Matayo 22 - UVORO GHWALOLI KWA WANDU WOSE

Ikataniso lya karamu ya harusi

¹ Nao Jesu kaghora nawo sena kwa makataniso, kaghamba,

² “Uzuri ghwa Mlungu ghwanafwanane na mzuri adeile karamu ya harusi ya mwana wake.

³ Katuma watumishi wake waghende wawapang'e walye wandu wawaliko kele karamu ya harusi, ela wakalegha kuja.

⁴ Katumana sena watumishi wazima keghamba, ‘Wauzeni walye wawaliko: karamu yangu yakala tayari; njau na ng'ombe zangu zibandile zashinjo na kila kindu chio karakara; njuuni kele karamu ya harusi.’

⁵ Ela wakalegha kusikila, wakaghenda; mumoju mbweni kwake na mzima kele kazi yake,

⁶ na walye wahangalike wakawawata walye watumishi wakawadea laghelaghe na kuwaulagha.

⁷ Nao mzuri kawasilo, katuma askari wake wakawasaghisa walye waulaghi na kuisha muzi ghwawe.

⁸ Nao kawauza watumishi wake wamoju, ‘Karamu ya harusi ye tayari, ela walye wawaliko siwefweni kungi.

⁹ Ndamu ghendeni mataghanooni gha ngila muwakaribishe wose mujewaona weje kele karamu ya harusi.’

¹⁰ Nao walye watumishi wakaghenda ngileni wakawaleta wandu wose wawaonile, waloli na wawase; na nyumba ya harusi ikajula wagheni.

¹¹ “Ela mzuri angila kuzighana wagheni, kamwona mundu mumoju serwere nguo ya harusi.

¹² Naye kamuza ‘Mgheni wangu wanangilile ije aha sorwere nguo ya harusi?’ Naye kasowa lyeghora.

¹³ Nao mzuri kawauza watumishi wake ‘Mfungeni mikonu na maghulu mumkumbe shighati kizeni, na aho ujelila na kukengeresha majegho.’”

¹⁴ Jesu kamalila kwa kughora, “Ni wengi wawaliko, ela ni wachache wasaghulo.”

Ikotelo ighulu yelipa kodi

¹⁵ Nao Wafarisayo wakaghenda wakadea njama eri wamwate Jesu kwa ghore zake.

¹⁶ Nawo wakatuma wairimi wawe ngila mojori na wandu wa kigojo cha Waherodia; wakamuza, “Mwalimu tamanya wanaghoragha fulo, na wanafundisagha ngila ya Mlungu kwa hachi na sumuoghagha mundungi, kwani sutalagha ubwaa ghwa mundungi.

¹⁷ Ndamu tighorere maririkanyo ghako ado, ni hachi kulipa kodi kwa Kaisari ango ije?”

¹⁸ Ela Jesu kemanya ulaghelaghe ghwawe kuwauza, “Kudani munitimagha inyo wandu wa ngolo mbili?

¹⁹ Nionyezeni pesa yelipa kodi.” Nao wakamletela iyo pesa.

²⁰ Jesu kawauza, “Iyi fwana na ilyo izina ni lya ani?”

²¹ Wakamtumbulila, “Ni ya Kaisari.” Nao Jesu kawauza, “Mhaweni Kaisari vindu va Kaisari na Mlungu vindu va Mlungu.”

²² Nao waghenda wasikila hung'u wakakirimua, wakamsigha wakaghenda ngila zawe.

Ikotelo ighulu ya kuzuka kufuma kwa wafwa

²³ Nao lyilya ijua lyenyi, wekeja kwa Jesu Wasadukayo awa waghoragha sikuwesi kuzuka kwa wafwa, wakamkotela ikotelo,

²⁴ wekeghamba, “Mwalimu, Musa wanatiuzile ilyi mundu afwa sesighile mwana ungi, wakwawe amuse ulya muke afwililo amupatile wakwawe wana.

²⁵ Ndamu aha mzetu koluo na watawana mfungate wa mundu mumojori, wa hambiri kalola na kafwa sesighile mwana ungi.

²⁶ Nao agha ghakadeika ukwenyi kwa wakwawe wa kaili na wa katatu na hata wose mfungate.

²⁷ Nao nyuma ya ghose ulya muke kafwa.

²⁸ Ndamu kele kuzuka, ulya muke ujekala wani? Kwani wose wemusile.”

²⁹ Jesu kawatumbulila, “Mwakosa inyo, kwa kukala simutambukilo ni Mawandiko gha Kuela ango ndighi za Mlungu.

³⁰ Kwani kele kuzuka siwelolagha agho siweusogho, ela wekalagha sa wana malaika wa mlunguni.

³¹ Na kwa undu ghwa kuzuka kwa wafwa. Ado simushomile selyi muuzilo ni Mlungu.

³² Imi nimi Mlungu wa Abrahamu, Mlungu wa Isaki na Mlungu wa Jakobo. Iye si Mlungu wa wafwile, ela wa weo moyo.”

³³ Nao makoghano waghenda wasikila, wakashiniso ni mafundiso ghake.

Mlomu mbwaa

³⁴ Nao Wafarisayo waghenda kusikila kamba, Jesu wawanyamaza Wasadukayo, wakakoghana;

³⁵ na mumoju wawe eluo mwalimu wa Sheria keja kamtima Jesu kwa kumkotela.

³⁶ “Mwalimu, Ni mlomu muni ghuo mubwaa kele Sheria?”

³⁷ Jesu kamtumbulila, “‘Umshaye Bwana Mlungu wako kwa ngolo yako yose na kwa roho yako yose na kwa akili zako zose.’

³⁸ Ughu nigho mlomu mubwaa na ghwa hambiri.

³⁹ Na ghwa kaili ghwanafwanane nagho, ‘Umushaye mumbenyu selyi kwenyi ukushaile uwe mwenyi.’

⁴⁰ Kele milomu iyi mili Sheria yose ya Musa na mafundiso gha wana tondolo ghamanga.”

Ikotelo ighulu ya Masihi

⁴¹ Nao ilyi Wafarisayo wekoghane ngila mojori, Jesu kawakotela,

⁴² “Mririkanya ije, ighulu ya Masihi? Ni mwana wani?” Wakamtumbulila, “Ni mwana wa Daudi”

⁴³ Jesu kawakotela, “Ndamu, kudani Daudi kwa ndighi za Roho amwita Bwana? Kwani oghorire,

⁴⁴ ‘Bwana omuzile Bwana wangu: kala kitembo kele mkonu ghwangu ghwa kijo. Hata niwaike wamaiza wako isi ya maghulu ghako.’”

⁴⁵ “Ndamu ikakala Daudi wamwita, ‘Bwana,’ Ukalagha ije mwana wake?”

⁴⁶ Na sikwesi mundungi adimile kumtumbulila Jesu ilagho lyingi, hata kufuma lyilya ijua sikwesi mundungi adimile kumkotela makotelo ghengi sena.