Matayo 25 - UVORO GHWALOLI KWA WANDU WOSE

Ikataniso lya wachana ikumi

¹ “Niko aho Uzuri ghwa mlunguni ghujefwananiso na wachana ikumi wetwalile taa zawe, wakaghenda kumumarira bwana harusi.

² Wasanu weluo wapumbavu na wasanu weluo walachu.

³ Kwani walye wapumbavu wetwalile taa zawe ela siwetwalile mavuta ghejuzila,

⁴ ela walye walachu wetwalile mavuta kele chupa ngila mojori na taa zawe.

⁵ Na kwa kukala bwana harusi omukile luma, walye wachana wose wakashonga na wakatungura.

⁶ Ela na kiro kibwaa kukakwito lukalaghala, ‘Loleni bwana harusi weja, Njuuni mumumarire.’

⁷ Nao walye wachana wose wakauka wakawasha taa zawe.

⁸ Nao walye wapumbavu wakawauza walye walachu, ‘Tisarireni mavuta ghenyu ghamoju, kwani taa zetu zendezima.’

⁹ Ela walye walachu wakawauza, ‘Sighetikatagha isi nenyo! Ni kirani mughende mughule ghenyu.’

¹⁰ Nao walye wachana wapumbavu ilyi weluo wekeghenda kughula mavuta, bwana harusi keja, na walye wachana wadokilo tayari wakangilanya naye kele karamu ya harusi na mjango ghukarugharo.

¹¹ Nao uko nyuma walye wachana wamoju wekeja nawose wekeghora, ‘Bwana, bwana tirughurire.’

¹² Ela iye kawatumbulila, ‘Fulo, namuza simweni inyo.’”

¹³ Nao Jesu kawauza, “Lindeni kwani simumanyagha ijua ango saa.”

Ikataniso lya watumishi watatu

¹⁴ “Uzuri ghwa Mlungu ni sa mundu etambagha isanga lya kulele, apangile watumishi wake na kuwasighila mali yake.

¹⁵ Kamuhawa mumoju pesa ziitogho talanta sanu, mumoju kamhawa talanta mbili na mumoju kamhawa talanta mojori, kila mumoju kuirima udimo ghwake. Naye kaghenda ngila zake.

¹⁶ Ulya mtumishi ahawilo talanta sanu kaghenda kadea kazi nazo kapata faida ya talanta sanu zimoju.

¹⁷ Naye ulya mtumishi ahawilo talanta mbili kaghenda kadea ukwenyi, kapata talanta mbili zimoju.

¹⁸ Ela ulya apatile talanta mojori, kaghenda kakota msangeni kavisa pesa ya bwana wake.

¹⁹ “Nao nyuma ya majua mengi, bwana wa walye watumishi keja na kashaya kudea isabu nawo.

²⁰ Ulya mtumishi ahawilo talanta sanu keja hambiri kaleta talanta sanu zimoju, kamuza, ‘Bwana, wananihawile talanta sanu, lola nanapatile faida ya talanta sanu zimoju.’

²¹ Bwana wake kamuza, ‘Ni kirani mtumishi waloli na mudumusiliki. Oluo mudumusiliki kwa malagho machache nijekuika ighulu ya mengi. Ngila kele kubwelo kwa bwana wako.’

²² Nao ulya mtumishi apatile mbili naese keja hambiri, kamuza, ‘Bwana, wananihawile talanta mbili, lola nanapatile faida ya talanta mbili zimoju.’

²³ Bwana wake kamuza, ‘Ni kirani mtumishi waloli na mudumusiliki; oluo mudumusiliki kwa machache nikuikagha ighulu ya mengi, ngila kele kuboelo kwa bwana wako.’

²⁴ Nao ulya mtumishi apatile talanta mojori keja hambiri, kamuza, ‘Bwana, nanamanyile nuwe mundu ukulile; ukwashagha andu sowandile na ukoghanyagha andu sofisile;

²⁵ kwa hung'u nikaogha, nikaghenda nikaivisa talanta yako msangeni. Ndamu usa mali yako.’

²⁶ Ela bwana wake kamutumbulila, ‘Uwe mtumishi awase na mghadi! Wanamanyile kamba nanakwashagha andu sewandile na nanakoghanyagha, andu sefisile?

²⁷ Ni mango uiikile pesa yangu benki, eri ilyi neja nipate pesa yangu na faida.

²⁸ Ndamu msokeni talanta ewo nayo na mumhawe uyu ewo na ikumi.

²⁹ Kwani uyu ewo navo ujejuzilo eri akale na vingi, ela uyu sewesi, hata ichi ewo nacho ujesoko.

³⁰ Ela uyu mtumishi sefweni mkumbeni shighati kele kiza andu kujekala kililo na kukengeresha majegho.’

Kutaghanyo kwa kudua

³¹ “Nao ilyi Mwana wa Mdamu eja na ubwaa ghwake, ngila mojori na wana malaika, ujekala kele kifumbi chake cha nguma,

³² na mbari zose zijekoghanyo hambiri yake, naye ujewasaghula selyi mlisa asaghulagha ng'onzi na mbuzi.

³³ Ujeika ng'onzi kele mkonu ghwa kijo na mbuzi kele mkonu ghwa kimosho.

³⁴ Niko aho mzuri ejewauza walye weo kele mkonu ghwa kijo, ‘Njuuni inyo mubarikio ni Aba mpate Uzuri muiikililo kufuma kuumbo urumengu.

³⁵ Kwani neluo na njala mukanihawa chakulya, neluo na kau mukanihawa chenwa, neluo mgheni mukanihokera.

³⁶ Neluo tuu mkanirusa nguo, neluo mkongo mkeja mkanilola, neluo kifungoni mukeja mkaniona.’

³⁷ Nao walye wahachi wejemtumbulila, ‘Bwana, ni nini tikuonile uwo njala tikakulyisa ango uwo kau tikakuhawa chenwa?

³⁸ Na ni nini tikuonile uwo mgheni tikakuhokera ango uwo tuu tikakurwarisa?

³⁹ Na nini tikuonile mkongo ango kifungoni tikeja kukulola?’

⁴⁰ Naye Mzuri ujewatumbulila, ‘Fulo namuza, Agha mumdeilile mumoju wa awa wana wakwetu wachache, mwananideilile imi!’

⁴¹ “Nao ujewauza walye weo kele mkonu ghwa kimosho, ‘Ghendeni noko, inyo muwanyizo; mughende kele moto ghuikililo Shetani na wana malaika wake.

⁴² Kwani neluo na njala simunihawile chakulya, neluo kau simunihawile chenwa.

⁴³ Neluo mgheni na simunihokere, neluo tuu na simunirwarise, neluo mkongo na kifungoni simujile mukanilola.’

⁴⁴ Nao nawose wejemtumbulila, ‘Bwana ni nini tikuonile njala, ango kau, ango tuu, ango mkongo, ango kifungoni tikalegha kukutumikila?’

⁴⁵ Naye ujewatumbulila, ‘Fulo, namuza, selyi kwenyi simomudeilile mumoju wa awa wachache simunideilile imi.’

⁴⁶ Kwa hung'u awa wejeghenda kele matiriro gha kale na kale, ela wahachi wejengila kele umana ghwa kale na kale.”