Marko 16 - UVORO GHWALOLI KWA WANDU WOSE

Kuzuka kwa Jesu

¹ Nao Sabato iduwa, Mariamu Magdalene, na Mariamu mee Jakobo, na Salome, wakaghula marashi eri waghende waghuvile muli ghwa Jesu.

² Nao ijua lya Jumwa na ikesho kiro, ijua lyikebusa, wakaghenda kaburini.

³ Nawo weluo wekeghora wenyi, “Nani etibingilishilagha iwe kele mjango ghwa kaburi?”

⁴ Nawo welolagha, wakaona iwe lyamalila kubingilisho, (nalyo lyeluo ibwaa).

⁵ Nawo wangila kele kaburi, wakamwona mtawana kitembo mkonu ghwa kijo, arwara nguo za mnyange; nawo wakashinika.

⁶ Naye kawauza, “Simwashinike; mondemhada Jesu wa Nazareti uyu awambilo. Seo aha, wazuka. Loleni andu azikilo.

⁷ Ela ghendeni muwaghorere wairimi wake na Petro, kamba wawakayaila kughenda Galilaya; alye mjemwona selyi amghorerere.”

⁸ Nawo wakafuma wekekimbila kufuma kaburini, kwani weluo wekegaganika na kushinika; nawo siwaghorerere mndungi ilagho lyingi, kwa kukala wengililo ni wogha. [

Jesu kuono ni Mariamu Magdalene

⁹ Nao Jesu aghenda azuka naikesho kiro ijua lya Jumwa, kamfumila Mariamu Magdalene, uyu emfunyile pepo mfungate.

¹⁰ Naye kaghenda na kuwaghorera walye wekezanye naye. Weluo wekelila na kushighira.

¹¹ Ela waghenda wasikila Jesu uwo moyo na kamba iye wamwona, siwadimile kudumusa.

Jesu kuono ni wairimi waili

¹² Nyuma ya agha Jesu kawafumila wairimi waili kwa fwana nzima ngelo weluo wekeghenda mbweni.

¹³ Nawo wakauya na kughorera wambawe, ela siwadumusile.

Jesu kuono ni wairimi ikumi na moju

¹⁴ Konyuma Jesu kawafumila wairimi ikumi na moju ngelo weluo wekelya; kawakemela kwa kulegha kudumusa na kukulo ni ngolo, kwa kukala siwadumuse walye wamwonile nyuma ya kuzuka.

¹⁵ Nao kawauza, “Ghendeni urumenguni ghose na mchile Ilagho Lyaloli kwa wandu wose.

¹⁶ Uyo wose edumusagha na kubatizo ukilagha; ela uyu sedumusagha utaghanyogho.

¹⁷ Na wana mwakilimbita awa weirimanagha na awa wadumusa: kwa izina lyangu wegusagha pepo, na wejeghora kwa nyumi nzima nzima;

¹⁸ hata ilyi wawata nyoka ango wanwa usungu siweonagha ghengi; wakawaikilila wakongo mikonu webowagha.”

Jesu kujoka mlunguni

¹⁹ Nao Bwana Jesu aghenda amalila kuhelea nawo, katwalo noko ighulu mlunguni, kakala kitembo kele mkonu ghwa kijo ghwa Mlungu.

²⁰ Nawo wairimi wakaghenda wakachila andu kose, na Bwana kadeanya kazi nawo, kemangisa llagho kwa wana mwakilimbita wadeike. Ameni.]