Marko 13 - UVORO GHWALOLI KWA WANDU WOSE

Jesu kuhelea ighulu ya kuhakilo Hekalu

¹ Nao ilyi Jesu eluo kefuma kele hekalu, mwirimi wake mumoju kamuza, “Mwalimu, lola mawe na mawaghali selyi gheo ghaloli?”

² Jesu kamtumbulila, “Ughaonagha mawaghali agha? Sikujesighika iwe lyingi ighulu ya mumbawe silyebudukagha.”

Masirimi na matiriro

³ Naye Jesu aghenda akala kitembo kele mghondi ghwa Mizeituni kuilola hekalu, Petro, Jakobo, Johana na Andrea wakamkotela weo wenyi,

⁴ “Tighorere agha ghejekala nini, na ni kimuni chikalagha alama ya agha ghose kukala?”

⁵ Nao Jesu kadyowa kuwauza, “Lindeni simwalongozo laghelaghe.

⁶ Wengi wekujagha kwa izina lyangu wekeghamba, ‘Imi nimi Masihi!’ Nawo wejekalila wandu wengi.

⁷ Nenyo mkasikila gha uta na nung'unung'u za uta, simwashinike; agha ni suti ghakale, ela kudua kwenyi kwanakaile.

⁸ Kwani mbari ijelwana na mbari, na uzuri ghujelwana na uzuri. Kujekala na mitetemo ya isanga andu kungi, kujekala na njala; uku niko sa kudyowa lwambo lovala.

⁹ “Ela kulindeni inyo wenyi, kwani mjeghenzo kwa waghosi mtaghanyo, na mjekwito kele masinagogi; na mjeiko kimusi kwa wabwaa wa isanga na wazuri kwa undu ghwangu, eri mpate kuwaghorera Ilagho Lyaloli.

¹⁰ Nalyo Ilagho Lyaloli ni suti jako lyichililo mbari zose.

¹¹ Nenyo ilyi mwawato na kughenzo kele kutaghanyo, simwakusirimise na agho mjeghora, ela ghoreni icho mhawogho iyo ngelo yenyi, kwani sinyo wengi mjeghora, ela Roho wa Kuela.

¹² Wandu wejefunya wana wakwawe waulagho, na wana aba wejefunya wana wawe, na wana wejewaghaluka wavali wawe na kuwadea waulagho.

¹³ Nenyo mjemenyo ni wandu wose kwa izina lyangu. Naye uyu erumaghiagha hata kudua, ujekila.

Masirimi mabwaa

¹⁴ “Ela ilyi mwaona undu ghuwase ghukekala andu sighwefweni kukala, (uyu eshomagha atambukilo!) kwa hung'u awa weo Judea, wakimbile mghondini,

¹⁵ uyu ewo ighulu ya nyumba, saselele na kungila nyumba kuusa kindu chingi,

¹⁶ na mundu ewo mbweni, saghaluke kuusa nguo yake.

¹⁷ Na ni bugha kwa awa weo na vifu na awa wemamisagha majua agho!

¹⁸ Lombeni eri sighakale majua gha ishika.

¹⁹ Kwa kukala majua agho kujekala na masirimi mabwaa, lyingi sigheoneke kufuma Mlungu aumba urumengu hata hung'u, na sena lyingi sighejeoneka.

²⁰ Na ngera Bwana sedeile agho majua kukala machache, ni kumacha mndungi sekilagha, ela kwa undu ghwa wasaghulo ewasaghule, kadea majua agho kukala machache.

²¹ “Na ilyi mndungi amuza, ‘Zighana, Masihi uwo aha,’ ango, ‘Zighana, uwo alye,’ simwadumuse.

²² Kujeuka Masihi wa ndimi na wana tondolo wa ndimi; nawo wedeagha wana mwakilimbita na mashiniko, eri waembeembe ikadimika wasaghulo wa Mlungu.

²³ Kwa hung'u kulindeni, kwani namghorera kihambiri.

Kuja kwa Mwana wa Mdamu

²⁴ “Ela majua agho, nyuma ya agho matiriro, ijua lyikalagha kiza na mwezi sighujefunya mlangazi,

²⁵ na ndonde zijepotoka kufuma mlunguni, na ndighi za mlunguni zijenyavurika.

²⁶ Nawo wejemwona Mwana wa Mdamu keja maenguni kwa ndighi nyingi na ubwaa.

²⁷ Naye ujewatuma malaika kuwakoghanya wasaghulo wa Mlungu kufuma mbembe ine za urumengu. Kufuma andu urumengu ghwaduwila hata andu mlunguni kwaduwila.

Ifundiso kufuma kwa mtini

²⁸ “Kufundiseni ifundiso kufuma kwa mtini. Ilyi ghwadyowa kurinda na kufunya manyasi, mwamanya kamba vuli iwo avui.

²⁹ Kwa hung'u ilyi mwaona agha ghekedeika, manyeni uwo avui, avui mjangoni.

³⁰ Fulo namuza, kivali ichi sichiitagha agha ghose sighejile.

³¹ Mlunguni na isanga viitagha, ela malagho ghangu lyingi sigheitagha.

Sikwesi mndungi aweni ijua ango saa

³² “Ela ijua ilyo ango saa iyo, sikwesi ungi eimanyagha, hata wana malaika, hata Mwana, sala Aba mwenyi.

³³ Kaleni meso, lindeni, kwani simumanyagha ngelo ekujagha.

³⁴ Ni karakara na mundu etambagha, keuka kaya kwake wanawasariragha watumishi wake kazi zawe, kila mumoju kazi yake na kumuza mrindiri wa mjango alinde kirani.

³⁵ Kwa hung'u lindeni, kwani simumanyile ngelo bwana wa nyumba ewuyagha, ngera ni nahafuka, ango na kiro kibwaa, ango jongole ziketeta, ango na ikesho kiro.

³⁶ Eri sejeja kumtukira na amdoke mtungure.

³⁷ Na kwa hung'u namuza inyose, ‘Lindeni.’”