Matayo 23 - UVORO GHWALOLI KWA WANDU WOSE

Jesu kuonya ighulu ya walimu wa Sheria na Wafarisayo

¹ Nao Jesu kawauza makoghano na wairimi wake,

² “Walimu wa Sheria na Wafarisayo ni walimu waikilo weeleza Sheria za Musa.

³ Kwa hung'u mudee na muirime selyi wemuuzagha. Ela simwadee selyi wedeagha, kwani siwadeagha agha wachilagha.

⁴ Wanafungagha misigo igwaile siyedimikagha kutukika, na kuwatukisa wandu; ela wo wenyi siwaiwatagha hata na chala.

⁵ Wanadeagha malagho ghawe ghose eri waono ni wandu, kwa kukala wanadeagha vikuchu vawe vishabwa veika mawandiko gha kuela na marengere gha nguo zawe ni malele.

⁶ Nawo wanashayagha kukala andu kwa ishima kele karamu na kele vifumbi va ishima kele sinagogi.

⁷ Na wanashayagha kuroghoo sokoni na kupang'o ni wandu ‘mwalimu?’

⁸ Ela inyo simwapang'o ‘Mwalimu,’ kwani muo na Mwalimu mumojori, nenyo inyose ninyo wandu na wana wakwawe.

⁹ Na simwampang'e mundungi aba, kwani muo na Aba mumojori ewo mlunguni.

¹⁰ Hata simwapang'o mabwana, kwani muo na Bwana mumojori, Masihi.

¹¹ Uyu ewo mubwaa ghati yenyu ukalagha mtumishi wenyu.

¹² Uyo wose ekujosagha mwenyi ujeselezo, na uyo wose ekuselezagha mwenyi ujejoso.

Jesu kukanya ngolo mbili za wandu wa dini

¹³ “Ela ni bugha kwenyu inyo Walimu wa Sheria na Wafarisayo, wandu wa ngolo mbili, kwa kukala mwarugharira wandu Uzuri ghwa mlunguni, kwa kukala inyo wenyi simungilagha, hata simuwadumusilagha walye washaile kungila wangile. [

¹⁴ “Ni bugha kwenyu inyo Walimu wa Sheria na Wafarisayo, wandu wa ngolo mbili, kwani mwawasoka wake wafwililo ni walume vindu vawe kwa ulachu. Na kwa kukuonyeza mwalomba malombi malele. Kwa hung'u mjepata makwito mabwaa.]”

¹⁵ “Ni bugha kwenyu inyo Walimu wa Sheria na Wafarisayo, wandu wa ngolo mbili, kwani mwatamba baharini na isanga lyiomile eri mumughalule mundungi mumojori airime dini yenyu na ilyi mwamughalula, mwamudea mandu maili kukala mwana oghenda motoni sa inyo wenyi.

¹⁶ “Ni bugha kwenyu inyo vilongozi vifondo, inyo mughoragha, ‘Ilyi mundungi aghema kwa Hekalu, si ilagho lyingi, ela uyu eghemagha kwa zahabu ya Hekalu uwatogho ni ighemi lyake.’

¹⁷ Inyo vifondo wapumbavu, kwani ni chio kibwaa? Zahabu ango Hekalu iyi iideagha zabahu ikale ya kuela?

¹⁸ Na sena mwanaghoragha, ‘Ilyi mundungi aghema kwa mazabahu si kindu chingi, ela ilyi aghema kwa sadaka iwo ighulu ya mazabahu uwatogho ni ighemi lyake.’

¹⁹ Inyo wandu vifondo! Kwani ni chio kibwaa, sadaka ango mazabahu ilya ideagha sadaka ikale ya kuela?

²⁰ Kwa hung'u uyu eghemagha kwa mazabahu waghema kwa iyo mazabahu na kwa kila kindu chio ighulu yake

²¹ na uyu eghemagha kwa Hekalu waghema kwa iyo Hekalu na uyu akalagha kele Hekalu.

²² Naye eghemagha na mlunguni waghema kwa kifumbi cha Mlungu na kwa uyu achikalilagha.

²³ “Ni bugha kwenyu inyo Walimu wa Sheria na Wafarisayo wandu wa ngolo mbili, kwani mwafunya ifungu lya ikumi lya manyasi ghanukagha, bizari na jiraa, na mwasigha malagho gheo mabwaa gha Sheria, sa hachi na mbazi na idumusi. Agha ghefweni mughadee na simwasighe ghalye ghamoju.

²⁴ Inyo vilongozi vifondo, mwafunya mbughumbughu kele vindu venwa na kumila ngamila!

²⁵ “Ni bugha kwenyu inyo Walimu wa Sheria na Wafarisayo, wandu wa ngolo mbili! Kwani mwaoghesha vikombe na sahani shighati, ela ko mweni zanajule vindu va uting'a na choyo.

²⁶ Uwe Mfarisayo, kifondo! Jako elesa na mweni ya kikombe na sahani eri na shighati nakose kuele.

²⁷ “Ni bugha kwenyu inyo Walimu wa Sheria na Wafarisayo wandu wa ngolo mbili! Kwani mondefwanana na mbira ivililo chokaa shighati, ela amweni yanajule maindi gha wandu wafwile na vose siveelile.

²⁸ Niko kwenyi na inyo, shighati mwaonekana wahachi, ela komweni mwanajule ngolo mbili na kaung'a.

Jesu kutondola ighulu ya makwito ghawe

²⁹ “Ni bugha kwenyu inyo Walimu wa Sheria na Wafarisayo wandu wa ngolo mbili! Kwani mwawaghalila makaburi gha wana tondolo na kughawakila makaburi gha wahachi,

³⁰ mkeghora, ‘Ngera isi teluo ngelo za wana ake, macho sitewatane nawo kele kuulagha wana tondolo.

³¹ Kwa hung'u mwashuhudia inyo wenyi kukala ninyo wana wa walye wawaulaghe wana tondolo.’

³² Kwa hung'u juzileni kumalila kazi ilya idyowilo ni wana akeo.

³³ Inyo nyoka na wana wa nyoka, mudimagha ije mufusuke kutaghanyo kungila motoni?

³⁴ Kwa hung'u nijemtumila inyo wana tondolo na wandu walachu na walimu, wamoju mjewaulagha na kuwawamba, na wamoju mjewakwita kele sinagogi zenyu na kuwatirira kufuma muzi hata muzi.

³⁵ Kwa hung'u mupatagha makwito kwa kuulagho wahachi wose urumenguni, kufuma kuulagho kwa Abeli mhachi hata kuulagho kwa Zakaria mwana wa Barakia, mumuulaghe kele Hekalu ghati ya andu kwa kuela na mazabahu.

³⁶ Fulo namuza, kivali ichi chijepata makwito kwa agha ghose.”

Mashayo gha Jesu kwa Jerusalemu

³⁷ “Ee Jerusalemu, Jerusalemu! Uwe uwaulaghagha wana tondolo na kuwalasa na mawe walye watumogho kwako. Ni mandu malinga natima kuwakoghanya wana wako selyi nguku ikoghanyagha visio vake kele mabambato, nenyo mwalegha!

³⁸ Zighana Hekalu yako yabariko na yasigho nduu.

³⁹ Fulo nakuza, sunionagha sena hata ngelo ujeghora, wabarikio uyu ekujagha kwa izina lya Bwana.”