Marko 14 - UVORO GHWALOLI KWA WANDU WOSE

Njama yemuulagha Jesu

¹ Na yeluo ni majua maili hambiri ya Pasaka na karamu ya mikate siyengizilo chachu. Wakohani wabwaa na walimu wa sheria wakahada ngila yemwata Jesu kwa ulachu wamuulaghe.

² Ela wakaghora, “Siyakale ngelo ya karamu kungi eri wandu siwazuhe.”

Jesu kuvilo mavuta alye Bethania

³ Jesu oluo Bethania kele nyumba ya Simoni eluo Mkoma. Ilyi Jesu eluo kelya mezeni, muke mumoju keja na chupa ya alabasta ijule marashi gha zoghori mbwaa ghadeilo na nardi yaloli. Naye aghenda aivunja chupa, kamnyinyila marashi chongo.

⁴ Ela wandu wamoju weluo alye wakawasilo, wakaghora wenyi kwa wenyi, “Kudani marashi agha ghehakilogho?

⁵ Ni kumacho marashi agha ghatagho kwa zoghori ichumbagha dinari maghana matatu na pesa zake zikahawo wakiwa.” Nawo wakamnung'unikila ulya muke.

⁶ Ela Jesu kaghora, “Msigheni; kudani mumsirimisagha? Wadea kirani kwangu.

⁷ Kwani wakiwa muo nawo kila ngelo, na ilyi mwashaya mwadima kuwadeila ghaloli, ela imi simkalagha nemi ngelo zose.

⁸ Wadea selyi edimagha; kwani uyu muke wanivila marashi muli ghwangu kughuika kirani hambiri ya kuziko.

⁹ Fulo namuza, andu kose kuchilogho Ilagho Lyaloli urumenguni, agha adea uyu muke naghose ghejeghoro kwa kumkumbuka iye.”

Juda kudumusa kumfunya Jesu

¹⁰ Nao Juda Iskariote, mumoju wa wairimi ikumi na waili, kaghenda kwa Wakohani wabwaa eri amfunye Jesu kwawe.

¹¹ Nawo waghenda wasikila hung'u wakaboelo, wakamulaga kamba wemhawagha pesa. Naye kahada ngila yaloli yemfunya.

Jesu kulya chakulya cha Pasaka na wairimi wake

¹² Nao ijua lya hambiri lya karamu ya mikate siyengizilo chachu, ngelo yeshinja ng'onzi ya Pasaka, wairimi wa Jesu wakamkotela, “Ni hiyo ushaile tighende tiboese kwa undu ghwako eri ulye chakulya cha Pasaka?”

¹³ Naye Jesu kawatuma wairimi wake waili kewauza, “Ghendeni kele muzi, nenyo mkafika, mkoghanagha na mundu atuka mbuta ya meji, mwirimeni.

¹⁴ Na andu engilagha, muzeni mundu wa nyumba, ‘Mwalimu ughoragha, Chio hiyo chumba changu cha wagheni andu nilyilagha chakulya cha Pasaka na wairimi wangu?’

¹⁵ Naye ujemwonyeza chumba kibwaa cha gorofeni chiboeso na kupango kirani; aho mtiikila kirani chakulya.”

¹⁶ Nao wairimi wakaghenda hata wakafika kele muzi, wakadoka selyi awauzile, wakaika kirani chakulya cha Pasaka.

¹⁷ Nao nahafukeni Jesu keja na wairimi ikumi na waili.

¹⁸ Nawo ilyi weluo mezeni wekelya, Jesu kaghora, “Fulo namuza, mumoju wenyu ujenifunya, naye niye mwenyi elyanyagha nemi.”

¹⁹ Nao wairimi wakafurusa, wakadyowa kumkotela mumojori mumojori, “Ado nimi?”

²⁰ Kawauza, “Ni mumoju wa wairimi ikumi na waili uyu evililagha mkate andu kumojori nemi kele bakuli.

²¹ Mwana wa Mdamu ughendagha kufwa selyi awandikilo, ela ni bugha kwake ulya mundu emfunyagha Mwana wa Mdamu! Yeluo ni baha kwake ngera sevelo!”

Kilalilo cha Bwana

²² Nao ilyi weluo wekelya, Jesu kausa mkate, kaghubarikia, kaghuvunja, na kuwahawa wairimi keghamba, “Useni, ughu ni muli ghwangu.”

²³ Nao kausa kikombe, naye aghenda akasa, kawahawa, na wakanwa wose kufuma kele icho kikombe.

²⁴ Naye kawauza, “Iyi ni bighati yangu ya ilagano, itilogho kwa undu ghwa wengi.

²⁵ Fulo namuza, sinweghagha sena gha matunda gha mzabibu, hata ijua nijenwa uishi kele uzuri ghwa Mlungu.”

²⁶ Nawo waghenda waimba lumbo, wakafuma wakaghenda kele mghondi ghwa Mizeituni.

Jesu kutondola ighulu ya Petro kumkana

²⁷ Nao Jesu kawauza wairimi wake, “Inyose mnisighagha; kwani yanawandiko: ‘Nimkwitagha mlisa na ng'onzi zisaghasaghagha.’

²⁸ Ela ilyi nazuka, nimkayayilagha Galilaya.”

²⁹ Petro kamuza, “Hata ngera wose wekusighagha, imi sikusighagha.”

³⁰ Naye Jesu kamuza, “Fulo nakuza, ichi kiro chenyi, hambiri jongole siyetetile mandu maili, unikanagha mandu matatu.”

³¹ Ela Petro kafunga ndighi, katumbulila, “Hata ilyi yakala ni kufwa na uwe, sikukanagha kungi.” Na wose wakaghora ukwenyi.

Jesu kulomba Gethsemane

³² Nao wakaghenda andu kuitogho Gethsemane, naye Jesu kawauza wairimi wake, “Kaleni aha ngelo nikelomba.”

³³ Nao kawatwala Petro na Jakobo na Johana, kadyowa kufurusa na kusirima ngoloni.

³⁴ Naye kawauza, “Roho yangu iwo na furuse, hata kufwa; kaleni aha na mcherese.”

³⁵ Nao kaghenda hambiri kachache, kakugwisha msangeni na kulomba, ngera idimikagha, iyo ngelo iite kwake.

³⁶ Naye kaghora, “Aba, ghose ghadimika kwako uwe, nifunyile kikombe ichi cha matiriro, ela si selyi imi nishaile kungi, ela selyi uwe ushaile.”

³⁷ Nao kawuya na kuwadoka watungura, naye kamuza Petro, “Simoni, watungura? Sudimile hata kucheresa kwa saa mojori?

³⁸ Lindeni na kulomba eri simwejengila matimoni; roho yanashaile, ela muli sighuwesi ndighi.”

³⁹ Nao kaghenda sena, na kulomba ghalye malagho ghenyi.

⁴⁰ Naye keja sena, na kuwadoka watungure, kwa kukala meso ghawe ghegwaile; nawo siwemanyile lyemtumbulila.

⁴¹ Nao keja indu lya katatu, na kuwauza, “Ado mwanatulagha mketungura na kuzumua? Yakata; saa yafika ya Mwana wa Mdamu kuhawano kele mikonu ya wakaung'a.

⁴² Ukeni tighende; loleni uyu enifunyagha uwo avui.”

Kuwato kwa Jesu

⁴³ Nao ilyi Jesu eluo keghora, Juda uyu eluo mumoju wa wairimi ikumi na waili keja. Naye oluo ngila mojori na makoghano weluo na nyufu na rungu, wetumilo ni Wakohani na walimu wa sheria na waghosi.

⁴⁴ Naye uyu eluo umfunyagha owahawile alama keghamba, “Uyo nijemsusuga niye mwenyi, mwateni na mghende naye mkemlinda kirani.”

⁴⁵ Naye Juda aghenda eja, kamghendela Jesu, kamuza, “Mwalimu!” Nao kamsusuga.

⁴⁶ Nawo wakamwata Jesu na wakamumanzira.

⁴⁷ Ela mumoju eluo avui kafunya lufu lwake, kamtema msunyi wa mkohani mubwaa na kumpasa kisikilo chake.

⁴⁸ Nao Jesu kawauza, “Ado mweja na nyufu na rungu kuniwata selyi mwatagha viting'a?

⁴⁹ Kila ijua nekezanye nenyo hekaluni nikefundisa na simdimile kuniwata. Ela sigheni Mawandiko gha Kuela ghakatile.”

⁵⁰ Nao wairimi wose wakamsigha, wakakimbila.

⁵¹ Nao mtawana mumoju kamwirima, naye oluo tu na nguo yekubula; nao wakamwata.

⁵² Ela kasigha ilya nguo yake, kakimbila tuu.

Jesu hambiri ya Baraza

⁵³ Nao wakamghenza Jesu kwa mkohani mubwaa, nawo wakohani wabwaa wose na waghosi na walimu wa sheria wekoghane.

⁵⁴ Naye Petro kamwirima kwa kulele, hata kangila kwa mkohani mubwaa, naye kakala kitembo na warindiri, kebughawa moto.

⁵⁵ Nao mkohani mubwaa na wanjama wose weluo wekehada ushuhuda ighulu ya Jesu eri wamuulaghe, ela wakaghusowa.

⁵⁶ Kwani wengi weshuhudie ndimi ighulu yake, nagho ushuhuda ghwawe ghukalemo ni kuwatana.

⁵⁷ Hata wamoju wakauka wakashuhudia ndimi ighulu yake wekeghamba,

⁵⁸ “Tanamsikile keghora, ‘Niifuchulagha hekalu iyi iwaghalo na mikonu ya wandu, na kwa majua matatu niwaghalagha nzima siyewaghalo na mikonu.’”

⁵⁹ Hata hung'u sani ushuhuda ghwawe sighuwatane kungi.

⁶⁰ Nao mkohani mubwaa kakala kimusi ghati yawe na kumkotela Jesu, “Ado sutumbulilagha? Nini ichi awa wandu waghora ighulu yako?”

⁶¹ Ela kanyamala na satumbulile. Nao sena mkohani mubwaa kamkotela Jesu, “Ado uwe nuwe Masihi, Mwana wa Mlungu Mubarikio?”

⁶² Jesu katumbulila, “Nimi mwenyi; nenyo mjemwona Mwana wa Mdamu kekala kitembo kele mkonu ghwa kijo ghwa Mlungu ewo moyo, keja na maengu gha mlunguni.”

⁶³ Nao mkohani mubwaa karashura nguo zake na kughora, “Ni mashahidi gha kimuni tishayagha?

⁶⁴ Mwasikila inyo wenyi masholi ghake. Muonagha ije?” Nawo wose wakaghamba yanamfweni kufwa.

⁶⁵ Nao wamoju wakadyowa kumchwila Jesu mate na kumubula ushu na kumkwita wekemuza, “Tondola, nani akuriba!” Na warindiri wakamwata wakamubahala.

Petro kumkana Jesu

⁶⁶ Naye Petro oluo naisi, aho keja mtumishi mumoju wa kiwake wa mkohani mubwaa,

⁶⁷ naye amwona Petro kebughawa moto, kamzighana na kughora, “Uwe nawose wokezanye na Jesu wa Nazareti.”

⁶⁸ Ela kakana keghamba, “Simanyagha hata sitambukilogho selyi ughoragha.” Nao Petro kafuma shighati. Na jongole ikateta.

⁶⁹ Nao ulya mtumishi wa kiwake kamwona sena, kadyowa kuwauza wandu weluo kimusi alye, “Uyu mundu ni mumoju wawe.”

⁷⁰ Ela iye kakana sena. Nao kumukamuka sena, walye wandu weluo kimusi wakamuza Petro, “Fulo nuwe mumoju wawe, kwa kukala nuwe Mgalilaya.”

⁷¹ Ela Petro kadyowa kukuwanyiza na kughema keghamba, “Simweni kamare uyu mundu mum'ghoragha!”

⁷² Nao alyenyi jongole ikateta indu lya kaili. Naye Petro kakumbuka selyi Jesu emuuzile, “Hambiri ya kuteta jongole kaili, ujenikana mandu matatu.” Nao kadyowa kulila na kushighira.