Matayo 1 - UVORO GHWALOLI KWA WANDU WOSE

Kivali cha Jesu Kristo

¹ Ichi ni kivali cha Jesu Kristo, wa kivali cha Daudi, ewo wa kivali cha Abrahamu.

² Abrahamu kamvala Isaki, na Isaki kamvala Jakobo, na Jakobo kamvala Juda na wana wakwawe,

³ na Juda kamvala Perezi na Zera (mee woluo ni Tamari), na Perezi kamvala Hezroni, na Hezroni kamvala Ramu

⁴ na Ramu kamvala Aminadabu, na Aminadabu kamvala Nashoni, na Nashoni kamvala Salmoni,

⁵ na Salmoni kamvala Boazi (mee woluo ni Rahabu), na Boazi kamvala Obedi (mee woluo ni Ruthu), na Obedi kamvala Jese,

⁶ na Jese kamvala mzuri Daudi. Na Daudi kamvala Solomoni (mee woluo ni muke wa Uria),

⁷ na Solomoni kamvala Rehoboamu, na Rehoboamu kamvala Abiya, na Abiya kamvala Asa, na Asa kamvala Jehoshafati,

⁸ na Jehoshafati kamvala Joramu, na Joramu kamvala Uzia,

⁹ na Uzia kamvala Josamu, na Josamu kamvala Ahazi, na Ahazi kamvala Hezekia,

¹⁰ na Hezekia kamvala Manase, na Manase kamvala Amoni, na Amoni kamvala Josia,

¹¹ na Josia kamvala Jokonia na wana wakwawe ngelo ya kusamiso Babuloni.

¹² Nao nyuma ya kusamiso Babuloni, Jokonia kamvala Shealtieli, na Shealtieli kamvala Zerubabeli,

¹³ na Zerubabeli kamvala Abiudi, na Abiudi kamvala Eliakimu, na Eliakimu kamvala Azori,

¹⁴ na Azori kamvala Zadoko, na Zadoko kamvala Akimu, na Akimu kamvala Eliudi

¹⁵ na Eliudi kamvala Eliezeri, na Eliezeri kamvala Matani, na Matani kamvala Jakobo,

¹⁶ na Jakobo kamvala Josefu mlume wa Mariamu, mee Jesu aitogho Masihi.

¹⁷ Kwa hung'u vivali vose kufuma Abrahamu hata Daudi veluo vivali ikumi na vine, na kufuma Daudi hata kusamiso Babuloni veluo vivali ikumi na vine, na kufuma kusamiso Babuloni hata kuvalo Masihi ni vivali ikumi na vine.

Kuvalo kwa Jesu Kristo

¹⁸ Nao kuvalo kwa Jesu Kristo koluo hung'u. Ilyi Mariamu eluo kekumbo ulanga ni Josefu. Hambiri seusilo, kaoneka uwo na kifu cha Roho wa Kuela.

¹⁹ Naye Josefu uyu eluo kemusa, woluo mundu wa hachi na seshaile kungi kumfwisha waya, ela woshaile kumusigha kwa kiviso.

²⁰ Ela ilyi eluo keririkanya hung'u, Malaika wa Bwana kamjila kwa kuloteso kemuza, “Josefu wa kivali cha Daudi swaoghe kumusa Mariamu kukala mkwako, kwani kifu ewo nacho ni cha Roho wa Kuela.

²¹ Naye ujevala mwana wa kialume, nawe ujemwita izina lyake Jesu, kwani ujewakiza wandu wake na kaung'a zawe.”

²² Agha ghose ghanadeike kukatisa ghalye ghaghoriro ni Bwana kwa wana tondolo.

²³ “Loleni mchana ujengiza kifu na kuvala mwana wa kialume na izina lyake ujeito Imanueli” (kutambula kwake, “Mlungu uwo ngila mojori nesi”).

²⁴ Nao Josefu aghenda auka haring'eni kadea selyi Malaika wa Bwana amuzile, kamusa mkwake.

²⁵ Naye samumanyile kungi kimuli mpaka kavala mwana wa kialume, naye kamwita izina lyake Jesu.