Marko 8 - UVORO GHWALOLI KWA WANDU WOSE

Jesu kulyisa wandu elfu ine

¹ Nao majua ghalye, wandu wengi wetindire na sikowesi kindu chingi chawe chelya. Jesu kawapang'a wairimi wake na kuwauza,

² “Nendewafwila waya makoghano, andu wakala nemi majua matatu siwelyile kindu chingi;

³ nemi nikawagalisa njala kwawe wewato ni msare ngileni, andu wamoju wawe wafuma kulele kwenyi.”

⁴ Wairimi wake wakamtumbulila, “Idimikagha ije mundu kuwalyisa wandu awa wose mikate Kireti?”

⁵ Jesu kawakotela, “Muo na mikate milinga?” Nawo wakaghamba, “Mfungate.”

⁶ Nao kawauza wandu wakale kitembo msangeni, kawata mikate mfungate, kamkasa Mlungu, kaivunja na kuwahawa wairimi wake eri wasarire wandu, nawo wakawasarira.

⁷ Nawo weluo na makumba machache. Jesu kaghabarikia, kawahawa wawasarire naghose.

⁸ Nawo wakalya wakaghuta, wakashowa misusure yehangalike wakajuza vikapu mfungate.

⁹ Na weluo sa wandu elfu ine.

¹⁰ Nao kawalaga waghende. Iye na wairimi wake iyo ngelo yenyi wakajoka kele ishua, wakaghenda isanga lya Dalmanutha.

Wafarisayo kushaya mwakilimbita

¹¹ Wafarisayo wekeja kwa Jesu na wakadyowa kumdeila nganyi, wekemtima wekeshaya kuona mwakilimbita kufuma mlunguni.

¹² Naye kasorea ngolo, kaghora, “Kudani wandu wa kivali ichi washaile kuona wana mwakilimbita? Fulo namuza, sikwesi mwakilimbita ungi wewonyezo wandu wa kivali ichi.”

¹³ Naye kawasigha, kangila kele ishua, kaghenda chambuko cha bahari.

Chachu ya Wafarisayo na Herode

¹⁴ Nao wairimi wakaluwala kutwala mikate sala mkate ghumojori nigho gholuo kele ishua.

¹⁵ Naye kawafunda keghamba, “Kulindeni na chachu ya Wafarisayo na chachu ya Herode.”

¹⁶ Nawo wakahelea wenyi na wenyi wekeghamba, “Sitiwesi mikate.”

¹⁷ Naye Jesu kemanya selyi weluo wekehelea, kawauza, “Kudani mheleagha gha kusowa mikate? Ado simuonagha na kutambukilo inyo? Ado mondekala na akili zikulile?

¹⁸ Meso muo nagho, simuonagha, na masikilo muo nagho, simsikilagha? Na simririkanyagha,

¹⁹ nighenda nivunja mikate misanu kwa wandu elfu sanu, mwanajuzile vikapu vilinga na misusure?” Wakamuza, “Vikapu ikumi na vili.”

²⁰ “Na mikate mfungate kwa wandu elfu ine motwalile vikapu vilinga vijule misusure?” Nawo wakatumbulila, “Vikapu mfungate.”

²¹ Naye kawauza, “Hata hung'u simtambukilogho eri?”

Jesu kuboesa kifondo Bethsaida

²² Nao Jesu na wairimi wake wakafika Bethsaida. Wandu wamoju wakamleta mundu eluo kifondo. Wakamlomba kamba amwate.

²³ Naye kamwata kifondo mkonu, kamfunya shighati ya muzi. Naye aghenda amchwila mate gha meso, kamwikilila mikonu kamkotela, “Uonagha kindu chingi?”

²⁴ Naye kalola na kaghora, “Nionagha wandu, ela weonekagha sa miti ighendagha.”

²⁵ Nao Jesu kaikilila mikonu yake kele meso sena. Naye kalola na ndighi, meso ghake ghakaona kila kindu kirani.

²⁶ Jesu kamuza agale kaya kwake, keghamba, “Swauye kele ughu muzi.”

Petro kughora Jesu ni Masihi

²⁷ Nao Jesu kaghenda na wairimi wake hata muzi ghwa Kaisari Filipi. Naye ngileni kawakotela wairimi wake, “Wandu waghora imi nimi ani?”

²⁸ Nawo wakamtumbulila, “Wamoju waghora nuwe Johana Mubatizi; na wamoju Elija; na wamoju mumoju wa wana tondolo.”

²⁹ Naye kawakotela, “Ela inyo mwanaghoragha imi nimi ani?” Petro kamtumbulila, “Uwe ni Masihi.”

³⁰ Naye kawauza siwamghorere mndungi malagho ghake.

Jesu kughora ighulu ya matiriro, kifwa na kuzuka kwake

³¹ Nao Jesu kadyowa kuwafundisa wairimi wake: “Mwana wa Mdamu ni suti atiriro na malagho mengi, naye uleghogho ni waghosi, na wakohani wabwaa, na walimu wa sheria, naye ujeulagho na ijua lya katatu ujezuka sena.”

³² Naye oghorire agha mwazi mwazi. Nao Petro kamwata kadyowa kumkanya.

³³ Ela Jesu kaghaluka na kazighana wairimi wake, kamkanya Petro keghamba, “Uya nyuma yangu Shetani! Kwani suririkanyagha malagho gha Mlungu ela gha wandu.”

³⁴ Nao kawapang'a makoghano ngila mojori na wairimi wake na kuwauza, “Ngera mndungi ashaya kuniirima, ni suti akukane iye mwenyi, ause msalaba ghwake, aniirime.

³⁵ Kwa kukala kila mundu eshayagha kukiza umana ghwake, ujeghuhaitisa, naye ehaitisagha umana ghwake kwa undu ghwangu na kwa undu ghwa Ilagho Lyaloli, ujeghukiza.

³⁶ Kwani imfwanagha kimuni mundu kughupata urumengu ghose na kuhaitisa umana ghwake?

³⁷ Kwani mundu ulipagha kimuni kibalo cha umana ghwake?

³⁸ Kwani uwo wose enionelagha waya imi na ghore zangu kele urumengu ughu sighodumsagha na ghwa kaung'a, Mwana wa Mdamu naese ujemwonela waya ngelo ekujagha na Ubwaa ghwa Tatie na wana malaika wa kuela.”