Marko 2 - UVORO GHWALOLI KWA WANDU WOSE

Jesu kumuboesa mundu wa kupooza

¹ Nyuma ya majua machache, Jesu kauya sena Kapernaumu, nao wandu wakapata uvoro kamba uwo nyumba.

² Nawo wandu wakakoghanika wakajula, ulalo ghukasoweka hata mjangoni. Naye kawachilila Ilagho Lyaloli.

³ Nao wandu wane wekeja wekemtuka mkongo wa kupooza kwa Jesu.

⁴ Nawo waghenda wasowa ulalo ghomfikila kwa undu ghwa ungi ghwa wandu, wakafuchula nyumba naighulu, wakapola mwanya, wakamseleza na ulili etungurire.

⁵ Nao Jesu aghenda aona idumusi lya wandu wamletile, kamuza mkongo wa kupooza, “Mwanwangu, kaung'a zako zafwilo waya.”

⁶ Na walimu wa sheria weluo alye, wakakukotela wenyi ngoloni kwawe,

⁷ “Kudani uyu mundu eghoragha hung'u! Wamtukana Mlungu! Nani edimagha kufwila waya wandu kaung'a zawe sala Mlungu mwenyi?”

⁸ Naye Jesu kemanya ngoloni kwake selyi weluo wekeririkanya, kawauza, “Kudani Mwaririkanya hung'u ngoloni kwenyu?

⁹ Ni lyio lyiwangue, kumuza mundu wa kupooza, ‘Kaung'a zako zafwilo waya’, ango kumuza, ‘Uka, uuse ulili ghwako, ughende’?

¹⁰ Ela nanashaile mumanye kamba Mwana wa Mdamu uwo na nguma urumenguni kufwila wandu waya kaung'a.” Nao kamuza mundu wa kupooza,

¹¹ “Nakuza, uka, uuse ulili ghwako, ughende nyumba kwako.”

¹² Naye kauka, kausa ulili ghwake kaghenda. Wandu weluo alye wakamwona, wakashinika na kumkasa Mlungu wekeghamba, “Lyingi sitionile malagho sa agha!”

Jesu kumpang'a Lawi amwirime

¹³ Jesu kaghenda sena mbalimbali ya bahari ya Galilaya na wandu wose wakamtindirira, naye kawafundisa.

¹⁴ Nao keita kamwona Lawi wa Alfayo kitembo forozeni, naye kamuza, “Niirime.” Naye kauka kamwirima.

¹⁵ Nao Jesu ilyi eluo kelya chakulya kele nyumba ya Lawi, watozi ushuru wengi na wakaung'a wekezanye na Jesu na wairimi wake, kwa kukala wengi wemwirime.

¹⁶ Nao walimu wa Sheria na Wafarisayo waghenda wamwona kelyanya na wakaung'a na watozi ushuru, wakawauza wairimi wake, “Kudani elyanyaa na watozi ushuru na wakaung'a?”

¹⁷ Naye Jesu aghenda asikila, kawauza, “Awa weo banana siwashayagha mghanga ungi, ela awa weo wakongo. Sijile kwa awa weo wahachi, ela kwa wakaung'a.”

Ikotelo ighulu ya kufunga kulya

¹⁸ Nawo wairimi wa Johana na wa Wafarisayo weluo wekefunga kulya; nao wandu wakamjila Jesu, wakamuza, “Kudani wairimi wa Johana na wairimi wa Wafarisayo wafungagha kulya, ela wairimi wako mbai siwafungagha?”

¹⁹ Naye Jesu kawatumbulila, “Ije wandu wakaribisho kuloleni, wadima kufunga kulya ngelo weo na musi muke? Ngelo yose weo na musi muke siwedimagha kufunga kulya.

²⁰ Ela ngelo ikujagha, musi muke efunyo kufuma kwawe, niko aho wejefunga kulya.

²¹ “Sikwesi mndungi ashonagha kiraka kiishi kele nguo ya kale, kwani kiraka kiishi chideagha nguo ya kale irashuke, na ilanga lyijuzilike.

²² Sena sikwesi mndungi angizagha divei mbishi kele viriba va kale; naye kangiza divei mbishi kele viriba va kale, viriba vendepaika na divei itike na kuhakila viriba; kwa hung'u divei mbishi yanafweni ingizo kele viriba viishi.”

Ikotelo ighulu ya Sabato

²³ Nao ijua imoju lya Sabato, Jesu oluo keita ghati ya mbuwa za ngano, nawo wekeita, wairimi wake weluo weketema vanga va ngano.

²⁴ Niko Wafarisayo wakamuza, “Lola selyi wairimi wako wedeagha undu ghurighido kudeo ijua lya Sabato.”

²⁵ Naye kawatumbulila, “Ado lyingi simshomile selyi adeile Daudi ilyi iye na wandu wake weshahilo ni njala?

²⁶ Kangila kele nyumba ya Mlungu, ngelo ya mkohani mubwaa Abiazari; kalya mikate iikilo kwa Mlungu, na kawahawa walye ekezanye nawo. Ela yanarighidogho kulyigho ni mndungi sala wakohani wenyi.”

²⁷ Nao Jesu kajuzila kuwauza, “Sabato yanaikilo kwa undu ghwa mdamu, ela mdamu saumbilo kwa undu ghwa Sabato kungi.

²⁸ Kwa hung'u Mwana wa Mdamu ni Bwana wa Sabato nayose.”