Marko 6 - UVORO GHWALOLI KWA WANDU WOSE

Jesu kulegho Nazareti

¹ Jesu kafuma alye na kughenda kele muzi ghwake ghwenyi, nawo wairimi wake wakaghendanya naye.

² Nao ijua lya Sabato kadyowa kufundisa wandu kele sinagogi, na wengi wamsikizile wakashinika, wakaghamba, “Ado uyu mundu wanapatilile hiyo agha ghose? Ni akili muni izi ahawilo? Ni kazi muni izi za mashiniko ezidea na mikonu yake?

³ Ado uyu si fundi wa mbao, mwana wa Mariamu, na wakwawe Jakobo, Jose, Juda na Simoni? Ado wana wakwawe wa wake si weo nesi aha?” Kwa hung'u wakamlegha.

⁴ Nao Jesu kawauza, “Tondolo sahawogho ishima kele isanga lyake lyenyi na kele mbari yake na nyumba yake.”

⁵ Na kwa undu ughu sadeile wana mwakilimbita wengi, sala kuikilila mikonu wakongo wachache na kuwaboesa.

⁶ Naye, kashinika na ndighi kwa kukala siweluo na idumusi kwake. Nao Jesu kaghenda kele mizi ya alye kefundisa wandu.

Jesu kutuma wairimi ikumi na waili

⁷ Kawapang'a wairimi ikumi na waili, kadyowa kuwatuma waili waili. Kawahawa ndighi zefunya pepo;

⁸ naye kawauza, “Simwatwale kindu chingi, sala mndata. Simwatwale mkate, hata kikuchu, hata pesa zingi kele mkumbu;

⁹ ela mrware vilatu na simwatwale kanzu ingi nzima.”

¹⁰ Sena kajuzila kuwauza, “Mkangila nyumba ingi, kaleni alyenyi hata ngelo yeuka.

¹¹ Nao ngera muzi ghungi ghwalegha kumhokera ango kusikila malagho ghenyu, ngelo yefuma alye, wanguleni vumbi iwo kele nywayo zenyu. Ilyi lyikalagha ionyo kwawe.”

¹² Nao wairimi wakaghenda wekechilila wandu eri warihe.

¹³ Nawo wakagusa pepo na kuwavila wakongo wengi mavuta, wakawaboesa.

Kifwa cha Johana Mubatizi

¹⁴ Nao mzuri Herode kasikila agha ghose, kwa kukala nguma ya Jesu yeerire andu kose. Wandu wamoju wakaghora, “Johana Mubatizi wazuka kufuma kwa wafwa, niko izo ndighi zadea kazi amweni kwake.”

¹⁵ Ela wazima wakaghora, “Uyu ni Elija.” Na wamoju wakaghora, “Uyu ni tondolo, sa mumoju wa wana tondolo wa kale.”

¹⁶ Ela Herode aghenda asikila agha kaghamba, “Johana uyu nimpasile chongo wazuka!”

¹⁷ Kwani Herode mwenyi otumile wandu wakamwata Johana na kamfunga kifungoni kwa undu ghwa Herodia, muke wa Filipo wakwawe, emuusile.

¹⁸ Johana Mubatizi omuzile Herode, “Si kuirimana na sheria kungi kumusa muke wa wakwenyu.”

¹⁹ Naye Herodia kamumenya Johana na kahada ngila yemuulagha. Ela sadimile.

²⁰ Kwa kukala Herode oluo kemwogha Johana, kwani omanyile ni mundu wa hachi na wa kuela. Naye kamlinda kirani. Nao Herode aghenda amsikizila kamshinisa, ela hata hung'u kamsikizila kwa kuboelo.

²¹ Ela ifika ngelo ifweni, Herode odeile karamu ya kuvalo kwake kwa undu ghwa wabwaa wake, majemadari na vilongozi va wandu wa Galilaya.

²² Nao mchana wa Herodia keja kavina na kumuboela Herode na wagheni wake. Nao mzuri kamuza ulya mchana, “Nilombe icho chose ushaile nemi nijekuhawa.”

²³ Naye kamghemela keghamba, “Icho chose ujelomba nijekuhawa, hata nusu ya uzuri ghwangu.”

²⁴ Nao ulya mchana kaghenda kamuza mee, “Nilombe kimuni?” Naye kamtumbulila, “Chongo cha Johana Mubatizi.”

²⁵ Nao kauya shashowa kwa mzuri na kumuza, “Nanashaile shwa ng'ori chongo cha Johana Mubatizi kele bakuli.”

²⁶ Nao mzuri ghakamshinisa na ndighi, ela kwa undu ghwa kughema kwake hambiri ya wagheni wake, sadimile kughalula selyi eghorire.

²⁷ Nao iyo ngelo yenyi kamtuma mubwaa wa askari aghende alete chongo cha Johana. Naye askari kaghenda kampasa chongo kifungoni,

²⁸ na kachileta na bakuli na kumhawa ulya mchana, na mchana kamhawa mee.

²⁹ Nao wairimi wa Johana waghenda wasikila, wekeja wakausa muli ghwake, wakaghuzika kaburini.

Jesu kulyisa walume elfu sanu

³⁰ Nao watumo wakauya kwa Jesu na kumghorera ghose wadeile na wafundise.

³¹ Naye kawauza, “Njuuni andu kwa chanya inyo wenyi mzumuwe kachache.” Kwani wandu wengi weluo wekeja na kughenda hata siwepatile ulalo ghungi ghwelya.

³² Nawo wakaghenda kwa ishua andu kwa chanya wenyi.

³³ Ela wandu wengi wakawaona wekeghenda, wakawamanya, na wose wakakimbila kufuma mizi yose hata alye andu weluo wekeghenda, wakafika hambiri ya Jesu na wairimi wake.

³⁴ Nao Jesu aghenda afuma kele ishua kaona makoghano, kawafwila waya, kwa kukala weluo sa ng'onzi sizewesi mlisa. Nao kadyowa kuwafundisa malagho mengi.

³⁵ Nao kughenda kuswa, wairimi wake wekeja wakamuza, “Aha ni andu kwa chanya na kwaswa;

³⁶ walage waghende mbweni na kele mizi ya kavui waghule chakulya.”

³⁷ Ela Jesu kawauza, “Wahaweni kindu chelya.” Wairimi wakamuza, “Tighulagha mikate ya dinari maghana maili eri tiwahawe wandu walye?”

³⁸ Naye kawauza, “Muo na mikate milinga? Ghendeni mzighane.” Nawo waghenda waimanya, wakamuza, “Mikate misanu na makumba maili.”

³⁹ Nao Jesu kawauza wawakalise wandu kitembo visungu visungu kele nyasi.

⁴⁰ Nawo wakakala kitembo visungu visungu va wandu ighana na va wandu mirongo misanu.

⁴¹ Nao Jesu kaiwata mikate misanu na makumba maili, kalola mlunguni, kabarikia; kavunja mikate kawahawa wairimi wake, nawo wairimi wakasarira wandu; na ghalye makumba maili kasarira wandu wose.

⁴² Nawo wose wakalya wakaghuta.

⁴³ Wairimi wakashowa vikapu ikumi na vili va misusure ya mikate na makumba vihangalike.

⁴⁴ Nawo awa walyile mikate weluo walume elfu sanu.

Jesu kughenda ighulu ya meji

⁴⁵ Nao Jesu iyo ngelo yenyi kawauza wairimi wake wangile kele ishua, wakayaye kuwambuka chambuko cha Bahari hata Bethsaida, naye kasigho kelagana na makoghano.

⁴⁶ Naye aghenda kulagana na wandu, kajoka mghondini kulomba.

⁴⁷ Nao luma lwa hafuka, ishua lya wairimi lyeluo baharini ghati, naye oluo keng'weri kele isanga.

⁴⁸ Naye kaona selyi weluo wekelemo ni kughenda hambiri kwa undu ghwa mbeo yeluo ikekwita. Nao ifika avui na kuela kawajila keghenda ighulu ya bahari. Oluo keshaya kuwaita.

⁴⁹ Ela wamwona keghenda ighulu ya bahari wakaririkanya ni kisuga na wakakema.

⁵⁰ Kwani wamwona wose wakangilo ni wogha. Ela Jesu kawauza kwa shashowa, “Kaleni na ngolo. Nimi mwenyi, simwaoghe.”

⁵¹ Nao kangila kele ishua na mbeo ikanyamala. Nawo wakashinika na ndighi

⁵² kwa kukala siwatambukilo ni gha mikate, kwa kukulo ni ngolo kwawe.

Jesu kuboesa wakongo Genesareti

⁵³ Nawo wawambuka bahari, wakafika isanga lya Genesareti na kumangisa ishua mbali mbali ya bahari.

⁵⁴ Nawo wafuma kele mashua, wandu wakamumanya Jesu shwa ng'ori;

⁵⁵ nawo wakamkimbilila na iseghe isanga lyilya lyose, wakadyowa kuleta wakongo ighulu ya magodoro ghawe na kughenda kila andu wasikile uwo.

⁵⁶ Nao kila andu Jesu efikile, kele mizi michache, mizi mibwaa ango mbweni, wakawaleta wakongo sokoni wekemlomba awadumusile wawate muto ghwa nguo yake, na wengi wawatile nguo yake wakaboa.