Marko 4 - UVORO GHWALOLI KWA WANDU WOSE

Ikataniso lya mwandi mbeu

¹ Nao Jesu kadyowa kuchila sena mbalimbali ya bahari ya Galilaya. Na ikoghano ibwaa lya wandu lyikamkoghanila, hata kangila kele ishua na kukala kitembo, na wandu wakakala mbalimbali ya bahari.

² Naye kawafundisa malagho mengi kwa makataniso, naye kele mafundiso ghake kawauza,

³ “Sikizileni! Mwandi oghendile kuwanda mbeu.

⁴ Nao ilyi eluo kewanda mbeu, zimoju zikapotoka ngileni, zikaduwo ni nyonyi.

⁵ Mbeu zimoju zikapotoka kele mawe andu sikowesi msanga ghuketi. Mbeu zikafuma shoshowa, kwa kukala msanga sighongilile mweni.

⁶ Nao ijua lyifuma na kubia, lyikaziisha, na kwa kukala miriginga siingilile mweni, zikanyala.

⁷ Zimoju zikapotoka mieni, na miya ikazeguanya nazo na kuzisira, nazo sizivele mavalo ghengi.

⁸ Zimoju zikapotoka kele msanga ghwaloli, zikafuma na kuzegua na kuvala mavalo: zimoju ndembe mirongo mitatu, zimoju ndembe mirongo mitandatu, na zimoju ndembe ighana.”

⁹ Nao Jesu kaghora, “Uyu ewo na masikilo ghesikila, asikile.”

Chausa cha makataniso

¹⁰ Nao ilyi Jesu eluo keng'weri, walye wekezanye, na wairimi ikumi na waili wakamkotela kutambula kwa ikataniso ilyi.

¹¹ Naye kawauza, “Inyo mwahawo kumanya ngasu za uzuri ghwa Mlungu, ela kwa walye wa shighati, kila kindu ni kwa makataniso.

¹² Eri, ‘Hata wakanalole siwaone; na hata wakanasikile siwatambule; eri siwaghaluke kwa Mlungu na kufwilo waya.’”

Jesu kutambula ikataniso lya mwandi mbeu

¹³ Nao Jesu kawauza, “Ado simtambukilo ni ikataniso ilyi? Ndamu m'dimagha ije kutambukilo ni makataniso ghose?

¹⁴ Mwandi wawanda ilagho lya Mlungu.

¹⁵ Na wandu wamoju ni sa mbeu ziwandilo kele ngila; awa wasikila ilagho, na shwa ng'weri Shetani weja na kulyifunya ilagho lyiwandilo amweni kwawe.

¹⁶ Na wandu wazima ni sa mbeu ziwandilo kele mawe; awa wasikila ilagho na kulyihokera kwa kuboelo;

¹⁷ ela siwawesi miriginga ingi amweni kwawe. Warumaghia kachache na ngelo ya kusirimiso ango kugusoguso ilyi yeja kwa undu ghwa ilagho, wasigha idumusi.

¹⁸ Na wandu wamoju ni sa mbeu ziwandilo kele miya; wo wasikila ilagho,

¹⁹ ela maemboembo gha urumengu na maboelo gha mali na beha ya vilambo, vangilila lyilya ilagho hata silyidimile kuvala matunda ghengi.

²⁰ Ela walye wandu wawandilo kele msanga ghwaloli, ni awa wasikila ilagho na kulyiwata. Nawo wavala matunda: wamoju mirongo mitatu, wamoju mirongo mitandatu, na wamoju ighana.”

Taa mwenimweni ya pishi

²¹ Nao Jesu kawauza, “Ado taa yanaletogho iiko mwenimweni ya pishi ango mwenimweni ya ulili, na si kele andu kwa ighulu?

²² Sikwesi kindu chingi chivisilo sicheonekagha, hata sikwesi undu ghungi ghuvisike sighofunyo mlangazini.

²³ Uyu ewo na masikilo ghesikila, asikile.”

²⁴ Sena kawauza, “Kulindeni na agha msikilagha; kipimo icho mpimilagha nacho wambenyu, nicho chenyi Mlungu empimila nacho, sena mjejuzilo.

²⁵ Kwani uyu ewo na vingi ujejuzilo, na uyu sewesi, hata ichi ewo nacho usokogho.”

Ikataniso lya mbeu izeguwagha

²⁶ Nao Jesu kaghora, “Uzuri ghwa Mlungu ni sa mundu awandile mbeu mbweni.

²⁷ Naye watungura na kiro na kuuka na msenya, nazo mbeu zafuma, zazeguwa, iye semanyagha selyi zizeguwagha.

²⁸ Kwani msanga ghwenyi ghwadea mbeu izeguwe na ivale! Hambiri mghuchu ghwafuma, ima changa, nao kudua changa chajula ndembe.

²⁹ Nao ilyi viro vairwa, wausa ndaghala apase viro, kwani ngelo yekwasha mvono yafika.”

Ikataniso lya ndembe ya haradali

³⁰ Naye Jesu kaghora, “Uzuri ghwa Mlungu ghufwananiso na kimuni, ango nini chikatanisogho nagho?

³¹ Ghwafwanana na ndembe ya Haradali iwo njache kuisa ndembe zose ngelo iwandogho;

³² ela ilyi yawando, yazegua na kukala mwiti mubwaa kuchumba miti yose, na kele mbashe zake mbwaa, nyonyi zeja zawaghala vichunguri vawe.”

³³ Na kwa makataniso sa agha Jesu kachila ilagho, kuirimana na kumanya kwawe.

³⁴ Hata sadimile kughora nawo sikwewo na makataniso, ela wairimi wake kawaghorera mwazi kila kindu ngelo weo wenyi.

Jesu kunyamaza mbeo mbwaa

³⁵ Nao nahafukeni lyilya ijua lyenyi, Jesu kawauza wairimi wake, “Ndokoni tiwambuke chambuko chilya.”

³⁶ Nawo wairimi wakawasigha wandu, wakaghenda andu lyilya ishua lyeluo, wakaghendanya. Na koluo mashua zimoju ziirimane nayo.

³⁷ Nao mbeo mbwaa ikakwita na kulyisindika ishua, na meji ghakadyowa kungila.

³⁸ Naye Jesu oluo nanyuma atungure kele muto; nao wakamnula wekemuza, “Mwalimu, ado sumanyagha kamba tendehaita?”

³⁹ Nao Jesu kauka, kaikemela mbeo na kuiuza bahari, “Nyamala chwi!” Nao mbeo ikanyamala chwi.

⁴⁰ Nao kawauza, “Kudani mwadea wogha? Ado simwesi idumusi?”

⁴¹ Nao wakangilo ni kiture, wakauzana wenyi, “Ni mundu muni uyu? Hata esikilogho ni mbeo na bahari!”