Matayo 11 - UVORO GHWALOLI KWA WANDU WOSE

Watumo kufuma kwa Johana Mubatizi

¹ Nao Jesu amalila kughoranya na wairimi wake ikumi na waili, kafuma alye kaghenda kufundisa na kuchila kele mizi yawe.

² Nao Johana Mubatizi aghenda asikila kifungoni ghalye Kristo eluo kedea, katuma wairimi wake kwake

³ keghamba, “Ado uwe nuwe ulya ekujagha ango timudafurire mzima?”

⁴ Jesu kawatumbulila, “Ghendeni mumughorere Johana agha mwasikila na kuona:

⁵ vifondo waona, na washoghori waghenda, weo na ukoma waombochoka na nduku wasikila, na wafwile wazuka, na wakiwa wachililo ilagho lyaloli.

⁶ Na baha ulya mundu seo na ngera nemi.”

⁷ Nao ilyi wairimi wa Johana weluo wekeghenda, Jesu kadyowa kuwauza makoghano hung'u ighulu ya Johana: “Nini mwoghendile kulola kireti? Lusanu lushegheshogho ni mbeo?

⁸ Nini mughendile kulola? Mwanaghendile kumlola mundu arwere nguo zihanyue? Wandu warwaragha nguo zihanyue wanakalagha kele nyumba za wazuri.

⁹ Ndamu nini mughendile kuona? Tondolo? Ee, na fulo namuza, achumbile tondolo.

¹⁰ Uyu niye awandiko kele Mawandiko gha Kuela, ‘Lola, namtuma mtumo wangu aboese ngila yako.’

¹¹ Fulo namuza, kele awa wavelo ni wake sikuwesi ungi mubwaa kumwisa Johana Mubatizi; ela uyu ewo mchache kele Uzuri ghwa Mlungu niye ewo mubwaa kumwisa Johana.

¹² Kufuma majua gha Johana Mubatizi hata indakwenyi Uzuri ghwa mlunguni ghwasirima kushaya kupato kwa ndighi, na wandu weo na ndighi watima kughupata.

¹³ Kwani wana tondolo wose na Sheria ya Musa wanatondole hata ngelo ya Johana ighulu ya iyi ngelo,

¹⁴ na ngera mushaile kudumusa, Johana niye Elija ekujagha.

¹⁵ Uyu ewo na masikilo ghesikila, asikile.

¹⁶ “Ndamu nichifwananisagha na kimuni kivali ichi? Ni sa wanake weo kitembo sokoni wepang'anagha.

¹⁷ ‘Tanamukwitilile msherembe nenyo mukalegha kuvina, Tanashighire, nenyo mukalegha kulila.’

¹⁸ Kwani Johana wanajile kefunga kulya na kunwa wakaghamba, ‘wana pepo.’

¹⁹ Mwana wa Mdamu keja kalya na kunwa, nawo wakaghamba, ‘Mloleni mlafuki na mnarui, mgheni wa wafunyi kodi na wakaung'a.’ Kwani ulachu ghwa Mlungu ghwakala ghwa hachi kwa madeo ghake.”

Mizi wandu wake siwedumuse

²⁰ Nao Jesu kadyowa kuwanyiza wandu wa ilya mizi adeilile mwakilimbita zake nyingi, kwa kukala siwarihire.

²¹ “Bugha kwako Korazini! Bugha kwako Bethsaida! Kwani ngera wana mwakilimbita wadeilo kwenyu wedeilo Tiro na Sidoni, wandu wake mango warihire ko kale na kurwara magunia na kukuvila ivu.

²² Ela namuza, ikalagha bahabaha kwa Tiro na Sidoni ijua lya kutaghanyo kuisa inyo.

²³ Na uwe Kapernaumu ujosogho mlunguni? Ujisogho hata wazimuni. Kwani ngera wana mwakilimbita wadeilo amweni kwako wedeilo Sodomu, wandu wake mango watulagha hata lelo.

²⁴ Ela namuza, Ikalagha bahabaha kwa isanga lya Sodomu ijua lya kutaghanyo kuchumba uwe.”

Njuuni kwangu muzumuwe

²⁵ Nao ilya ngelo Jesu kaghora, “Nakufunyila asanta Aba, Bwana wa mlunguni na isanga, andu uwavisile walachu na waweni agha na kuwafunukulila wandu siwewesi elimu.

²⁶ Ee Aba, kwani niko waona kirani.

²⁷ Aba wanihawa vindu vose; na sikwesi mundungi amweni Mwana sala Aba, na sikwesi mundungi amweni Aba sala Mwana, na uwo wose Mwana emusaghulagha kumumanyisa.

²⁸ Njuuni kwangu, inyose musirimagha na kazi na muo na misigo igwaile, nemi nijemuzumuisa.

²⁹ Mukuusile mikowa yangu na mukufundise kwangu, kwani nimi wa mbole na wa ngolo yekuseleza, nenyo mujezumua rohoni kwenyu.

³⁰ Kwani mkoa ghwangu ghwanahanyuwe na musigo ghwangu ghwanawanguwe.”