Matayo 16 - UVORO GHWALOLI KWA WANDU WOSE

Wandu kushaya mwakilimbita

¹ Nao Wafarisayo na Wasadukayo wakamghendela Jesu wekeshaya kumtegha, wakamlomba adee mwakilimbita kufuma mlunguni.

² Ela Jesu kawatumbulila, “Ngelo ya hafukeni mwanaghoragha, ‘kukalagha kuelile kwa kukala mlunguni kwakusua.’

³ Na naikesho kiro mwanaghambagha, ‘kukalagha laghelaghe lelo, kwani maengu ghadunguluwa.’ Inyo mwanaweni kutambula ghekalagha kwa kuzighana mlunguni, ela simutambulagha alama za izi ngelo.

⁴ Kivali cha ulaghelaghe na sichedumusagha chalomba mwakilimbita, ela sichihawogho mwakilimbita ungi sala mwakilimbita wa Jona.” Nao kawasigha kaghenda ngila zake.

Chachu ya Wafarisayo na Wasadukayo

⁵ Nao Wairimi wake wawambuka chambuko weluwale kutwala mikate.

⁶ Jesu kawauza, “Manyeni na mukulinde na chachu ya Wafarisayo na Wasadukayo.”

⁷ Wakadyowa kuhelea wenyi kwa wenyi wekeghamba, “Ni kwa kukala sititute mikate.”

⁸ Ela Jesu kemanya agha; kaghora, “Inyo wandu wa idumusi ichache kudani muheleagha gha kusowa mikate?

⁹ Ado simutambukilogho? Ado simukumbukagha gha mikate misanu kwa wandu elfu sanu? Mwanajuze vikapu vilinga va misusure?

¹⁰ Ango mikate mfungate kwa wandu elfu ine, mwanajuze vikapu vilinga va misusure?

¹¹ Kudani simotambukilogho kamba seluo nikeghora ighulu ya mikate? Kulindeni na chachu ya Wafarisayo na Wasadukayo.”

¹² Nao wairimi wakatambukilo kamba seluo kewauza wakulinde na chachu ya mikate, ela na mafundiso gha Wafarisayo na Wasadukayo.

Petro kumghora Jesu kukala ni Masihi

¹³ Nao Jesu afika isanga lya Kaisari Filipo, kawakotela wairimi wake, “Wandu wanaghoragha Mwana wa Mdamu nani?”

¹⁴ Nawo wakamtumbulila, “Wamoju waghora ni Johana Mubatizi, wamoju Elija na wamoju Jeremia ango mumoju wa wana tondolo.”

¹⁵ Naye kawauza, “Nenyo mwanaghoragha nimi ani?”

¹⁶ Simoni Petro katumbulila, “Uwe nuwe Masihi Mwana wa Mlungu ewo moyo.”

¹⁷ Nao Jesu kamtumbulila, “Baha uwe Simoni wa Johana! Kwani si mdamu ungi akumanyisa agha, sala Aba ewo mlunguni.

¹⁸ Nemi nakuza, uwe Petro: nuwe iwe, na kele iwe ilyi nijewaghala ikanisa lyangu na hata ndighi za kifwa sizidimagha kulyisima.

¹⁹ Nijekuhawa mifungulo ya uzuri ghwa mlunguni na icho chose ujechifungila urumenguni chijefungilo mlunguni na icho chose ujechifungula urumenguni chijefungulo mlunguni.”

²⁰ Nao Jesu kawakanyila wairimi wake, siwamghorere mundungi kamba iye ni Masihi.

Jesu kughora ighulu ya masirimi ghake na kifwa chake

²¹ Nao kufuma ilya ngelo Jesu kadyowa kuwaghorera wairimi wake mwazi kamba ni suti aghende Jerusalemu, na asirimiso na malagho mengi ni waghosi, wakohani wabwaa na Walimu wa Sheria na aulagho na ijua lya katatu azuso.

²² Nao Petro kamruta na mbali kamkemela, keghamba, “Agha ghakale kulele kwako Bwana, na lyingi sighadeike!”

²³ Ela Jesu kaghaluka kamuza Petro, “Ghenda noko Shetani! Nuwe kikwalo kwangu, kwani suririkanyagha gha Mlungu sala gha wadamu.”

²⁴ Nao Jesu kawauza wairimi wake, “Ngera mundungi ashaya kuniirima, ni suti akukane iye mwenyi na atuke msalaba ghwake na aniirime.

²⁵ Kwani uwo wose ashaile kukiza umana ghwake ughulaghazagha na uwo wose elaghazagha umana ghwake kwa undu ghwangu ughupatagha.

²⁶ Kwani mundu upatagha faida muni ilyi apata urumengu ghose na kuhaitisa umana ghwake? Ango mundu ufunyagha kimuni kibalo cha umana ghwake?

²⁷ Kwani Mwana wa Mdamu ukujagha na wana malaika wake kele ubwaa ghwa Tatie, naye ujemlipa kila mundu kwa madeo ghake.

²⁸ Fulo namuza, kuo wamoju weo kimusi aha siwefwighagha hata wamwone Mwana wa Mdamu keja kele Uzuri ghwake.”