Matayo 15 - UVORO GHWALOLI KWA WANDU WOSE

Mirighido ya wana ake

¹ Nao Wafarisayo na Walimu wa Sheria wakamjila Jesu kufuma Jerusalemu na wakamkotela,

² “Kudani wairimi wako wavunjagha mirighido ya wana ake? Kwani siwaogheshagha mikonu wekelya.”

³ Jesu kawatumbulila, “Kudani inyo muvunjagha milomu ya Mlungu kwa undu ghwa mirighido yenyu?

⁴ Kwani Mlungu wanaghorire, ‘Umhawe ishima tatio na meo na uyu eghoragha laghelaghe ighulu ya tatie na mee yanamufweni kufwa.’

⁵ Ela inyo mwafundisa, Ilyi mundu amuza tatie ango mee, ‘Ichi oluo upate kwangu namhawa Mlungu.’

⁶ Nao ati semuhawagha tatie ishima! Kwa hung'u mwahakila milomu ya Mlungu kwa kuirima ada zenyu.

⁷ Inyo wandu wa ngolo mbili. Ado Isaya satondole karakara ighulu yenyu keghamba:

⁸ ‘Wandu awa wanihawa ishima na mlomu, waghora Mlungu, ela ngolo zawe zio kulele nemi.

⁹ Wanitasa bule, kwa kukala wafundisa mafundiso gha wandu sa kuzo ni Sheria zangu.’”

Malagho ghamuluisagha mundu

¹⁰ Nao Jesu kawapang'a wandu na kuwauza, “Sikizileni na mtambule!

¹¹ Si ichi chingi chingilagha na mlomu chimdeagha mundu kuluwa, sala ni ichi chifumagha mlomuni, nicho chimdeagha kuluwa.”

¹² Nao wairimi wekeja wakamuza, “Ela wamanya kamba Wafarisayo wawasilo ni agha malagho ghako waghora?”

¹³ Jesu kawatumbulila, “Kila mwiti sighowandilo ni Aba wa mlunguni ghukulogho.

¹⁴ Wasigheni, kwani ni vilongozi vifondo. Na kifondo kamlongoza kifondo mumbawe, wose waili wepotokagha kineni.”

¹⁵ Ela Petro kamuza, “Tighorere kutambula kwa ilyi ikataniso.”

¹⁶ Jesu kawauza, “Ado nanyose simutambukilogho?

¹⁷ Ado simumanyagha kamba icho chimungilagha mundu chanangilagha kifu na kufuma kele muli.

¹⁸ Ela ichi chifumagha mlomuni chanafumagha ngoloni na ichi nicho chimuluisagha mundu.

¹⁹ Kwani ngoloni niko kufumagha maririkanyo ghawase, uulaghi, uzingi, uting'a, ndimi na matukano.

²⁰ Agha nigho ghamuluisagha mundu. Ela kulya na mikonu siyewoghesho siimuluwisagha mundungi.”

Idumusi lya muke

²¹ Nao Jesu kafuma alye kaghenda gasi ya Tiro na Sidoni.

²² Nao muke mumoju Mkanaani wa alye kamjila kemlilila, “Ee Bwana, Mwana wa Daudi unifwile waya! Mchana wangu uwo na pepo.”

²³ Ela Jesu samutumbulile kindu chingi. Wairimi wake wakamjila wakamuza, “Muze aghende kwani ondetiirima kelila.”

²⁴ Jesu katumbulila, “Imi nanatumilo kwa wandu wahaite wa Israeli tu.”

²⁵ Ela ulya muke keja kamdyaila ngokoro kemuza, “Bwana niwarure.”

²⁶ Jesu kamutumbulila, “Si kirani kungi kuusa chakulya cha wana na kuchikumbila chuchu.”

²⁷ Naye kamtumbulila, “Ni fulo Bwana, ela hata chuchu zanalyighagha misusure ipotokagha kele meza ya bwana wawe.”

²⁸ Nao Jesu kamtumbulila, “Uwe nuwe muke ewo na idumusi ibwaa, deilo selyi ushaile.” Nao mchana wake kaboa iyo ngelo yenyi.

Jesu kuboesa wandu wengi

²⁹ Nao Jesu kafuma alye na kaghenda mbalimbali ya bahari ya Galilaya. Nao kajoka mghondini, kakala kitembo.

³⁰ Makoghano mabwaa ghakamjila, wekemuletela washoghori vifondo, siwedimagha kughenda, bubu na wazima wengi weluo wakongo wakawaika maghuluni kwa Jesu, naye kawaboesa wose.

³¹ Makoghano wakashinika waona bubu wekeghora, siwedima kughenda waboa, washoghori wekeghenda na vifondo wekeona. Nao wakamlika Mlungu wa Israeli.

Jesu kulyisa walume elfu ine

³² Nao Jesu kawapang'a wairimi wake kawauza, “Nendewafwila waya makoghano, kwa kukala wakalanya nemi majua matatu siwelyile kindu chingi na sishaile niwagalise njala siwejewato ni msare ngileni.”

³³ Nao wairimi wakamuza, “Tipatilagha hiyo mikate aha kireti yelyisa makoghano mabwaa sa agha?”

³⁴ Nao Jesu kawakotela, “Muo na mikate milinga?” Wakatumbulila, “Mfungate na makumba machache.”

³⁵ Nao Jesu kawauza makoghano wakale kitembo msangeni.

³⁶ Kausa ilya mikate mfungate na makumba, kamufunyila Mlungu asanta, kaivunja, na kawahawa wairimi, na wairimi wakawahawa makoghano.

³⁷ Nawo wose wakalya wakaghuta. Nao wairimi wakashowa misusure yehangalike wakajuza vikapu mfungate.

³⁸ Nawo wandu walyile weluo walume elfu ine sikweo kutala wake na wanake.

³⁹ Nao Jesu kalaga wandu, kajoka kele mashua kaghenda isanga lya Magadani.