngelo ya karamu ya Pasaka yeluo ni ada ya mubwaa wa isanga kuwafungulila wandu mfungo mumoju wamshaile.

¹⁶ Na ilya ngelo koluo na mfungo mumoju emanyikane aitogho Baraba.

¹⁷ Nao wandu waghenda wakoghana, Pilato kawauza, “Nani mushaile nimufungulile? Baraba ango Jesu aitogho Masihi?”

¹⁸ Kwani omanyile kamba wendemfunya kwake kwa undu ghwa kumwonela iziso.

¹⁹ Ngila mojori na hung'u, ilyi Pilato eluo kemutaghanya Jesu, mkwake katuma uvoro keghamba, “Swakale na ilagho lyingi na uyo mundu wa hachi, kwani nanasirime na ndighi ihwayu nikeloteso ighulu yake.”

²⁰ Nao wakohani wabwaa na waghosi wakawashoterea wandu walombe Baraba afungulo na Jesu aulagho.

²¹ Nao mubwaa wa isanga kawakotela sena “Ni uyo wa awa waili mushaile nimufungulile?” Nawo wakaghora, “Baraba.”

²² Pilato kawakotela “Ndamu nimudee ije Jesu aitogho Masihi?” Wose wakaghora, “Mwambe!”

²³ Nao Pilato kawauza, “Kudani, kwani ni ikosa muni adea?” Ela wakakema wose na ndighi, “Mwambe.”

²⁴ Nao Pilato aghenda aona sedimagha kindu chingi na zuhe yeluo ikedyowa, kawata meji kaoghesha mikonu yake hambiri ya makoghano keghamba, “Imi siwesi ikosa lyingi kwa kifwa cha uyu mundu! Agho ni ghenyu inyo wenyi.”

²⁵ Nao wandu wose wakatumbulila, “Bighati yake ikale ighulu yetu na wana wetu.”

²⁶ Nao Pilato kawafungulila Baraba; na Jesu aghenda achapo, kamfunya awambo.

Askari kumusholela Jesu

²⁷ Nao askari wa Pilato wakamungiza Jesu kele nyumba ya uzuri iitogho Praitorio, na wakakoghana wose hambiri yake.

²⁸ Nao wakamfunya nguo zake wakamrwarisa kanzu ya ngundu.

²⁹ Nao wakaluka kofia ya miya wakamungiza chongo na wakamuikila mtomoko kele mkonu ghwake ghwa kijo; nao wakadyaya ngokoro hambiri yake wakamsholela, “Sere Mzuri wa Wayahudi!”

³⁰ Wamchila mate, wakausa ghulya mtomoko wakamriba nagho chongo.

³¹ Nao waghenda wamalila kumsholela, wakamfunya ilya kanzu ya ngundu, wakamrwarisa nguo zake zenyi, na kumlongoza noko kumwambo.

Jesu kuwambo

³² Nao ilyi weluo wekefuma, wakakoghana na mundu mumoju wa Kurene aitogho Simoni, wakamfunganyizila uyu mundu kutuka msalaba ghwa Jesu.

³³ Nawo wafika andu kuitogho Golgotha, kutambula kwake “Ngomeni.”

³⁴ Wakamhawa divei irunganyo na nyongo. Ela iye aghenda aitowa sainwele.

³⁵ Nawo waghenda wamwamba, wakasara nguo zake ghati yawe kwa kukwita kura.

³⁶ Nao wakakala kitembo alye wekemlinda.

³⁷ Na ighulu ya chongo chake wewandike mashitaki ghake, gheluo ghekeshomeka, “Uyu ni Jesu Mzuri wa Wayahudi.”

³⁸ Nao wavekuri waili wakawambo ngila mojori naye, mumoju mkonu ghwa kijo na mumoju mkonu ghwa kimosho.

³⁹ Wandu weluo wekeita wakamtukana na kusheghesha vongo vawe.

⁴⁰ Wekeghora, “Uwe ughorire uivunjagha Hekalu na kuiwaghala kwa majua matatu! Kukize uwe mwenyi. Ngera nuwe mwana wa Mlungu, selela msalabeni.”

⁴¹ Hung'u kwenyi wakohani wabwaa na Walimu wa Sheria na waghosi wakamsholela wekeghamba,

⁴² “Wanakizile wazima sedimagha kukukiza iye mwenyi! Iye ni Mzuri wa Israeli saselele ndamu kufuma kele msalaba, nesi tijemdumusa.

⁴³ Wanamdumusilagha Mlungu, Ndamu Mlungu samukize ngera amushaile, kwani oluo keghora, ‘Nimi Mwana wa Mlungu.’”

⁴⁴ Na walye wavekuri wewambanyo naye, nawose wakamsholela ukwenyi.

Kifwa cha Jesu

⁴⁵ Nao kufuma saa ndandatu hata saa kenda koluo na kiza isanga lyose.

⁴⁶ Nao saa kenda, Jesu kakema na lwaka lubwaa, “Eli, Eli, lama sabakthani?” Kutambula kwake, “Mlungu wangu, Mlungu wangu kudani wanisigha?”

⁴⁷ Nao wamoju wa walye weluo kimusi alye wasikila wakaghamba, “Mundu uyu ondempang'a Elija.”

⁴⁸ Nao mumoju wawe kakimbila shwa ngweri kausa sifongo, kaingiza kele siki, kaiika kele mrangi, kamhawa anwe.

⁴⁹ Ela wandu wamoju wakamuza, “Dafwa tione ngera Elija ukujagha amukize.”

⁵⁰ Nao Jesu kakema sena na lwaka lubwaa na kufunya roho yake.

⁵¹ Nao iyo ngelo yenyi pazia ya hekalu ikazaika vindi vili, kufuma koighulu hata koisi, na isanga lyikanyavurika na nywala zikapaika.

⁵² Mbira zikafunguka na mili mingi ya waeli wefwile ikazukiso.

⁵³ Nawo waghenda kufuma mbireni, nyuma ya kuzuka kwa Jesu wakaghenda muzi ghwa kuela, wakaonekana kwa wandu wengi.

⁵⁴ Nao ulya jemadari ngila mojori na walye wekezanye wekemlinda Jesu, waghenda waona mtetemo na ghalye ghadeike, wakangilo ni wogha wakaghora, “Fulo uyu oluo ni Mwana wa Mlungu!”

⁵⁵ Nao anyalye koluo wake wengi weluo wekezighana kufuma kakulele. Awa wemwirime Jesu kufuma Galilaya wekemtumikila.

⁵⁶ Wamoju wawe ni Mariamu Magdalene na Mariamu mee Jakobo na Josefu, na mee wana wa Zebedayo.

Kuziko kwa Jesu

⁵⁷ Nao kughenda kuswa, kukeja mundu mumoju wa Arimathaya eluo mzuri, aitogho Josefu, naye naese oluo mwirimi wa Jesu.

⁵⁸ Kaghenda kwa Pilato kalomba muli ghwa Jesu. Naye Pilato kaghora ahawo.

⁵⁹ Nao Josefu kausa muli ghwa Jesu kaghufunga na sanda ielile,

⁶⁰ kaghuzika kele mbira yake mbishi eyikotile kele lwala; kabingilisha iwe ibwaa kele mjango ghwa mbira kaibula, nao kaghenda ngila zake.

⁶¹ Mariamu Magdalene na ulya Mariamu mumoju weluo kitembo alyenyi wekelola mbira.

Warindiri kele mbira

⁶² Nao ilyo ikesho, ijua lya Sabato, wakohani wabwaa na Wafarisayo wakakoghana kwa Pilato

⁶³ wakamuza, “Bwana tikumbukagha selyi ulya mundu wa ndimi aghorire ngelo eluo moyo, kamba, ‘Nyuma ya majua matatu nizukagha sena.’

⁶⁴ Kwa hung'u ghora mbira yake ilindo hata ijua lya katatu eri wairimi wake siwejeja na kughuiwa muli ghwake na kuuza wandu, ‘Wazuka kufuma kwa wafwa!’ Nazo ndimi izi za kudua zijekala ziwase kuchumba zilya za hambiri.”

⁶⁵ Pilato kawauza, “Muo na askari, ghendeni mlinde mbira selyi mudimagha.”

⁶⁶ Nao wakaghenda wakailinda mbira kwa kuika muhuri kele iwe na kuika askari.