Matayo 17 - UVORO GHWALOLI KWA WANDU WOSE

Jesu kughaluka fwana

¹ Nao nyuma ya majua matandatu, Jesu kawatwala wana Petro na Jakobo na Johana wakwawe kajokanya nao wo wenyi kele mghondi mlele.

² Nao Jesu kaghaluka fwana hambiri yawe: ushu ghwake ghukang'ala sa ijua na nguo zikauya za mnyange sa mlangazi.

³ Nao aoenyi wakaonekana Musa na Elija wekehelea na Jesu.

⁴ Nao Petro kamuza Jesu, “Bwana, ni kirani tikale anyaha; ilyi washaya niwaghalagha vianda vitatu, kimoju chako na kimoju cha Musa na kimoju cha Elija.”

⁵ Nao ilyi eluo keghora, iwengu lya mnyange lyikawabula na lwaka lukafuma kele iwengu lukeghamba, “Uyu ni Mwana wangu nimshaile niboelogho niye, msikileni!”

⁶ Nao wairimi waghenda wasikila hung'u, wakagwa hubu kwa kungilo ni wogha.

⁷ Ela Jesu keja kawawata keghora, “Ukeni simwadee wogha.”

⁸ Nawo waghenda wanula meso ghawe siwaonile mundungi sala Jesu mwenyi.

⁹ Nao ilyi weluo wekejika mghondini, Jesu kawakanya, “Simwamughorere mundungi agha mwaona, hata Mwana wa Mdamu azuso kufuma kwa wafwa.”

¹⁰ Nao wairimi wakamkotela Jesu, “Ndamu kudani Walimu wa Sheria waghoragha kamba Elija udyowagha eje?”

¹¹ Jesu kawatumbulila, “Fulo Elija ukujagha na akatise vindu vose.

¹² Ela namuza kamba Elija wanamalile kuja na siwamtambule, nawo wanamdeile selyi weshaile. Na ni hung'u kwenyi Mwana wa Mdamu utirirogho mikonuni kwawe.”

¹³ Nao wairimi wakatambula kamba oluo keghora ighulu ya Johana Mubatizi.

Jesu kuboesa mwanake eluo na pepo

¹⁴ Nao waghenda wauya kwa makoghano, mundu mumoju kamghendela Jesu, kamdyaila ngokoro,

¹⁵ kemuza, “Bwana, mfwile mwanwangu waya, kwani uwo na ukongo ghwa vigwa na wasirima na ndighi. Kengi wagwa motoni na kaenga mejini.

¹⁶ Nemi nemletile kwa wairimi wako, nawo siwadimile kumuboesa.”

¹⁷ Jesu katumbulila, “Inyo kivali chelaghaya na sichedumusagha! Nikalanyagha nenyo hata nini? Nirumaghianyagha nenyo hata nini? Mleteni kwangu.”

¹⁸ Na Jesu kaikemela ilya pepo na pepo ikamufuma ulya mwanake, naye kaboa iyo ngelo yenyi.

¹⁹ Nao wairimi wakamghendela Jesu ewo andu kwa kiviso, na kumuza, “Kudani sitedimile kuigusa pepo?”

²⁰ Jesu kawatumbulila, “Ni kwa kukala idumusi lyenyu ni ichache, Fulo kwenyi namuza, ngera moluo na idumusi ichache lyikatane na ndembe ya haradali, macho mwauza ughu mghondi, ‘Uka aha ughende alye,’ nagho ghuukagha ghughende; na sikokalagha na undu ghungi simwodimagha kudea. [

²¹ Ela mbari iyi ya pepo siifumagha sala kwa kulomba na kufunga.]”

Jesu kuhelea sena ighulu ya kifwa chake

²² Nao ilyi wekoghanike Galilaya, Jesu kawauza, “Mwana wa Mdamu ujefunyo kwa wandu,

²³ nawo wejemulagha na ijua lya katatu ujezuso.” Nao wairimi wakahariso ni ngolo.

Kulipa kodi ya Hekalu

²⁴ Nao waghenda wafika Kapernaumu, Wafunyi Kodi ya Hekalu wakamjila Petro wakamuza, “Ado mwalimu wenyu wanalipagha kodi ya hekalu?”

²⁵ Petro katumbulila, “Ee, wanalipagha.” Nao afika nyumba, Jesu kahelea na Petro jako kemuza, “Uririkanyagha ije Simoni? Wazuri wa urumenguni wanafunyagha ushuru ango kodi kwa wana ani? Kufuma kwa wana wawe ango kwa wandu wazima?”

²⁶ Petro katumbulila “Kufuma kwa wandu wazima.” Jesu kamuza, “Kwa hung'u wana siwafunyagha.

²⁷ Ela eri sitawakwalise, ghenda baharini, ukumbe ndoana, uwate ikumba lya hambiri, na ulyifungule mlomu ghwake, nawe ujeona pesa; uwahawe kwa undu ghwako nemi.”