Marko 12 - UVORO GHWALOLI KWA WANDU WOSE

Ikataniso lya walimi wa mbuwa ya mizabibu

¹ Nao Jesu kadyowa kughora nawo kwa makataniso: “Nao koluo mundu mumoju eluo na mbuwa awandile mizabibu, naye karigha isanzu yose, na kakota kina cha kindu chekamila zabibu na kawaghala ulingo, ima kaihawana walimi, naye katamba isanga izima.

² Nao ngelo ighenda ifika, katuma mtumishi wake kwa walimi, eri ahawo matunda ghamoju gha mizabibu.

³ Walimi wakamwata, wakamkwita na kumgalisa mikonu mituu.

⁴ Nao sena ulya mundu katuma mtumishi mzima, nawo wakamshoghonola chongo na kumfwisha waya.

⁵ Naye kamtuma mzima, nawo wakamuulagha; na hung'u kwenyi kwa wazima wengi, wamoju wakawakwita na wamoju wakawaulagha.

⁶ Naye osighilo na mundu mumojori, mwana wake mshayo, kamtuma kwawe keghamba, ‘Wemhawagha ishima andu ni mwanwangu.’

⁷ Ela walye walimi wakaghora, ‘Uyu niye mundu wa ufwa, njuuni timuulaghe, eri ufwa ghukale ghwetu!’

⁸ Nao wakamwata, wakamuulagha na kutagha muli ghwake shighati ya mbuwa ya mizabibu.”

⁹ Jesu kawakotela, “Ndamu mundu wa mbuwa ya mizabibu udeagha ije? Ukujagha na kuwaulagha walimi na kuwahawa walimi wazima ilya mbuwa.

¹⁰ Ado simshomile agha Mawandiko gha Kuela? ‘Iwe lyileghilo ni wawaghali lyakala iwe ibwaa lya msingi.

¹¹ Bwana niye adeile ilagho ilyi, nalyo lyakala lya mashiniko mesoni kwetu.’”

¹² Vilongozi va Wayahudi wakatima kumwata Jesu kwa kukala wemanyile kamba oghorire lyilya ikataniso ighulu yawe, ela wakaogha makoghano. Kwa hung'u wakamsigha, wakaghenda ngila zawe.

Ikotelo ighulu ya kulipa kodi

¹³ Nao wakamtumila Jesu Wafarisayo na Waherode wamoju eri wamteghe kwa maghori ghake.

¹⁴ Nawo wekeja wakamuza, “Mwalimu, tamanya uwe nuwe mundu wa fulo, sutalagha mndungi; kwani sutalagha ubwaa ghwa mndungi, ela wafundisa ngila ya Mlungu kwa fulo. Ndamu tighorere, ado ni karakara kulipa kodi kwa Kaisari ango ije? Tilipe ango sitalipe?”

¹⁵ Ela Jesu kamanya ngolo zawe kukala za ngila mbili, kawauza, “Kudani mnitimagha? Nileteleni dinari niilole.”

¹⁶ Nawo wakamletela dinari. Naye kawauza, “Fwana iyi na mawandiko agha ni ghani?” Wakamuza, “Ni va Kaisari.”

¹⁷ Jesu kawauza, “Mhaweni Kaisari vindu va Kaisari, na Mlungu vindu va Mlungu.” Nawo wakamshinikila.

Ikotelo ighulu ya kuzuka kwa wafwa

¹⁸ Nao Wasadukayo, awa waghoragha sikwesi kuzuka kwa wafwa, wakamjila Jesu, wakamkotela wekeghamba,

¹⁹ “Mwalimu, Musa wanatiwandikile kamba ilyi mundu afwa na kusigha muke sewesi mwana, wakwawe amuse muke wa wakwawe eri ampatile wakwawe afwile wana.

²⁰ Nao koluo na wana wakwetu mfungate; wa hambiri kausa muke, naye kafwa sesighile wana;

²¹ na wa kaili kamusa ulya muke, naye kafwa sesighile wana; na wa katatu naese hung'u kwenyi,

²² na wose mfungate siwasighile wana. Nao kudua ulya muke kafwa.

²³ Ndamu ngelo yezuka, ukalagha muke wa ani? Kwani wose mfungate wemuusile?”

²⁴ Jesu kawauza, “Ado aho siko mkoselagha, kwa kulemo ni kumanya Mawandiko gha Kuela na ndighi za Mlungu?

²⁵ Kwani ngelo ya wandu kuzuka kufuma kwa wafwa, siwelolagha hata siweusogho, ela wejekala sa wana malaika wa mlunguni.

²⁶ Na kwa undu ghwa wafwa kuzukiso, ado simshomile chuo cha Musa andu kuwandiko malagho gha kisekuzi, selyi Mlungu amuuzile, ‘Imi nimi Mlungu wa Abrahamu, na Mlungu wa Isaki, na Mlungu wa Jakobo?’

²⁷ Iye si Mlungu wa wafwile ela ni Mlungu wa awa weo moyo; kwa hung'u muo na makosa.”

Mlomu mubwaa

²⁸ Nao mumoju wa walimu wa Sheria eluo alye, kawasikila wekedea nganyi wenyi na wenyi. Naye aghenda aona selyi Jesu eluo kewatumbulila Wasadukayo kirani, kamkotela, “Ni mlomu muni ghuo mubwaa ghwa yose?”

²⁹ Jesu kamtumbulila, “Ghwa hambiri ni ughu, ‘Sikila, Ee, Israeli, Bwana Mlungu wetu ni iye mwenyi keng'weri Bwana.

³⁰ Umshaye Bwana Mlungu wako kwa ngolo yako yose, na kwa roho yako yose, na kwa akili zako zose, na kwa ndighi zako zose.’

³¹ Na ghwa kaili ni ughu, ‘Umshaye mumbenyu sa uwe mwenyi.’ Sikwesi mlomu ghungi kuisa iyi.”

³² Nao mwalimu wa Sheria kaghora, “Mwalimu, waghora fulo kamba Mlungu ni mumojori, na sikwesi mzima, sala iye;

³³ na kumshaya kwa ngolo yose, na kwa akili zose, na kwa ndighi zose, na kumshaya mumbenyu sa uwe mwenyi, kwanachumbile mafunyo na sadaka zose zeisha.”

³⁴ Naye Jesu aona watumbulila kirani, kamuza, “Uwe suo kulele kungi na Uzuri ghwa Mlungu.” Nao kufuma aho mndungi sadimile kumkotela ikotelo lyingi.

Ikotelo ighulu ya Masihi

³⁵ Nao ilyi Jesu eluo kefundisa hekaluni, kaghamba, “Kudani walimu wa Sheria wauza wandu kamba Masihi ni mwana wa Daudi?

³⁶ Naye Daudi mwenyi kelongozo ni Roho wa Kuela wanaghorire: ‘Bwana wanamuuzile Bwana wangu, Kala kitembo kele mkonu ghwangu ghwa kijo, hata niwaike wamaiza wako isi ya maghulu ghako.’

³⁷ Daudi mwenyi wamwita Bwana; ndamu Masihi wadima ije kukala mwana wake?” Nawo wandu wengi wakamsikizila Jesu kwa kuboelo.

Jesu kuonya ighulu ya walimu wa Sheria

³⁸ Na kele mafundiso ghake kaghora, “Kulindeni na walimu wa Sheria, awa washayagha kughenda warwara nguo ndele, na kuroghoo ni wandu sokoni,

³⁹ na kukalila vifumbi va hambiri kele masinagogi, na ulalo ghwa ishima kele karamu;

⁴⁰ nawo walya vindu va wake wafwililo ni walume na kulomba malombi malele dali; fulo wepatagha kutaghanyo kubwaa.”

Mafunyo gha muke mkiwa

⁴¹ Nao Jesu kakala kitembo avui ya isanduku lyefunyila pesa za hekalu, kuzighana selyi makoghano weluo wekekumba pesa kele isanduku; wandu wengi weluo wazuri wakakumba pesa nyingi.

⁴² Nao muke mumoju mkiwa afwililo ni mlume keja kakumba vibelele vili va pesa viketi igome.

⁴³ Nao kawapang'a wairimi wake kawauza, “Fulo namuza, uyu muke mkiwa afwililo ni mlume wakumba pesa nyingi kuchumba wose wakumba kele isanduku lya pesa.

⁴⁴ Kwani awa wose wafunya zilya zawachumba; ela iye kele ukiwa ghwake wafunya vose ewo navo, vemdea akale moyo.”