Marko 15 - UVORO GHWALOLI KWA WANDU WOSE

Jesu kughenzo hambiri ya Pilato

¹ Nao naikesho kiro, wakohani wabwaa, na waghosi, na walimu wa sheria, na wandu wa njama wakasikilana; nawo wakamfunga Jesu na kumghenza na kumfunya kwa Pilato.

² Nao Pilato kamkotela, “Uwe nuwe mzuri wa Wayahudi?” Jesu katumbulila, “Uwe waghora.”

³ Nawo wakohani wabwaa wakamshitakia kwa malagho mengi.

⁴ Nao Pilato kamkotela sena, “Ado suwesi lyetumbulila? Uwonagha ni malagho malinga wakushitakia nagho!”

⁵ Ela Jesu satumbulile kindu chingi, hata Pilato kashinika.

Jesu kutaghanyo kifwa

⁶ Nao ngelo ya karamu ya Pasaka, Pilato oluo kewafungulila mfungo mumojori wemlombile.

⁷ Na koluo na mfungo mumoju aitogho Baraba, efungilo ngila mojori na wambawe kwa undu ghwa sheshe zideile wandu wakaulagho.

⁸ Nao makoghano wakamjila Pilato wakamuza awadeile selyi awadeilagha.

⁹ Naye kawakotela, “Mwanashaile nimfungulile Mzuri wa Wayahudi?”

¹⁰ Omanyile kamba wakohani wabwaa wendemfunya Jesu kwa kumwonela iziso.

¹¹ Ela wakohani wabwaa wakashoterea makoghano waghore wafungulilo Baraba kibalo chake.

¹² Nao Pilato kawauza sena, “Kwa hung'u nimdee ije uyu mundu mumwitagha Mzuri wa Wayahudi?”

¹³ Nawo wakaoda, “Mwambe!”

¹⁴ Nao Pilato kawakotela, “Kudani, wadea ulaghelaghe muni?” Ela wakaoda na ndighi, “Mwambe!”

¹⁵ Nao Pilato kwa kushaya kuwaboela wandu, kamfungula Baraba, ima kamchapa Jesu na kumfunya awambo.

Askari kumsholela Jesu

¹⁶ Nao askari wakamlongoza Jesu na kumngiza kele nyumba ya uzuri (iitogho Praitorio), nawo wakawapang'a askari wose.

¹⁷ Nao wakamrwarisa nguo ya ngundu na kumlukila kofia ya miya na wakamrwarisa.

¹⁸ Nao wakadyowa kumroghowa, “Voro Mzuri wa Wayahudi!”

¹⁹ Nawo wakamriba na changu cha chongo, wakamchwila mate; wakam'dyaila ngokoro na kumtasa.

²⁰ Nawo waghenda wamalila kumsholela, wakamfunya ilya nguo ya ngundu na kumrwarisa nguo zake zenyi. Nao wakamlongoza noko kumwamba.

Jesu kuwambo

²¹ Nawo ilyi weluo ngileni wekem'ghenza, wakakoghana na mundu mumoju aitogho Simoni eluo kefuma mbweni. Askari wakamshurutisa atuke msalaba ghwa Jesu. (Simoni oluo mundu wa kufuma Kurene na oluo ni tatie Alekzanda na Rufasi.)

²² Nawo wakamghenza Jesu andu kuitogho Golgotha, kutambula kwake “ngomeni.”

²³ Nao wakamhawa divei irunganyo na manemane, ela iye kailegha.

²⁴ Nao wakamwamba, wakasara nguo zake kwa ngila ya kura, eri wamanye ichi kila mumoju eusagha.

²⁵ Nayo yeluo ni saa ndatu ilyi wemwambile.

²⁶ Na koluo na mawandiko gha mashitaki ghake, “Mzuri wa Wayahudi.”

²⁷ Nawo wewambile viting'a waili ngila mojori na Jesu, mumoju mkonu ghwa kijo na mumoju mkonu ghwa kimosho. [

²⁸ Nao Mawandiko gha kuela ghakakatila gheghoragha, “Katalo ngila mojori na wakosi.”]

²⁹ Na walye weluo wekeita alye wakamsholela, wakanyavura vongo vawe na kughora, “Ee! Uwe uvunjagha hekalu na kuiwaghala kwa majua matatu!

³⁰ Kukize uwe mwenyi na uselele kufuma kele msalaba!”

³¹ Hata wakohani wabwaa na walimu wa sheria wakamsholela, wekeghamba, “Wanakizile wazima, sedimagha kukukiza iye mwenyi!

³² Masihi Mzuri wa Israeli, saselele kufuma msalabeni eri tione na kudumusa!” Na walye wewambilo ngila mojori naye wakamsholela.

Kifwa cha Jesu

³³ Nao ifika saa ndandatu, kukakala na kiza isanga lyose hata saa kenda.

³⁴ Nao saa kenda, Jesu kakema na lwaka lubwaa, “Eloi, Eloi, lama sabakthani?” Kutambula kwake, “Mlungu wangu, Mlungu wangu, kudani wanisigha?”

³⁵ Nao walye weluo kimusi alye wasikila, wakaghora, “Loleni, ondempang'a Elija!”

³⁶ Nao mundu mumoju kakimbila kajuza sifongo na siki, kaiika kele mrangi na kumhawa anwe, keghora, “Sigha tione ngera Elija ukujagha amseleze msalabeni!”

³⁷ Nao Jesu kakema na lwaka lubwaa, na kufunya roho.

³⁸ Nao pazia ya hekalu ikazaika nyuhande mbili kufuma koighulu hata koisi.

³⁹ Nao jemadari uyu eluo kezighana, aghenda aona selyi afwile, kaghamba, “Fulo uyu mundu oluo ni Mwana wa Mlungu.”

⁴⁰ Koluo na wake wamoju weluo wekezighana kufuma kakulele, wamoju weluo ni Mariamu Magdalene na Mariamu mee Jakobo mchache na Jose na Salome.

⁴¹ Awa wake wemwirime Jesu ilyi eluo Galilaya, na kumtumikila; na wake wazima wengi wejanye naye Jerusalemu.

Kuziko kwa Jesu

⁴² Nao ighenda ifika nahafuka, kwa kukala lyeluo ni ijua lya kukuika kirani hambiri ya Sabato,

⁴³ Josefu wa Arimathaya, mundu eluo kehawo ishima kele wanjama, na eluo kelolila Uzuri ghwa Mlungu kuja, kamghendela Pilato sewesi wogha ghungi, kalomba muli ghwa Jesu.

⁴⁴ Nao Pilato kashinika kusikila kamba wamalila kufwa. Kampang'a jemadari kamkotela ngera wamalila kufwa.

⁴⁵ Naye aghenda amanya kufuma kwa jemadari kamba wafwa, kamdumusila Josefu ause ghulya muli.

⁴⁶ Nao Josefu kaghula nguo ya bafuta, kaghuseleza ghulya muli, kaghufunga na ilya nguo ya bafuta, kaghuzika kele kaburi ikotilo iweni, na kabingilisha iwe kele mjango ghwa kaburi.

⁴⁷ Mariamu Magdalene na Mariamu mee Jose weonile andu azikilo.