Matayo 24 - UVORO GHWALOLI KWA WANDU WOSE

Jesu kughora ighulu ya kuhakilo Hekalu

¹ Jesu kafuma Hekaluni, na ilyi eluo keghenda ngila zake, wairimi wake wakamghendela wakamwonyeza mawaghali gha Hekalu.

² Ela Jesu kawauza, “Muonagha agha ghose? Fulo namuza, sikusighogho iwe lyingi ighulu ya mumbawe silyefuchulogho na kukumbo msangeni.”

Masirimi na matiriro

³ Nao Jesu akala kitembo kele mghondi ghwa Mizeituni, wairimi wakamjila ekeng'weri, wakamuza, “Tighorere malagho agha ghekalagha nini na ni alama muni ya kuja kwako na kudua kwa ngelo?”

⁴ Jesu kawatumbulila, “Kulindeni mundungi sejemwembaemba.

⁵ Wengi wejeja kwa izina lyangu wekeghamba, ‘Imi nimi Masihi,’ nawo wejelaghaza wengi.

⁶ Nenyo mjesikila gha uta na uvoro ghwa uta, ela simwakambo ni chongo, kwani agha ni suti gheje, ela kudua kwanakaile jako.

⁷ Kwani mbari ijelwana na mbari na uzuri ghujelwana na uzuri. Kujekala na njala na mitetemo ya isanga andu kungi.

⁸ Agha ghose ni sa kudyowa kulumo kwa kuvalo mwana.

⁹ “Nawo wejemfunya mtiriro na muulagho. Nenyo mujemenyo ni mbari zose kwa undu ghwa izina lyangu.

¹⁰ Na wengi wejesigha idumusi lyawe na wejefunyana kwa wamaiza na kumenyana.

¹¹ Kujeuka wana tondolo wengi wa ndimi, nawo wejewaembaemba wandu wengi.

¹² Na kwa kujuzilika ulaghelaghe, mashayo gha wandu wengi ghejegotua.

¹³ Ela uyu erumaghiagha hata kudua ujekila.

¹⁴ Na ilagho ilyi lyaloli lya Uzuri lyijechilo urumenguni kose, lyikale ushuhuda kwa wandu wose; nao ima kudua kuje.”

Masirimo mabwaa

¹⁵ “Kwa hung'u mkaona malagho ghawase ghefwisha waya ghaghoriro ni tondolo Danieli ghekekala andu kwa kuela, (uyu eshomagha atambule).

¹⁶ Niko aho awa wewo Judea wakimbile mighondini.

¹⁷ Naye mundu ewo ighulu ya nyumba saselele ause kindu chingi nyumba kwake.

¹⁸ Naye mundu ewo mbweni saghaluke ause nguo yake.

¹⁹ Ni bugha kwawe wake weo na kifu na wemamisagha agho majua.

²⁰ Lombeni kamba kukimbila kwenyu sikwakale na ishika ango ijua lya Sabato.

²¹ Kwani ngelo iyo kujekala na masirimi mabwaa sigheoneke lyingi kufuma kudyowa urumengu, hata na lyingi sigheoneka sena.

²² Na ngera majua ghalye sighedeilo kukala mavui, macho mundungi sekilagha; ela kwa undu ghwa wasaghulo wa Mlungu, ghalye majua ghadeo kukala mavui.

²³ “Kwa hung'u mundungi kamuza, ‘Masihi uwo aha ango uwo alye, simwadumuse!’

²⁴ Kwani kujeja Masihi wa ndimi na wana tondolo wa ndimi, nawo wejedea wana mwakilimbita na mashiniko mabwaa, eri wawalaghaze hata ikadimika wasaghulo wa Mlungu.

²⁵ Loleni namghorera kihambiri.

²⁶ Kwa hung'u ilyi wamuza, ‘Loleni uwo kireti,’ simwaghende; ango ilyi wamuza, ‘Uwo chumba cha mweni,’ simwadumuse.

²⁷ Kwani selyi king'alang'ala ching'alang'alagha kufuma mashariki hata magharibi, niko kwenyi kujekala kuja kwake Mwana wa Mdamu.

²⁸ Nderi zikoghanagha andu kimba chio.

Kuja kwa kaili kwa Mwana wa Mdamu

²⁹ “Nao nyuma ya masirimi gha ghalye majua, ijua lyiuyagha kiza na mwezi sighulangazagha na ndonde zijepotoka kufuma mlunguni na ndighi za mlunguni zijesheghesho.

³⁰ Niko aho ijeoneka alama ya Mwana wa Mdamu mlunguni, na aho mbari zose za urumengu wejeshighira; nawo wejemwona Mwana wa Mdamu keja kele maengu gha mlunguni ewo na ndighi na ubwaa mubwaa.

³¹ Naye ujewatuma wana malaika wake weo na tarumbeta zililagha na lwaka lubwaa. Nawo wejewakoghanya wasaghulo wake kufuma mbembe zose ine, kufuma kudua uku kwa mlunguni hata kulya.

Ifundiso kufuma kwa Mtini

³² “Kufundiseni kufuma kwa mtini. Ilyi mwaona mbashe zake zadyaila na kururuwa, mwamanya kamba vuli iwo kavui.

³³ Niko kwenyi nenyo ilyi mwaona malagho agha ghose, manyeni kamba Mwana wa Mdamu uwo kavui, kavui mjangoni.

³⁴ Fulo ndemuza, ichi kivali sichiitagha, hata agha ghose ghakate.

³⁵ Mlunguni na isanga vijeita ela malagho ghangu sigheitagha anduangi.

Sikwesi mundungi aweni ijua ango saa

³⁶ “Ela gha lyilya ijua na saa sikwesi mundungi aweni, hata wana malaika wa mlunguni, hata Mwana, sala Aba mwenyi.

³⁷ Selyi kwenyi koluo majua gha Noa, niko kwenyi ijekala kuja kwa Mwana wa Mdamu.

³⁸ Kwani selyi kwenyi yeluo majua ghalye hambiri ya meji kuruka, wandu weluo wekelya na kunwa, na kulola na kuuso, hata lyilya ijua Noa angilile kele safina;

³⁹ nawo siwamanyile hata meji ghaghenda gharuka ghekeja na kuwatuka wose. Niko kwenyi ijekala kuja kwa Mwana wa Mdamu.

⁴⁰ Nao wandu waili wejedoko mbweni, mumoju ujeuso na mumoju ujesigho.

⁴¹ Wake waili wejedoko wekesha lwaleni: mumoju ujetwalo na mumoju ujesigho.

⁴² Kwa hung'u kulindeni, kwani simumanyile ijua Bwana wenyu ekujagha.

⁴³ Ela manyeni hung'u: ngera mundu wa nyumba emanyile ni ngelo muni ya kiro kiting'a ekujagha, mango alindile, na sesighagha nyumba yake ivunjo.

⁴⁴ Kwa hung'u nanyose ni suti mkale karakara; kwani Mwana wa Mdamu ukujagha saa simoieleliyagha.”

Mtumishi mdumusiliki ango seo mdumusiliki

⁴⁵ “Nani ewo mtumishi mdumusiliki na mlachu? Ni ulya aikilo ni bwana wake ighulu ya watumishi wambawe, kuwahawa chakulya kwa ngelo yake.

⁴⁶ Ni baha mtumishi ulya Bwana wake ejemdoka kedea hung'o.

⁴⁷ Fulo, namuza ujemwika ighulu ya mali yake yose.

⁴⁸ Ela ulya mtumishi wa laghelaghe kaghora ngoloni kwake mwenyi, ‘Bwana wangu wamuka luma,’

⁴⁹ naye adyowe kuwakwita watumishi wambawe, na kulya na kunwa na wanaruwi.

⁵⁰ Bwana wa mtumishi ulya ukujagha ijua seeleliyagha na saa seimanyagha.

⁵¹ Naye ujempasa vindi vindi na kumwikanya na wandu wa ngolo mbili. Alye kujekala na kililo na kukengeresha majegho.