Madeo 9 - UVORO GHWALOLI KWA WANDU WOSE

Kughaluka kwa Saulo

¹ Nao Saulo kajuzila kungiza viture veulagha wairimi wa Bwana. Kaghenda kwa Mkohani Mubwaa,

² kamulomba barua zetwala kwa masinagogi alye Damasko eri ilyi awadoka alye wairimi wa Ngila ya Bwana, walume kwa wake, awawate na kuwaleta Jerusalemu.

³ Nao ilyi eluo keghenda Damasko, afika avui na ghulya muzi, shwa-ng'ori mlangazi kufuma mlunguni ghukamlangazila.

⁴ Naye kagwa msangeni na kusikila lwaka lukemuza, “Saulo, Saulo! Kudani unitiriragha?”

⁵ Naye kaghora “Nuwe ani Bwana?” Lulya lwaka lukamuza, “Nimi Jesu uyu umutiriragha?”

⁶ “Ela uka ungile kele muzi, nawe ujeghorero agha ghakufweni kudea.”

⁷ Walye wandu weluo weketambanya na Saulo wakamanga kimusi kima, wakasikila lwaka, ela siwaonile mundungi.

⁸ Nao Saulo kauka, kafungula meso ghake, naye kalemo ni kuona. Nawo wakamwata mkonu wakangila Damasko.

⁹ Naye kwa majua matatu seluo keona, hata seluo kelya ango kenwa.

¹⁰ Nao alye Damasko koluo na mwirimi mumoju aitogho Anania. Naye oonile maono, na kele maono agho kasikila lwaka lwa Bwana lukemuza, “Anania.” Naye katika, “Nio aha Bwana.”

¹¹ Bwana kamuza, “Kubambanye ughende kele barabara ighoroke, hata kele nyumba ya Juda, umukotele mundu aitogho Saulo wa Tarso, elombagha.

¹² Naye kele maono wamwona mundu aitogho Anania kengila na kumwikilila mikonu eri apate kuona sena.”

¹³ Anania katumbulila, “Bwana, Nanasikile malagho gha uyu mundu kufuma kwa wandu wengi, selyi asirimise wandu wako Jerusalemu;

¹⁴ na hata aha uwo na udimo kufuma kwa wakohani wabwaa kuwawata wandu weghoragha izina lyako.”

¹⁵ Ela Bwana kamuza, “Ghenda, kwa kukala uyu ni chombo changu nichisaghule chinitumikile kwa kuwamanyisa izina lyangu wandu wa mbari nzima na wazuri na wandu wangu wa Israeli.

¹⁶ Na imi nijemwonyeza ghose afweni asirime kwa undu ghwangu.”

¹⁷ Kwa hung'u Anania kaghenda, kangila nyumba na kumwikilila mikonu kaghamba, “Wakwetu Saulo, Bwana wanituma kwako. Jesu mwenyi uyu akufumilile ngileni kweja aha. Wanituma eri uone na sena upate Roho wa Kuela.”

¹⁸ Nao shwa ng'ori vindu sa makoko vikapotoka kufuma kele meso gha Saulo, kaona sena. Kakala kimusi, kabatizo;

¹⁹ naye kalya kapata ndighi. Saulo kakala alye kwa majua machache ngila mojori na wairimi wa Damasko.

Saulo kuchila Damasko

²⁰ Nao iyo ngelo yenyi kaghenda kele sinagogi kadyowa kuchila keghora; “Jesu Ni Mwana wa Mlungu.”

²¹ Nawo wose wamusikile wakashinika na kukotelana, “Ado uyu mundu siye ungi eluo keulagha wandu Jerusalemu awa weluo wekeghora izina ilyi? Na aha sendeja eri awawate wandu na kuwaghenza kwa wakohani wabwaa?”

²² Ela machilo gha Saulo ghakajuzila kupata ndighi hata kawanyamaza Wayahudi wa Damasko kwa kuwaghorera hachi kamba Jesu niye Masihi.

²³ Nyuma ya majua mengi kuita, Wayahudi wakakoghana wakadea njama yemulagha Saulo;

²⁴ ela kaghorero gha njama yawe. Kiro na msenya wakalinda mijango ya muzi wekemlalila wamulaghe.

²⁵ Ela kiro kimoju wairimi wake wakamufunya kwa kumuseleza na kikapu kele ulalo gholuo ukuteni.

Saulo Jerusalemu

²⁶ Nao Saulo afika Jerusalemu katima kurunganyikana na wairimi. Nawo wakalegha kudumusa kamba naese ni mwirimi, kwa hung'u wakamwogha.

²⁷ Ela Baranaba kamwata mkonu, kamughenza kwa watumo na kuwaghorera selyi amonile Bwana ngileni na selyi Bwana aghoranye naye. Naye kawaghorera selyi Saulo achilile izina lya Jesu alye Damasko sewesi wogha.

²⁸ Kwa hung'u Saulo kakalanya nawo, keghendanya nawo kila andu alye Jerusalemu, kachila izina lya Bwana sewesi wogha.

²⁹ Sena kahelea na kudea nganyi na Wayahudi waghoragha Kigiriki, ela wo wakadea njama yemulagha.

³⁰ Nao wana wakwetu waghenda wamanya iyi njama yemulagha Saulo, wakamghenza Kaisari eri aghende Tarso.

³¹ Nao ikanisa lyose Judea, Galilaya na Samaria lyikapata sere. Lyikawaghalika na kuzegua kwa uwaruro ghwa Roho wa Kuela na kughenda kwa kumwogha Bwana.

Petro Lida na Jopa

³² Nao Petro ilyi eluo ketamba kila andu kewaselela wandu wa Mlungu, kabusa Lida.

³³ Alye kamdoka mundu mumoju aitogho Ainea, naye okelemele, hata sadimile kuuka ulilini kwa miaka minane.

³⁴ Petro kamuza “Ainea, Jesu Kristo wakuboesa. Uka uwale ulili ghwako.” Nao iyo ngelo yenyi Ainea kauka.

³⁵ Wandu wose weluo wekekala Lida na Sharoni wakamwona Ainea, nawo wakamdumusa Bwana.

³⁶ Nao Jopa koluo na mwirimi mumoju wa kiwake aitogho Tabitha (kwa Kigiriki oluo keito Dorokasi, kutambula kwake Mbala) Naye oluo ngelo zose kedea ghaloli na kuwawarura wakiwa.

³⁷ Nao kakala mkongo, kafwa. Muli ghwake ghukaoghesho na kuiko kele chumba cha gorofeni.

³⁸ Jopa sikoluo kulele kungi na Lida; kwa hung'u wairimi wasikila kamba Petro uwo Lida, wakatumana uvoro na wandu waili wekeghamba, “Njuu shashowa,”

³⁹ Nao Petro kauka kaghendanya nawo. Naye aghenda kufika, katwalo kele chumba cha gorofeni. Naye alye kamaro ni wake wose wafwililo ni walume wawe wekelila, na kumwonyeza nguo na makoti washonelelo ni Dorokasi ngelo eluo moyo.

⁴⁰ Nao Petro kawafunya wandu wose kele chilya chumba, kadyaya ngokoro kalomba nao ima kaghalukila chilya kimba kaghora, “Tabitha, uka.” Naye kafungula meso ghake, na aghenda amwona Petro, kakala kitembo.

⁴¹ Petro kamwata mkonu kamunula. Nama kawapang'a wandu wa Mlungu na wake wafwilililo ni walume wawe, kamwika hambiri yawe ewo moyo.

⁴² Uvoro ughu ghukaera andu kose Jopa, na wandu wengi wakamdumusa Bwana.

⁴³ Petro kakala majua mengi Jopa. Kakalanya na fundi wa mirongo, aitogho Simoni.