Matayo 14 - UVORO GHWALOLI KWA WANDU WOSE

Kufwa kwa Johana Mubatizi

¹ Nao ilya ngelo Mzuri Herode wa Galilaya kasikila uvoro ghwa Jesu;

² naye kawauza watumishi wake, “Uyu ni Johana Mubatizi azuka kufuma kwa wafwa; na kwa hung'u uwo na ndighi zedea wana mwakilimbita.”

³ Kwani Herode omwatile Johana kamufunga na minyororo na kumungiza kifungoni kwa undu ghwa Herodia mke wa Filipo wakwawe.

⁴ Johana Mubatizi omuzile, “Si kuirimana na sheria kumuusa.”

⁵ Naye Herode oshaile kumuulagha, ela kaogha wandu, kwa kukala weluo wamwona Johana kukala ni tondolo.

⁶ Ela kele ijua lya kuvalo Herode, mchana wa Herodia keja kavina hambiri ya wandu, na Herode kaboelo,

⁷ hata kamughemela kamuza kamba umuhawagha icho chose elombagha.

⁸ Naye kwa kufundo ni mee kalomba, “Nihawe chongo cha Johana Mubatizi kele bakuli.”

⁹ Nao Mzuri kawasilo; ela kwa kukala olagile hambiri ya wagheni wake, kaghora ahawo.

¹⁰ Nao katumana Johana apaso chongo kifungoni.

¹¹ Na chikaleto na bakuli chikahawo ulya mchana, naye kamughenzela mee.

¹² Wairimi wa Johana wekeja wakausa muli ghwake wakaghuzika. Nao wakaghenda wakamghorera Jesu.

Jesu kulyisa walume elfu sanu

¹³ Nao Jesu aghenda asikila hung'u, kafuma alye kwa mashua, kaghenda andu kwa chanya. Ela makoghano waghenda wasikila wakamwirima kwa maghulu kufuma kele ilya mizi.

¹⁴ Naye Jesu aghenda aselela pwani kaona ikoghano ibwaa, kawafwila waya kawaboesela wakongo wawe.

¹⁵ Nao luma lwa hafukeni, wairimi wake wakamjila wakamuza, “Aha ni andu kwa chanya na ndamu kwaswa wauze makoghano waghende mizi mizi wakughulile chakulya.”

¹⁶ Jesu kawauza, “Siiwafweni waghende kungi, wahaweni chakulya walye.”

¹⁷ Nawo wakamuza, “Tio na mikate misanu tu na makumba maili.”

¹⁸ Nao Jesu kawauza, “Ileteni aha kwangu.”

¹⁹ Nao kaghora makoghano wakale kitembo kele nyasi. Nao ima kaiwata mikate misanu na makumba maili, kalola mlunguni, kavibarikia, kavunja na kuwahawa wairimi wake, nawo wairimi wakawahawa makoghano.

²⁰ Nawo wakalya wose wakaghuta. Nao wairimi wakashowa vikapu ikumi na vili va misusure ya mikate ihangalike.

²¹ Na walye walyile weluo walume elfu sanu, wake na wanake siwetalilo.

Jesu kughenda ighulu ya meji

²² Nao Jesu kawauza wairimi wangile kele mashua wakayaye kuwambuka chambuko cha bahari, naye kasigho kelagana na makoghano.

²³ Na nyuma ya kulagana na makoghano, kajoka mghondini keng'ori kulomba. Nao nahafukeni Jesu oluo alye ekeng'weri,

²⁴ na iyo ngelo ilya mashua yeluo yafika ghati ya bahari, nayo yeluo ikesukosuko ni mawimbi gha bahari, kwa kukala mbeo yeluo ikekwita gasi yake.

²⁵ Nao ifika kavui na kuela, Jesu keja kwa wairimi keghenda ighulu ya meji.

²⁶ Nao wairimi wamwona keghenda ighulu ya bahari, wakangilo ni wogha wakaghora, “Ni kisuga!” Nawo wakakema eri wawaruro.

²⁷ Ela iyo ngelo yenyi Jesu kaghoranya nawo, “Kaleni mang'oni! Nimi mwenyi simwadee wogha.”

²⁸ Nao Petro kamutumbulila, “Bwana, ngera nuwe, nuze nije kwako ighulu ya meji.”

²⁹ Jesu kamuza, “Njuu.” Nao aho Petro kafuma kele mashua kadyowa kughenda kwa Jesu ighulu ya meji.

³⁰ Ela aghenda aona mbeo kaogha, na adyowa kumalika, kakema, “Bwana nikize.”

³¹ Nao iyo ngelo yenyi Jesu kaghorora mkonu ghwake kamwata, kemuza, “Mundu wa idumusi ichache, kudani wakala na ngera.”

³² Nao wangila kele mashua, mbeo ikanyamala.

³³ Na wose weluo kele mashua wakamtasa, wekeghamba, “Fulo uwe nuwe Mwana wa Mlungu.”

Jesu kuboesa wakongo wa Genesareti

³⁴ Nao waghenda wawambuka bahari, wakafika isanga lya Genesareti.

³⁵ Nao wandu waghenda wamumanya, wakatumana uvoro isanga lyilya lyose wakamletela Jesu wose weluo wakongo.

³⁶ Wakamlomba awadumusile wawate kitambi cha nguo yake na wose wawatile wakabowa.