Matayo 19 - UVORO GHWALOLI KWA WANDU WOSE

Jesu kufundisa ighulu ya kuleghana

¹ Nao Jesu aghenda amalila kughora agha, kafuma Galilaya kaghenda Judea chambuko cha Jordani.

² Na makoghano mabwaa ghakamwirima na anyalye kawaboesa.

³ Nao Wafarisayo wamoju wakamjila wekemtima kwa kumkotela, “Ni karakara na Sheria mundu kumulegha mkwake kwa chausa icho chose?”

⁴ Jesu kawatumbulila, “Ado simushomile kamba kufuma kudyowa uyu aumbile wanaumbile mlume na muke?

⁵ Na Mlungu kaghora, ‘Kwa hung'u mundu umusighagha tatie na mee na kuwatana na mkwake na awa waili wejekala muli ghumojori.’

⁶ Na kwa hung'u siwekalagha waili sena, ela muli ghumojori. Kwa hung'u ichi chiwataniso ni Mlungu, mdamu sachitaghanye.”

⁷ Wafarisayo wakamkotela, “Kudani ndamu Musa aghorire mundu amuhawe muke wake barua ya kumlegha, ima amuleghe?”

⁸ Jesu kawauza, “Kwa kukala ngolo zenyu zanakulile niko Musa kamudumusila kulegha wake wenyu. Ela kufuma kudyowa sikoluo hung'u.

⁹ Nemi namuza uyo wose emuleghagha mkwake na kulola mzima sala kwa kuzinga wamalila kuzinga.”

¹⁰ Wairimi wake wakamuza, “Ikakala ni hung'u kwa mundu na mkwake, siifweni kulola.”

¹¹ Ela Jesu katumbulila “Si walume wose wedimagha kuwata ifundiso ilyi sala walye wasaghulo ni Mlungu.

¹² Kwani kuwo wandu wavelo siwedimagha kulola, na wadeilo ni wandu siwalole, na walye siwelolagha kwa undu ghwa Uzuri ghwa mlunguni. Uyu edimagha kuwata agha awate.”

Jesu kuwabariki wanake wachache

¹³ Nao wandu wamoju wakamuletela Jesu wanake kamba awaikilile mikonu na kuwalombela, ela wairimi wakawakemela.

¹⁴ Ela Jesu kaghora, “Sigheni wanake weje kwangu simwawaime, kwani Uzuri ghwa Mlungu ni ghwa wandu sa awa.”

¹⁵ Naye kawaikilila mikonu nao kaghenda ngila zake.

Mzuri eluo mundu wa irika

¹⁶ Nao ijua imoju, mundu mumoju kamjila Jesu keghamba, “Mwalimu, ni ghore muni zaloli nideagha eri nipate umana ghwa kale na kale?”

¹⁷ Jesu kamuza, “Kudani unikotelagha ighulu ya uloli? Kuwo na mumojori waloli. Ilyi washaya kungila kele umana wata milomu.”

¹⁸ Ulya mundu kamuza, “Milomu muni?” Jesu kamuza, “Swaulaghe, Swazinge, Swaiwe, Swamzighirire mumbenyu kwa ndimi.

¹⁹ Mhawe ishima tatio na meo na umshaye mumbenyu sa uwe mwenyi.”

²⁰ Ulya mundu wa irika kamtumbulila, “Agha ghose naghawata kufuma unake ghwangu, ndamu nini nasowa?”

²¹ Jesu kamuza, “Ilyi washaya kukala kirani kamare, ghenda utaghe vose uwo navo, uwahawe wakiwa, newe ujekala na mali mlunguni, nao ima uje uniirime.”

²² Nao ulya mundu wa irika aghenda asikila agha kaghenda ngila zake afuruse, kwani oluo na mali nyingi.

²³ Nao Jesu kawauza wairimi wake, “Fulo namuza lyanakulile kwa mundu wa mali kungila kele Uzuri ghwa mlunguni.

²⁴ Sena nendeghora, Kwanawanguwe kwa ngamila kungila kele ilanga lya sinzano kuchumba kwa mzuri kungila kele Uzuri ghwa Mlungu.”

²⁵ Nao wairimi wasikila hung'u wakashinika na ndighi wakaghora, “Ndamu nani edimagha kukila?”

²⁶ Ela Jesu kawazighana na kawauza, “Kwa mdamu agha sighedimikagha, ela kwa Mlungu agha ghose ghadimika.”

²⁷ Nao Petro katumbulila, “Zighana tanasighile vindu vose na tikakuirima. Ndamu nini tipatagha?”

²⁸ Jesu kawauza, “Fulo namuza, kele urumengu mwishi ngelo Mwana wa Mdamu ekalilagha kifumbi chake cha nguma, inyo mwoluo mkeirimana nemi, nanyose mjekala kele vifumbi ikumi na vili va uzuri, mtaghanye mbari ikumi na mbili za Israeli.

²⁹ Na uwo wose asighile nyumba ango wana wakwawe wa walume ango wana wakwawe wa wake ango tatie ango mee ango wana ango mbuwa kwa undu ghwangu, ujepata mandu ighana na angile kele umana ghwa kale na kale.

³⁰ Ela wengi weo wa hambiri wejekala wa nyuma, na wa nyuma wejekala wa hambiri.