Marko 9 - UVORO GHWALOLI KWA WANDU WOSE

¹ Naye Jesu kawauza, “Fulo namuza, kuwo wamoju aha siwefwighagha hata waghuone uzuri ghwa Mlungu ghukeja na ndighi mbwaa.”

Jesu kughaluka sura

² Nao nyuma ya majua matandatu, Jesu kawatwala wana Petro, Jakobo na Johana, wakajoka kele mghondi mlele wenyi; Jesu kaghalulo fwana yake hambiri yawe;

³ nguo zake zikang'alang'ala, zikauya za mnyange see, hata mndungi msangeni sedimagha kuelesa hung'o.

⁴ Nao wairimi wakawaona Elija na Musa wekeheleanya na Jesu.

⁵ Petro kamuza Jesu, “Mwalimu, ni kwaloli tio aha, tiwaghale vianda vitatu, kimoju chako, kimoju cha Musa, na kimoju cha Elija.”

⁶ Kwa kukala semanyile lyeghora, andu wongililo ni wogha mubwaa.

⁷ Nao iwengu lyikawabula na kiju chake, na lwaka lukafuma iwenguni lukeghamba, “Uyu ni mwanwangu nimshaile, msikizileni.”

⁸ Nao shwa ng'ori wezighanagha sikwesi mndungi, sala Jesu mwenyi ngila mojori nawo.

⁹ Nawo wekeselela mghondini, Jesu kawauza siwamghorere mndungi agha waghaonile, mpaka Mwana wa Mdamu azuke kufuma kwa wafwa.

¹⁰ Kwa hung'u wakaghanyamalila kima malagho agha; ela wakadyowa kukotelana wenyi nini kutambula kwa kuzuka kwa wafwa.

¹¹ Nawo wakamkotela Jesu, “Kudani walimu wa Sheria waghoragha ati ni mpaka Elija eje jako?”

¹² Naye kawatumbulila, “Fulo Elija ukujagha kuika ghose tayari. Na yanawandiko ije kwa Mwana wa Mdamu, kamba utirirogho kwa malagho mengi na kumenyo?

¹³ Ela namuza kamba Elija wanamalile kuja na wandu wakamdea selyi weshaile, kuirimana na selyi awandikilo.”

Jesu kumuboesa mtawana eluo na pepo

¹⁴ Nao waghenda wauya kwa wairimi walye wamoju, wakaona makoghano gha wandu wengi wawamara na walimu wa sheria wekedea nganyi nawo.

¹⁵ Nao makoghano waghenda wamwona Jesu, wakashinika na wakamkimbilila na kumroghowa.

¹⁶ Jesu kawakotela, “Ni kimuni mheleanyagha nawo?”

¹⁷ Nao mumoju wa wandu wa makoghano kamtumbulila, “Mwalimu, nemletile mwanwangu kwako, kwa kukala uwo na pepo imwima kughora;

¹⁸ na kila ngelo imwatagha yamgwisha na kumdea afunye mafulo na kukengeresha majegho na muli kughuluwa. Newalombile wairimi wako waiguse pepo, ela wakalemo.”

¹⁹ Nao Jesu kawatumbulila, “Inyo kivali sichewesi idumusi, nikalanyagha nenyo hata nini? Nirumaghianyagha nenyo hata nini? Mleteni kwangu.”

²⁰ Nawo wakamleta mwanake kwake. Nao pepo ighenda imwona, iyo ngelo yenyi ikamruha mwanake na kumgwisha msangeni na kabungurua kefunya mafulo na mlomu.

²¹ Nao Jesu kamkotela tatie, “Wakala nayo kufuma nini?” Naye kaghora, “Kufuma unake.

²² Na ngelo nyingi yamkumba motoni na mejini, eri kumuulagha; ela ngera udimagha kudea kindu chingi, utifwile waya na utiwarure.”

²³ Naye Jesu kamuza, “Ngera udimagha! Vindu vose vadimika kwa uyu adumusa.”

²⁴ Iyo ngelo yenyi tatie ulya mwanake kakema keghamba, “Nadumusa, niwarure kwa kusowa idumusi kwangu.”

²⁵ Naye Jesu aghenda aona makoghano wekemjila na iseghe, kaikemela pepo kaiuza, “Pepo nduku na bubu, nakuza, mfume, na swamuile sena.”

²⁶ Nao ighenda ikema na kumruha kwa ndighi, ikamfuma, na mwanake kakala sa mundu afwa, hata wandu wengi wakaghamba, “Wafwa!”

²⁷ Ela Jesu kamwata mkonu na kumnula, naye kauka.

²⁸ Nao Jesu aghenda angila nyumba, wairimi wake wakamkotela weo wenyi, “Kudani sitedimile kuigusa pepo?”

²⁹ Naye kawauza, “Iyi pepo siyidimika kugusika kwa ngila ingi, sala kwa kulomba.”

Jesu kughora ighulu ya kifwa chake sena

³⁰ Jesu na wairimi wake wafuma alye, wakamarira Galilaya. Jesu seshaile mndungi amanye andu eluo,

³¹ kwani oluo kefundisa wairimi wake kewauza, “Mwana wa Mdamu ungizogho kele mikonu ya wandu, nawo wejemuulagha; naye ilyi aulagho, ijua lya katatu ujezuka.”

³² Ela wo siwatambukilo selyi eluo keghora, nawo wakaogha kumkotela.

Nani ewo mubwaa?

³³ Wakafika Kapernaumu, nao Jesu angila nyumba, kawakotela wairimi wake, “Nini mwoluo mkehelea alye ngileni?”

³⁴ Ela siwamtumbulile, kwani ngileni weluo wekedea nganyi wenyi na wenyi nani ewo mubwaa.

³⁵ Nao Jesu kakala kitembo, kawapang'a wairimi ikumi na waili, na kuwauza, “Uyo wose ashaya kukala wa hambiri, ni suti akale wa kudua, na mtumiki wa wose.”

³⁶ Nao kamwata mwanake, kamwika ghati yawe; naye aghenda amsura, kawauza,

³⁷ “Uyo wose emhokeragha mwanake mumoju sa uyu kwa undu ghwangu imi, wanihokera imi, naye anihokera imi, wamhokera si imi ungi, ela uyu anitumile.”

Uyu seo kinyume chetu uwo nesi

³⁸ Johana kamuza, “Mwalimu, tanamwonile mundu mumoju kegusa pepo kwa izina lyako, nesi tikamwima, kwa kukala sairimanagha nesi.”

³⁹ Ela Jesu kaghora, “Simwamwime, kwani sikwesi mndungi edima kudea mwakilimbita kwa izina lyangu na sena anighore laghelaghe.

⁴⁰ Kwani uyu seo kinyume chetu uwo gasi yetu.

⁴¹ Fulo namuza, uyo wose emhawagha kikombe cha meji chenwa kwa kukala inyo ninyo wandu wangu imi Kristo, naese upatagha manosi ghake.

Kutimo eri kukosa

⁴² “Uyo wose emdeagha mumoju wa wanake wachache awa wanidumusa kugwa kele idumusi, yamfweni kufungo na lwala lwesha singo na kukumbo baharini.

⁴³ Na ngera mkonu ghwako ghwakushekerera kugwa kele idumusi, ghupase; andu ni baha kwako kungila kele umana uwo na mkonu ghumojori, kuchumba kukala na mikonu mili na kungila kele Jehanamu, andu moto ghwake sighozimagha. [

⁴⁴ Aho vivunyu vake sivifwighagha, na moto sighuzimagha.]

⁴⁵ Na ngera kighulu chako chakushekerera kugwa kele idumusi, chipase; andu ni baha kwako kungila kele umana mshoghori, kuchumba kukala na maghulu maili na kukumbo kele Jehanamu. [

⁴⁶ Aho vivunyu vake sivifwighagha na moto sighuzimagha.]

⁴⁷ Na ngera iziso lyako lyakushekerera kugwa kele idumusi, lyikule; andu ni baha kwako kungila kele uzuri ghwa Mlungu kifondo, kuchumba kukala na meso maili na kukumbo kele Jehanamu.

⁴⁸ Aho vivunyu vake sivifwighagha na moto sighuzimagha.

⁴⁹ “Kwa kukala kila mundu ujeeleso na moto selyi kila sadaka ielesogho na kisherere.

⁵⁰ Kisherere ni chaloli; ela kisherere ilyi chasowa kusinga kwake, chideogho ije eri chisinge? Kaleni na kisherere cha mashayo amweni kwenyu, na mkale na sere ghati yenyu.”