Matayo 21 - UVORO GHWALOLI KWA WANDU WOSE

Jesu kungila Jerusalemu na izumo

¹ Nao Jesu na wairimi wake wafika avui na Jerusalemu, na wafika Bethfage kele mghondi ghwa Mizeituni, Jesu katuma waili na wairimi wake,

² kewauza, “Ghendeni kele muzi ghuo hambiri yenyu na aoenyi mjeona punda afungilo na mwana wa punda, mfunguleni muniletele.

³ Na ilyi mundungi amukotela, muzeni, ‘Bwana wanawashaile,’ naye ujemusigha muwalete.”

⁴ Agha ghanadeike eri ghakatile malagho ghaghoriro ni tondolo:

⁵ “Wauzeni wandu wa Zioni, Loleni mzuri wenyu odemujila! Ni wa mbole na wajoka ighulu ya punda na ighulu ya mwana wa punda.”

⁶ Nao walye wairimi wakaghenda wakadea selyi wauzilo ni Jesu.

⁷ Wakamleta punda na mwana wa punda, wakawala nguo zawe ighulu yake, naye kajoka kakala ighulu yake.

⁸ Makoghano mabwaa wakawala nguo zawe ngileni na wamoju wakatema manyasi gha miti wakawala ngileni.

⁹ Nao walye makoghano wekayaye na walye weluo wekeirima nyuma wakakema, “Hosana Mwana wa Daudi! Wabarikio uyu ekujagha kwa izina lya Bwana, Hosana ya ighulu!”

¹⁰ Nao Jesu angila Jerusalemu, muzi ghose ghukanyavurika wekeghora, “Nani uyu?”

¹¹ Makoghano wakaghora, “Uyu ni tondolo Jesu kufuma Nazareti ya Galilaya.”

Jesu kungila Hekaluni

¹² Nao Jesu kangila kele Hekalu ya Mlungu na kuwagusa wandu weluo weketagha na kughula vindu Hekaluni. Kaghalula meza za waghaluli pesa na vifumbi va wataghi maringo.

¹³ Kawauza, “Yanawandiko, ‘Nyumba yangu ijeito nyumba yelomba;’ ela inyo mwaidea kukala mbanga ya wavekuri.”

¹⁴ Nao vifondo na washoghori wakamjila Hekaluni, naye kawaboesa.

¹⁵ Ela wakohani wabwaa na Walimu wa Sheria waghenda waona selyi eluo kedea mwakilimbita na wanake wekekema Hekaluni, “Hosana Mwana wa Daudi!” Wakawasilo.

¹⁶ Wakamuza Jesu, “Sena usikilagha selyi weghoragha?” Naye Jesu kawatumbulila, “Ee, nasikila, Ado simushomile agha mawandiko? ‘Kwa milomu ya wanake na awa wemamagha wadea niliko putu.’”

¹⁷ Nao kafuma kaghenda shighati ya muzi hata Bethania, kalala alye.

Jesu kughuwanyiza mtini

¹⁸ Na ilyo ikesho ilyi Jesu eluo keuya kele muzi, oshahilo ni njala.

¹⁹ Naye aona mwiti ghuitogho mtini kavui na ngila kaghughendela, naye sadokile kindu chingi sala manyasi ghenyi. Kaghuuza, “Swavale mavalo ghengi lyingi sena!” Nao iyo ngelo yenyi mtini ghukaoma.

²⁰ Wairimi waghenda waona, wakashinika, wakaghora, “Kudani mtini ghwaoma iyo shwa yenyi?”

²¹ Jesu kawatumbulila, “Fulo namuza, ikakala muo na idumusi na simweo na ngera, mudeagha, si selyi kwadeo kwa mtini tu, ela hata mukaghuuza ughu mghondi, ‘Kuka na ukumbike baharini,’ ghukukagha.

²² Na icho chose mulombagha mjepata mukakala na idumusi.”

Ikotelo ighulu ya ndighi za Jesu

²³ Nao Jesu angila Hekaluni, wakohani wabwaa na waghosi wa wandu wakamjila ngelo eluo kefundisa, wakamuza. “Ni kwa ndighi muni udeagha malagho agho? Nani akuhawile hachi ii.”

²⁴ Jesu kawatumbulila, “Namose nimukotelagha ikotelo; na ilyi mwanitumbulila, namose nijemtumbulila ni kwa ndighi muni nideagha malagho agha.

²⁵ Ubatizo gha Johana ghwanafumile hiyo? Kwa Mlungu ango kwa wandu?” Nao wakahelea wenyi na wenyi, “Tikaghora, ‘Ghwanafumile kwa Mlungu.’ Utiuzagha ‘Kudani simodumuse?’

²⁶ Ela ilyi taghora, ‘Ghwanafumile kwa wandu,’ tioghagha makoghano kwani wose wanadumuse kamba Johana oluo tondolo.”

²⁷ Nao wakamtumbulila Jesu, “Sitimanyile.” Naye kawauza, “Namose simughoreragha ni kwa hachi muni nadea agha.

Ikataniso lya wana waili

²⁸ “Ndamu muonagha ije? Mundu mumoju woluo na wana waili; kamghendela mwana wa hambiri kamuza, ‘Mwanwangu, ghenda udee kazi kele mbuwa ya mizabibu lelo.’

²⁹ Naye kamuza, ‘Nalegha’, ela konyuma kariha kaghenda.

³⁰ Nao tatie kamghendela mwana wa kaili, kamuza sa ulya wa hambiri, naye kamtumbulila, ‘Ee, aba nighendagha,’ ela saghendile.

³¹ Nani kele walye waili adeile mashayo gha tatie?” Wakatumbulila, “Wa hambiri.” Jesu kawauza “Fulo ndemuza, wafunyi kodi na vijimbo wengilagha kele Uzuri ghwa Mlungu hambiri yenyu.

³² Kwani Johana wanamjilile kwa ngila ya hachi na simudumuse, ela wafunyi kodi na vijimbo wakamudumusa. Hata mughenda muona hung'u simurihire na kumdumusa.”

Ikataniso lya walimi mbuwa ya mizabibu

³³ Nao Jesu kaghora, “Sikizileni ikataniso izima. Mundu mumoju wa mbuwa owandile mbuwa ya mizabibu, kairigha isanzu yose. Na kakota kina chekama divei na kuwaghala ulingo. Nao kaihawana kwa walimi, katamba.

³⁴ Nao ngelo ya mavalo ifika, katuma watumishi wake kwa walimi kuusa ifungu lyake lya mavalo.

³⁵ Walye walimi wakawawata walye watumishi, wakamkwita mumoju, wakamulagha mzima na mumoju wakamlasa na mawe.

³⁶ Nao sena katuma watumishi wazima wengi kuchumba walye wa hambiri, na walye walimi wakawadea ukwenyi.

³⁷ Nao kudua kamtuma mwana wake kwawe, keghamba, ‘Wemhawagha ishima mwana wangu.’

³⁸ Ela walimi waghenda wamona mwana wake wakaghora wenyi na wenyi, ‘Uyu niye mundu wa ufwa. Ndokoni timuulaghe ufwa ghukale ghwetu.’

³⁹ Kwa hung'u wakamwata wakamfunya shighati ya mbuwa ya mizabibu, wakamulagha.

⁴⁰ Ndamu ilyi ulya mundu wa mbuwa ya mizabibu eja uwadeagha ije walye walimi?”

⁴¹ Nawo wakamtumbulila, “Ujewaulagha walye walimi walaghelaghe na awahawe walimi wazima ilya mbuwa ya mizabibu wedimagha kumuhawa mavalo gha mizabibu kwa vilimo vake.”

⁴² Jesu kawauza, “Ado simushomile Mawandiko gha Kuela gheghoragha: ‘Iwe lyileghilo ni wawaghali Lyakala iwe ibwaa lya msingi. Agha ghadeo ni Bwana, Nagho ghakala gha mashiniko mesoni kwetu.’

⁴³ “Kwa hung'u nendemuza, Uzuri ghwa Mlungu ghufunyogho kwenyu ghuhawo mbari nzima zivalagha mavalo. [

⁴⁴ Naye egwilagha iwe ilyo ujevunjika vindi vindi; na lyikamgwila mundungi lyijemkindihisa.]”

⁴⁵ Nao wakohani wabwaa na Wafarisayo waghenda wasikila makataniso ghake wakamanya kamba woluo keghora ighulu yawe.

⁴⁶ Kwa hung'u wakahada ngila ya kumwata, ela wakawaogha makoghano, kwa kukala wemumanyile kamba ni tondolo.