Matayo 26 - UVORO GHWALOLI KWA WANDU WOSE

Njama yemulagha Jesu

¹ Nao Jesu amalila kughora izi ghore kawauza wairimi wake,

² “Mwamanya kamba nyuma ya majua maili kujekala Pasaka, na Mwana wa Mdamu ujefunyo awambo.”

³ Nao wakohani wabwaa na waghosi wa wandu wakakoghana kele nyumba ya Mkohani Mubwaa eluo keito Kayafa,

⁴ wakadea njama ya selyi wemwatagha Jesu kwa kiviso na wamuulaghe.

⁵ Ela wakaghora siyakale ngelo ya karamu sikojekala na zuhe na wandu.

Jesu kuvilo mavuta alye Bethania

⁶ Nao Jesu ilyi eluo Bethania kele nyumba ya Simoni mundu eluo na ukoma.

⁷ Ngelo eluo kelya, muke mumoju kamjila na chupa ya alabasta ijule marashi gheo na zoghori mbwaa, kaghanyinyila kele chongo chake.

⁸ Ela wairimi waghenda waona wakawasilo wakaghamba, “Kudani ghahakilo matuu?

⁹ Ni Kumacho mavuta agha ghatagho kwa pesa nyingi na izo pesa zikahawo wakiwa.”

¹⁰ Ela Jesu kemanya agha, kawauza, “Kudani mumusirimisagha uyu muke? Wanideila kazi yaloli.

¹¹ Kwani wakiwa muo nawo majua ghose, ela imi simkalanyagha nemi.

¹² Kwa kuninyinyila marashi kele muli ghwangu, waniika tayari kwa kuziko kwangu.

¹³ Fulo namuza, andu kose kuchilogho ilyi Ilagho Lyaloli kele urumengu ghose, ilyi lyadeo ni uyu muke lyighorogho kwa ukumbuso ghwake.”

Juda kudumusa kumfunya Jesu

¹⁴ Nao mumoju wa walye wairimi ikumi na waili, aitogho Juda Iskariote, kaghenda kwa wakohani wabwaa,

¹⁵ kawauza, “Munihawagha kimuni ilyi namufunya kwenyu?” Wakamtalila pesa mirongo mitatu wakamhawa.

¹⁶ Nao kufuma ilya ngelo Juda kahada ngila yemfunya.

Jesu kulya chakulya cha Pasaka na wairimi wake

¹⁷ Nao ijua lya hambiri lya karamu ya mikate siyengizilo chachu, wairimi wakamjila Jesu wekemkotela, “Ni hiyo ushaile tighende tiboese ulya chakulya cha Pasaka?”

¹⁸ Naye kawatumbulila, “Ghendeni kele muzi kwa mundu mumoju, na mumuze, ‘Mwalimu ughoragha, ngelo yangu yafika, nilyilagha chakulya cha Pasaka kele nyumba yako ngila mojori na wairimi wangu.’”

¹⁹ Nao wairimi wakadea selyi Jesu awauzile, wakatayarisha chakulya cha Pasaka.

²⁰ Nao kufika hafukeni, Jesu kakala kitembo kulya na wairimi ikumi na waili.

²¹ Na ilyi weluo wekelya kawauza, “Fulo namuza, mumoju wenyu ujenifunya.”

²² Wairimi wakafurusa na kudyowa kughora mumoju mumoju, “Nimi Bwana?”

²³ Jesu katumbulila, “Uyu evililagha mkate kele bakuli nemi, niye mwenyi enifunyagha.

²⁴ Mwana wa Mdamu ufwighagha selyi Mawandiko gha Kuela ghaghora, ela ni bugha kwake uyu mundu emufunyagha Mwana wa Mdamu! Ni baha kwake uyu mundu ngera sevelo!”

²⁵ Juda ulya amufunyile kaghora, “Nimi Mwalimu?” Jesu kamtumbulila, “Uwe waghora.”

Kilalilo cha Bwana

²⁶ Nao ilyi weluo wekelya, Jesu kawata mkate, kaghubarikia, kaghuvunja na kuwahawa wairimi wake kewauza, “Wateni mulye, ughu ni muli ghwangu.”

²⁷ Nao kawata kikombe, naye aghenda amkasa Mlungu kawahawa kewauza, “Nweni ichi inyose.

²⁸ Iyi ni bighati yangu ya ilagano itikagha kwa undu ghwa wengi kwa kusigho kaung'a.

²⁹ Imi namuza, sinweghagha sena mavalo gha mzabibu hata ijua lyilya nijenwa uishi ngila mojori nenyo kele Uzuri ghwa Aba.”

³⁰ Nao waghenda waimba lumbo, wakafuma wakaghenda mghondi ghwa Mizeituni.

Jesu kutondola ighulu ya Petro kumkana

³¹ Nao Jesu kawauza wairimi wake, “Mujenisigha inyose ichi kiro, kwani yanawandiko kele Mawandiko gha Kuela, ‘Nijemkwita mlisa na ng'onzi za uranu zijesaghasagha.’

³² Ela nikazukiso, nijemkayayila Galilaya.”

³³ Petro kamuza Jesu, “Hata ngera wose wejekusigha, imi sikusighagha.”

³⁴ Jesu kamuza, “Fulo nakuza, ichi kiro chenyi, hambiri ya jongole siyetetile ujenikana mandu matatu.”

³⁵ Petro kamuza, “Hata ngera ni suti nifwanye na uwe, sijekukana.” Na walye wairimi wamoju wose, wakaghora ukwenyi.

Jesu kulomba Gethsemane

³⁶ Nao Jesu kaghendanya na wairimi wake andu kuitogho Gethsemane, kawauza, “Kaleni kitembo aha nighende alye chambuko nilombe.”

³⁷ Naye kawatwala Petro na wana waili wa Zebedayo, kadyowa kufurusa na kusirima,

³⁸ naye kawauza, “Roho yangu yana furuse hata kifwa; kaleni aha mcherese ngila mojori nemi.”

³⁹ Nao kaghenda hambiri kuchache, kagwa hubu, kalomba, “Aba ikadimika kikombe ichi chesirima uniukisile; ela si selyi imi nishaile, sala selyi uwe ushaile.”

⁴⁰ Nao kawauyila walye wairimi, kawadoka watungura; kamuza Petro, “Ado simudimile kucheresa nemi hata kwa saa mojori?

⁴¹ Chereseni na mlombe eri simwangile matimoni. Fulo roho yanashaile, ela muli ni mnyonge.”

⁴² Nao kaghenda sena indu lya kaili kalomba, “Aba ngera ichi kikombe sichedimikagha chiite sechinwele, mashayo ghako ghadeike.”

⁴³ Nao kawuya sena kawadoka watungura, kwani meso ghawe ghegwaile.

⁴⁴ Nao kawasigha sena kaghenda kulomba indu lya katatu, keghora malagho ghalye ghenyi.

⁴⁵ Nao kauya sena kwa wairimi, kawauza, “Mwanatulagha mtungure na mkezumua? Loleni ngelo yafika na Mwana wa mdamu ujefunyo kwa wandu wa kaung'a.

⁴⁶ Ukeni, tighende, zighaneni ulya enifunyagha uwo avui!”

Kuwato kwa Jesu

⁴⁷ Nao ilyi Jesu eluo keghora, Juda mumoju wa walye wairimi ikumi na waili keja, ngila mojori na ikoghano ibwaa lya wandu weo na nyufu na rungu. Wafumile kwa wakohani wabwaa na waghosi wa wandu.

⁴⁸ Naye ulya amufunyile owahawile alama yewauza, “Uyu mundu nimususugagha niye mwenyi; mwateni.”

⁴⁹ Na Juda kamghendela Jesu, kamuza “Wasinda sere Mwalimu!” Nao kamususuga.

⁵⁰ Jesu kamuza, “Mgheni wangu, Dea ichi chakuleta aha.” Nao walye wandu wekeja wakamwata Jesu na kumuhasisa gi.

⁵¹ Nao mumoju wa walye wekezanye na Jesu kafunya lufu lwake, kamtema msunyi wa mkohani mubwaa, kampasa kisikilo.

⁵² Jesu kamuza, “Uja lufu lwako kele andu kwake, kwani wose wewatagha lufu wefwigha kwa lufu.

⁵³ Ado mwonderirikanya sidimagha kumlomba Aba na aseleze indakwenyi majeshi ghechumbagha ikumi na maili gha wana malaika?

⁵⁴ Ela Mawandiko gha Kuela ghekatilagha ije, agha ghaghora kamba ni suti ghakale hung'o?”

⁵⁵ Nao iyo ngelo yenyi Jesu kawauza makoghano, “Mweja na nyufu na rungu kuniwata sa muvekuri? Kila ijua neluo Hekaluni kitembo nikefundisa na simuniwatile.

⁵⁶ Ela agha ghose ghadeika eri Mawandiko gha Kuela gha wana tondolo ghakatile.” Nao wairimi wose wakamsigha wakakimbila.

Jesu hambiri ya Baraza

⁵⁷ Nao walye wandu wamwatile Jesu wakamlongoza hata kwa mkohani mubwaa Kayafa, andu Walimu wa Sheria na waghosi wekoghanike.

⁵⁸ Petro kamwirima kwa kulele, hata kafika kele nyumba ya mkohani mubwaa, kangila kakala kitembo na warindiri eri aone kudua kwake.

⁵⁹ Nao wakohani wabwaa na baraza yose wakahada ushuhuda ghwa ndimi ighulu ya Jesu eri wamuulaghe.

⁶⁰ Ela wakasowa hata ngera sani wanajile washahidi wengi wa ndimi. Ela kudua wekeja waili.

⁶¹ Wakaghora, “Uyu mundu wanaghorire, ‘Nadima kuivunja hekalu ya Mlungu na kuiwaghala kwa majua matatu.’”

⁶² Mkohani mubwaa kakala kimusi kaghora, “Ado suwesi ilagho lyingi lyetumbulila? Ni malagho muni awa wandu wekushitakiagha nagho?”

⁶³ Ela Jesu kanyamala kima. Nao Mkohani Mubwaa kamuza, “Ndekughemesa kwa Mlungu ewo moyo, utighorere ngera nuwe Masihi Mwana wa Mlungu.”

⁶⁴ Jesu kamuza, “Uwe waghora. Ela namuza, Nyuma ya agha, mujemwona Mwana wa Mdamu kekala kitembo kele mkonu ghwa kijo ghwa Mlungu wa Ndighi zose, keja na maengu gha mlunguni!”

⁶⁵ Nao aho Mkohani mubwaa karashura nguo zake, keghamba, “Wamutukana Mlungu. Nini sena tishailagha washahidi? Ba mwasikila inyo wenyi matukano ghake.

⁶⁶ Muonagha ije?” Nawo wakaghamba, “Yanamfweni afwe.”

⁶⁷ Nao wakamchila mate gha ushu na wakamukwita, na wamoju wakamubahala.

⁶⁸ Wekeghamba, “Titondolele uwe Masihi! Nani akukwita?”

Petro kumkana Jesu

⁶⁹ Nao Petro oluo kitembo shighati ya nyumba, kajilo ni mtumishi wa kichana, kamuza, “Uwe nawose okezanye na Jesu wa Galilaya.”

⁷⁰ Ela iye kalegha hambiri ya wandu wose, “Simanyagha agha ughoragha.”

⁷¹ Naye aghenda afuma mjangoni mtumishi mumoju kamwona, naye kawauza wandu weluo kimusi alye, “Uyu mundu oluwanyo na Jesu wa Nazareti.”

⁷² Petro kakana sena kaghema. “Simweni ulya mundu.”

⁷³ Nao kumukamuka kachache, walye weluo kimusi wakamjila wakamuza Petro, “Fulo nuwe mumoju wa wairimi wake, kwani kughora kwako kwakumanyisa.”

⁷⁴ Nao Petro kadyowa kuwanyiza na kughema keghamba, “Simweni uyu mundu.” Nao iyo ngelo yenyi jongole ikateta!

⁷⁵ Nao Petro kakumbuka malagho ghaghoriro ni Jesu. “Hambiri jongole siyetetile ujenikana mandu matatu.” Nao kafuma shighati kalila na ndighi.