Marko 5 - UVORO GHWALOLI KWA WANDU WOSE

Jesu kuboesa mundu wa pepo

¹ Nao Jesu na wairimi wake wakafika chambuko cha bahari ya Galilaya kele isanga lya Wageraseno.

² Jesu aghenda afuma kele ishua, kakoghana na mundu eluo na pepo kefuma kele makaburi.

³ Uyu mundu oluo kekala makaburini kwa kukala sikowesi mndungi edimile kumfunga hata kwa minyororo;

⁴ kwani kengi ofungilo na vigogo na minyororo, ela kaipasapasa minyororo na vigogo kavivunjavunja, na sikwesi mndungi eluo kemdima.

⁵ Kiro na msenya oluo makaburini na mghondini, naye oluo kekema na kukushuhashuha na mawe.

⁶ Naye aghenda amwona Jesu kamkimbilila na kumtasa.

⁷ Kakema na lwaka lubwaa keghamba, “Wanashaile kimuni kwangu Jesu Mwana wa Mlungu ewo Ighulu? Nakuvoya kwa izina lya Mlungu swanitirire.”

⁸ (Kwa kukala oiuzile, “Pepo iwase, mfume uyu mundu.”)

⁹ Nao Jesu kamkotela, “Wanaitogho ani?” Naye katumbulila, “Izina lyangu ni Legioni, kwa kukala te wengi.”

¹⁰ Naye kamlalama sazifunye pepo shighati ya isanga lyilya.

¹¹ Nao koluo na uranu ghwa nguluwe ghukeliso mghondini.

¹² Nao pepo zikamvoya Jesu, “Tighenze kele nguluwe, eri tizingile zo.”

¹³ Naye Jesu kazidumusila. Nao zikamfuma ulya mundu na kungila kele nguluwe, na uranu ghose ghwa nguluwe elfu mbili zikakimbila na kudoromoka, na kungila baharini na kumalika.

¹⁴ Walisa wa nguluwe wakakimbila, wakaghenda wakawaghorera wandu wa muzi na isanga lyilya uvoro ughu. Nao wandu wekeja kuona agha ghadeike.

¹⁵ Nawo wekeja kwa Jesu na kumwona ulya mundu eluo na pepo ya legioni, kitembo, arwara nguo na akili zake zio karakara; wakangilo ni wogha.

¹⁶ Nawo awa waonile agha wakaeresa uvoro ghwa agha waonile ighulu ya mundu wa pepo na nguluwe.

¹⁷ Nawo wandu walye wakamvoya Jesu afume kele isanga lyawe.

¹⁸ Nao ilyi Jesu eluo kengila kele ishua, ulya mundu eluo na pepo kamvoya waghendanye.

¹⁹ Ela Jesu kalegha, kemuza, “Gala kwa wandu wako na uwaghorere selyi Bwana akudeila malagho mabwaa, na selyi akuonela mbazi.”

²⁰ Nao ulya mundu kaghenda ngila zake na kudyowa kueresa uvoro ghwa ghaloli adeililo ni Jesu kele isanga lyose lya Dekapoli, na wandu wose wakashinika.

Mchana wa Jairo na muke awatile nguo ya Jesu

²¹ Nao Jesu aghenda awambuka na ishua chambuko, wandu wengi wakamtindirira, naye oluo mbalimbali ya bahari.

²² Nao mubwaa mumoju wa sinagogi aitogho Jairo kamjila, naye amwona Jesu, kamgwila maghuluni,

²³ kamvoya, kemuza, “Mwana wangu ni mkongo kavui na kufwa. Njuu umwikilile mikonu, eri aboe na akale moyo.”

²⁴ Nao Jesu kaghendanya naye na wandu wakamwirima na kumtindirira.

²⁵ Nao koluo na muke mumoju eluo na ukongo ghofunya bighati miaka ikumi na mili.

²⁶ Naye osirime kwa kurighito ni waghanga wengi na kulipa mali yake yose; hata sani sadimile kuboa kungi, ela ukongo ghwake ghukajuzilika.

²⁷ Naye aghenda asikila uvoro ghwa Jesu, keja nanyuma yake kele makoghano na kuwata nguo yake.

²⁸ Kwani oririkanye ngoloni kwake, “Nikawata tu nguo yake, nibowagha.”

²⁹ Nao iyo ngelo yenyi, bighati yake ikaoma, naye kasikila mulini kwake kamba waboa.

³⁰ Naye Jesu kamanya iyo ngelo yenyi, andu ndighi zamfuma; kwa hung'u kawaghalukila makoghano, kakotela, “Nani aniwata nguo yangu?”

³¹ Nao wairimi wake wakamuza, “Ado suonagha selyi makoghano wakutindirira, nawe ughoragha, ‘Nani aniwata?’”

³² Naye Jesu kalola gasi zose aone nani amwata.

³³ Ela ulya muke, kemanya mwenyi agha ghadeike kwake, keja na wogha na kugaganika, kagwa hambiri yake, kamghorera fulo yose.

³⁴ Nao Jesu kamuza, “Mwanwangu, idumusi lyako lyakuboesa, ghenda na sere, ubowe ukongo ghwako.”

³⁵ Nao ilyi Jesu eluo keghora hung'u, keja mundu kufuma nyumba kwa Jairo na kamuza, “Mwana wako wafwa; ndamu nini sena umsirimisiragha Mwalimu?”

³⁶ Ela Jesu satalile ghalye ghaghoriro kungi, kamuza mubwaa wa sinagogi, “Swadee wogha; uwe dumusa tu.”

³⁷ Naye Jesu sadumusile mndungi airimane naye, sala Petro, na Jakobo na Johana wakwawe Jakobo.

³⁸ Naye Jesu aghenda afika nyumba kwa Jairo, kadoka wandu wekekema na kulila na kushighira.

³⁹ Aghenda angila nyumba, kawauza, “Kudani mkemagha na kulila, mwanake safwile anduangi, ela ondetungura.”

⁴⁰ Nawo wakamseka. Ela iye kawafunya wandu wose shighati; naye kangila alye andu mwanake eluo ngila mojori na tatie na mee, na walye wairimi ekezanye nawo.

⁴¹ Kamwata mkonu keghamba, “Talitha kumi!” (Kutambula kwake, “Mchana, nakuza uuke!”)

⁴² Nao shwa ng'ori ulya mchana kauka, kaghenda, kwa kukala oluo na miaka ikumi na mili. Na wose weluo alye wakashinika.

⁴³ Ela Jesu kawauza siwamghorere mndungi malagho agho. Kafunya mlomu ahawo kindu chelya.